“ავტობუსით მგზავრობს მოსახლეობა და წვიმაში, ქარში, მზეში ელოდება ავტობუსს”

ახლა, როცა ლანჩხუთში უპირატესად ქალაქის ცენტრალურ ნაწილში გარკვეული სახის ინფრასტრუქტურული სამუშაოები გახორციელდა და ტერიტორია გაკეთილშობილდა _ მოწესრიგდა მრავალბინიანი საცხოვრებელი სახლების გარე ფასადები, მოეწყო ტროტუარები და მოსასვენებელი სკვერები, ლანჩხუთელთა იმ ნაწილს, ვისაც საკუთარი სატრანსპორტო საშუალების გამოყენების საშუალება არ აქვს (ასეთი კი საკმაოდ ბევრია), მგზავრის საჭიროებაზე მორგებული ელემენტარული პირობების შექმნაზე უწევს საუბარი, მაშინ, როცა სხვაგან აქცენტი კეთდება საზოგადოებრივი სატრანსპორტო ახალი სისტემის დანერგვასა და განვითარებაზე.

ქალაქის ცენტრში, სადაც თავს იყრის სხვადასხვა სოფლიდან ჩამოსული სატრანსპორტო საშუალებები, საზოგადოებრივი ტრანსპორტით მოსარგებლეებისთვის ელემენტარული პირობებიც კი არ არსებობს და ლოდინი, წვიმასა თუ თაკარა მზეში, ღია ცის ქვეშ უწევთ.

აქედან გამომდინარე კი, საზოგადოებრივი ტრანსპორტით მოსარგებლე მოქალაქეთა მთავარი საწუხარი მოსაცდელის არარსებობაა. პრობლემა არახალია და იმ ტერიტორიაზე, სადაც სხვადასხვა სოფლიდან ჩამოსული ტრანსპორტი ჩერდება, მგზავრებს უკვე ბევრი წელია, ღია ცის ქვეშ ელოდებიან ტრანსპორტს.

“ლანჩხუთი ერთადერთი ქალაქია მსოფლიოში, რომელსაც ავტოსადგური არ აქვს. ავტობუსით მგზავრობს სოფლის მოსახლეობა და წვიმაში, ქარში, მზეში ელოდება ავტობუსს… რატომ და ვის აწყობს ეს?” _ ეს კითხვა აწუხებს ლანჩხუთელთა იმ ნაწილს, ვისაც საზოგადოებრივი ტრანსპორტით უწევს სარგებლობა.

“წლებია, რომ ავტომოსაცდელი გვესაჭიროება. ელემენტარულად, იმის საშუალებაც არაა, გადახურულში დაელოდო ტრანსპორტს. თან ერთი და ორი წლის პრობლემა კი არ არის ეს, შევარდნაძის ხელისუფლების დროიდან მოყოლებული, ამ დღეში ვართ. ხელისუფლებაში ვინც არიან, მათ საკუთარი მანქანები ჰყავთ და არ იციან საზოგადოებრივი ტრანსპორტით მგზავრობის გემო. რა გახდა ასეთი ელემენტარული, მოსაცდელის ტიპის ნაგებობის გაკეთება. სოფელ ჯუნეწერში, მის დღეში ტრანსპორტს რომ არ გაუვლია იქით, იქ გააკეთეს მოსაცდელი, სკოლის ავტობუსს ელოდებიან ბავშვებიო. ქალაქში კი, მოსწავლესაც რომ ჭირდება და სოფლიდან ჩამოსულ სხვა მგზავრსაც, ვერადავერ მოაფიქრდათ ერთი გადახურული რაღაც რომ გააკეთონ.

