16 აგვისტოს, ოზურგეთში, გაბრიელ ეპისკოპოსის ქუჩაზე, თხილის მიმღებ პუნქტებთან დილა ხმაურით დაიწყო, რაც ყვირილში გადაიზარდა _ დაპირისპირება სწორედ თხილის გატეხვის პროცესის განახლებას მოჰყვა.
როგორც ახლახან ვიუწყებოდით, ოზურგეთში უკვე დაიწყეს თხილის იმ პირობით ჩაბარება, როცა მომტანს ათი ცალი გატეხილი თხილიდან, თუ ყველა საღია, ერთში 50 თეთრს უხდიან, ანუ კილოგრამში ხუთ ლარს.
ზუსტად ანალოგიური ფაქტი მოხდა ამ დილით. გაბრიელ ეპისკოპოსის ქუჩაზე, ქალაქის ცენტრალურ ადგილზე. ქალბატონმა, რომელიც მანქანის ძარასთან იჯდა და თხილს იბარებდა, ერთ-ერთ მოქალაქეს, რომელსაც ათივე გატეხილი გულიდან ათივე კარგი აღმოაჩნდა, კილოგრამში 5 ლარის გადახდაზე მაინც უარი უთხრა:
_რა ვქნა, ყველა საუკეთესოა, მაგრმ ხუთ ლარს მაინც ვერ გადაგიხდი, მეგრელები ასე გვავალებენ და წინაააღმდეგ შემთხვევაში ჩვენი მიღებული თხილი არ მიაქვთო.
ადგილზე მოვიდა მამაკაცი, რომელმაც ჩასაბარებლად თხილი მოიტანა და გატეხვის შემდეგ, მისიც საუკეთესო ხარისხის აღმოჩნდა – ათიდან ათივე საღი! თუმცა მწონავმა მასაც იგივე უთხრა:
„ცალი 50 თეთრია, მაგრამ, მეგრელს არ მიაქვს მაინც. კი გვეუბნებიან, ცალში 50 თეთრს, მაგრამ დღეს მაინც 4,30 ლარი უნდა გადაგიხადოთ. რა ჩემი ბრალია, არ წაიღებენ და კი დამედება ვალი“, _ თითქმის ატირდა ქალბატონი.
აქ, ქალაქის ცენტრალურ ადგილზე, ქალბატონი, რომელიც მანქანის ძარასთან იჯდა და თხილს იბარებდა, ერთ-ერთ მოქალაქეს, რომელსაც ათივე გატეხილი გულიდან ათივე კარგი აღმოაჩნდა, კილოგრამში 5 ლარის გადახდაზე მაინც უარი უთხრა:
_ რა ვქნა, ყველა საუკეთესოა, მაგრამ ხუთ ლარს მაინც ვერ გადაგიხდი _ სამეგრელოში ასე გვავალებენ და წინაააღმდეგ შემთხვევაში ჩვენი მიღებული თხილი არ მიაქვთო.
ადგილზე მოვიდა მამაკაცი, რომელმაც ჩასაბარებლად თხილი მოიტანა და გატეხვის შემდეგ, მისიც საუკეთესო ხარისხის აღმოჩნდა _ ათიდან ათივე საღი! თუმცა, მწონავმა მასაც იგივე უთხრა: „ცალი 50 თეთრია, მაგრამ არ მიაქვთ მაინც. კი გვეუბნებიან, ცალში 50 თეთრს, მაგრამ დღეს მაინც 4,30 ლარი უნდა გადაგიხადოთ. რა ჩემი ბრალია, არ წაიღებენ და დამედება ვალად“, _ თითქმის ატირდა ქალბატონი.
გაბრაზებულმა ქალმა, რომელმაც საუკეთესო თხილი მოიტანა, თხილი, თავისი ჩაქუჩიანად ძირს დაუყარა მწონავს, თავად კი გაბრაზებულმა დაავლო თავის ტომარას ხელი და წყევლაც მიაყოლა: „შარშან კი გაკეთდით ამ მტეხლაბით და წელს წაგამწაროთ უფალმა!“
ჩვენ ეს ყველაფერი გადავიღეთ და სასწრაფოდ მოვთხოვეთ თხილის მიმღებს, ეთქვა, ვინ არ იბარებდა კარგ თხილს სამეგრელოში 5 ლარად (ცნობილია, რომ წლების მანძილზე ოზურგეთში შემოდიან სამეგრელოდან და გააქვთ თხილი. ავტ.)
