ამერიკის შეერთებული შტატების საელჩო თავის მოქალაქეებს მოუწოდებს, რომ არ ჩავიდნენ რუსეთში და ამჟამად იქ მყოფებმა სასწრაფოდ დატოვონ ქვეყნის ტერიტორია.
როგორც საელჩოს განცხადებაშია აღნიშნული, მას შემდეგ, რაც რუსეთის მთავრობამ მობილიზაცია გამოაცხადა, ოფიციალურმა მოსკოვმა, შესაძლოა, მოქალაქეებს ქვეყნის დატოვებაში ხელი შეუშალოს და ორმაგი მოქალაქეობის მქონე პირებს სამხედრო სამსახურში წასვლისკენ მოუწოდოს.
საელჩო აღნიშნავს, რომ კომერციული ფრენების სიხშირე რუსეთში ამჟამად შეზღუდულია.
,,რუსეთის მთავრობამ დაიწყო თავისი მოქალაქეების მობილიზება შეიარაღებულ ძალებში უკრაინაში შეჭრის მხარდასაჭერად. რუსეთმა შეიძლება უარი თქვას ორმაგი მოქალაქეების აშშ–ის მოქალაქეობის აღიარებაზე, უარი თქვას მათ აშშ–ს საკონსულო დახმარებაზე, ხელი შეუშალოს მათ რუსეთიდან გამგზავრებას.
კომერციული ფრენის ვარიანტები ამჟამად უკიდურესად შეზღუდულია და ხშირად მიუწვდომელია მოკლე დროში. სახმელეთო მარშრუტები მანქანით და ავტობუსით კვლავ ღიაა. თუ გსურთ რუსეთის დატოვება, რაც შეიძლება მალე უნდა გააკეთოთ. აშშ–ს საელჩოს აქვს მკაცრი შეზღუდვები აშშ–ს მოქალაქეების დახმარების უნარზე და პირობები, მათ შორის ტრანსპორტირების ვარიანტები, შეიძლება მოულოდნელად კიდევ უფრო შეზღუდული გახდეს.
აშშ–ის მოქალაქეებმა არ უნდა იმოგზაურონ რუსეთში, ხოლო მათ, ვინც ცხოვრობს ან მოგზაურობს რუსეთში, დაუყოვნებლივ უნდა დატოვონ რუსეთი, სანამ კომერციული მოგზაურობის შეზღუდული შესაძლებლობები რჩება. travel.state.gov. – საიტი შეიცავს ინფორმაციას მეზობელ ქვეყნებში შესვლის მოთხოვნების შესახებ, ზოგიერთ შემთხვევაში ვადაგასული აშშ–ს პასპორტებით მოგზაურობის პროცედურებზე და ვიზის მოთხოვნებს იმ ოჯახებისთვის, რომლებსაც ჰყავთ ამერიკელი და რუსეთის მოქალაქე ოჯახის წევრები,“ – წერია განცხადებაში.
უწყების განცხადებაში, ასევე აღნიშნულია, რომ აშშ–ს მოქალაქეებს არ აქვს გარანტიები, რომ რუსეთში გარანტირებულია მშვიდობიანი შეკრების უფლება და გამოხატვის თავისუფლება.
21 სექტემბერს ვლადიმერ პუტინმა რუსეთში ნაწილობრივი მობილიზაცია გამოაცხადა.
ავტორი