კი, კარგია ლანჩხუთში ფასადები, ტროტუარები რომ ახლდება, მაგრამ რა ვუყოთ იმ ქაოსს, თუნდაც, გურულის ძეგლის მიმდებარედ რომაა?! ზაფხულში კაი, გაჭირვებით, მარა ხის ქვეშ მაინც მოძებნი მოსაჩრდილებელ ადგილს. ზამთარში, თქეში წვიმა რომაა, რა უნდა ქნა?! ხალხი ქათმებივით ვართ იქეთ-აქეთ შეყუჟულები, სადაც კი მცირედ სიმშრალეს ვნახავთ. ასობით ადამიანი ჩამოდის ყოველდღიურად სოფლიდან. სკოლებში სწავლა რომ იწყება, მოსწავლეებიც სარგებლობენ ტრანსპორტით. სანამ ავტობუსი მოვა ბავშვები უკვე სველდებიან. ცოდვა არ არის პენსიის ასაღებად წამოსული მოხუცი, ან სკოლიდან გამოსული ბავშვი ღია ცის ქვეშ რომ დგას წვიმაში?! სამწუხაროდ, წლებია, ამას არავინ აქცევს ყურადღებას. არადა, პირველ რიგში, სწორედ ეს საკითხია მოსაგვარებელი”, _ ამბობენ საზოგადოებრივი ტრანსპორტით მოსარგებლე მოქალაქეები, რომელთაც ხშირად უწევთ სხვადასხვა საქმეზე სოფლიდან მუნიციპალურ ცენტრში ჩამოსვლა.

საგულისხმოა, რომ აღნიშნულ პრობლემაზე აქცენტი წლების წინ საკრებულოს ერთ-ერთ სხდომაზე ლესის მაჟორიტარმა ელისო ჭიჭინაძემაც გააკეთა და მუნიციპალიტეტის ხელმძღვანელობას პრობლემის მოგვარების თხოვნით მიმართა. მაშინ, თემასთან დაკავშირებით, მერიის ინფრასტრუქტურის სამსახურის აწ უკვე ყოფილმა უფროსმა, ლევან ჩხაიძემ “გურია ნიუსთან” განმარტა: “იმისთვის, რომ ქალაქის იმ ტერიტორიაზე, სადაც სოფლებიდან ჩამოსული საზოგადოებრივი ტრანსპორტი იყრის თავს, მოქალაქეებისთვის მოსაცდელი მოეწყოს, მერიისგან დავალება უნდა მივიღოთ, რომ რაღაც პროგრამაში ჩავსვათ. კარგი იქნება მოქალაქეებმა მერიას ოფიციალურად მიმართონ ამასთან დაკავშირებით. ჩვენ მოსაცდელის ტიპიური პროექტიც გვაქვს, ისეთი, როგორიც სოფელ გვიმბალაურში, საფეხბურთო აკადემიის მიმდებარედაა გაკეთებული. საკმაოდ ლამაზია შესახედავადაც. მთავარია, მე მივიღო დავალება ჩემი ზემდგომისგან, მათთან კი, მოქალაქეებისგან უნდა შევიდეს მოთხოვნა.

ჯერჯერობით, არ არის გათვალისწინებული მოსაცდელის მოწყობა, ვნახოთ, შემდგომში რა იქნება. ისე, იყო ამ საკითხზე საუბარი და ვნახოთ”.

იქედან გამომდინარე, რომ პრობლემა ამ დრომდე გადაუჭრელი რჩება და მოქალაქეებიც აქტუალურად ითხოვენ კითხვაზე პასუხს, შესაბამისად, მოსახლეობისვე თხოვნით, “გურია ნიუსი” დაინტერესდა იგეგმება თუ არა საზოგადოებრივი ტრანსპორტით მოსარგებლეთათვის მოსაცდელის მოწყობა და თუ იგეგმება, როდის და

მერიის ინფრასტრუქტურის სამსახურს დაუკავშირდა. სამსახურის უფროსის მოვალეობის შემსრულებელმა ალეკო კირვალიძემ, მართალია, ვერ დაგვიკონკრეტა სამუშაოების დაწყების ზუსტი დრო, თუმცა, დაგვაიმედა, რომ პროექტი არსებობს და ახლა მუშაობა საჭირო თანხის მოძიების კუთხით მიმდინარეობს:

“პროექტი უკვე არის, ახლა თანხების მოძიებას ველოდებით”, _ მოკლე პასუხით შემოიფარგლა კირვალიძე.