_რომელია და ეგერ არის, ლევანა ჰქვია, – გვითხეს აქ.
ჩვენ „ლევანა“, რომელმაც გვარი არ გვითხრა, დავაყენეთ ფაქტის წინაშე _ გატეხილი თხილის ხარისხი საუკეთესოა, ყველა საღია და მოქალაქეს სწორედ მისი დავალებით არ უხდიან შესატყვის ფასს.
მან პასუხი არ გაგვცა და ტომარაში დაიწყო ყურება, მერე კი იქაურობას საერთოდ გაეცალა.
_სად გარბიხარ! მომეცი ახლა ხუთი ლარი კილოგრამში, ხომ ხედავ, როგორი თხილი მოვიტანე? მომეცი, ჩქარა, _ ახმაურდა თხილის პატრონი მამაკაცი, თუმცა, „ლევანა“ თვალს მიეფარა.
სამაგიეროდ, „ლევანას“ გამოესარჩლა იქვე მდგომი მამაკაცი, რომელმაც, ყურსასმენით „მორთულმა“, სათვალის ზემოდან გადმოგვხედა და შემოგვიტია:
_რა გინდა?! სწორეა ეგ კაცი და ვინ გეკითხება, რო ეკითხები?!
სამწუხაროდ, ამ ბოლო დროს, „გურია ნიუსთან“ ურთიერთობისას ადგილი აქვს ფაქტებს, როცა ე. წ. „მაყურებელი“ თუ მათი მსგავსი „ტიპები“, ჩვენი კითხვების „გაკონტროლებას“ ლამობენ _ გომისმთაზეც შემოგვიტია ამას წინ ერთმა, მინისტრთან კითხვის დასმისას.
_ სამეგრელოდან ჩამოსული კი არა, აქაური ლევანა ნახეთ, მარგალიტაძე, ყოფილ აბრეშუმის ფაბრიკასთან რომ თხილის ქარხანაა, იმის დირექტორი. იგივეს აკეთებენ გრიბოედოვის ქუჩაზე რომ ქარხანაა, _ გვეუბნებოდნენ აღელვებული მწონავები და ადგილზე თავმოყრილი მოქალაქეები.
_ ჟურნალისტები თუ არ დაგვეხმარეთ და მთავრობა არ გამოახედეთ ჩვენკენ, ამათ აიწყვიტეს და იმის მომიზეზებით, რომ ვიღაცას ცუდი თხილი მოაქვს, სათავისოდ აკეთებენ ყველაფერს. ხალხის უმეტესობას კარგი თხილი მოაქვს, მაგრამ ხომ ხედავთ, რას ბედავენ? როგორცჩანს, ამათ უხარიათ, ვიღაც თაღლითი რომ ცუდ თხილს მოიტანს. ნახავენ მიზეზს და კარგ თხილს ჩალის ფასად იყიდიან! მიაწვდინეთ ხმა მთავრობას! რას გვეჩით?! ამ კორონობაზე პური ვერ მივიტანეთ სახლში და ახლა ამ თხილსაც გვაცლიან პირიდან? ხომ ყველამ იცის, რომ წელს თხილის ხარისხი ბევრად უკეთესია და მაინც მიზეზს ეძებენ, რომ ხალხს სული ამოხადონ. მოიფიქრონ ხარისხის შემოწმების სხვა მეთოდი და არა სულელური მტეხლაობა, რომელიც მათთვის სახეიროა და მხოლოდ მშრომელ კაცს აზარალებს, _ ასეთი ხმამაღალი და აღელვებული ლაპარაკით, რედაქციის ოფისის კარებამდე მოგვყვნენ გაცხარებული მოქალაქეები.
ჩვენს სატელეფონო ზარს არ უპასუხა აქ ნახსენებმა ლევან მარგალიტაძემ.
„გურია ნიუსი“ ეწვევა ოზურგეთის თხილის ქარხნებს და მოგაწვდით ინფორმაციას, რა ხდება ადგილებზე.
