ჩოხატაურის საფეხბურთო კლუბ „ბახმაროს“ გულშემტკივრები სოციალურ ქსელში განცხადებას ავრცელებენ.
გას
გასადიდებლად დააჭირეთ ფოტოს
“როგორც ჩვენთვის გახდა ცნობილი, საფეხბურთო კლუბი „ბახმაროს“ არსებობა საფრთხის წინაშეა _ ლიგა 3-ის ახალი სეზონის დაწყებამდე თვეზე ცოტა მეტია დარჩენილი, გუნდი ჯერაც არ შეკრებილა, კლუბს არც ერთ ფეხბურთელთან არ აქვს კონტრაქტი გაფორმებული.
ბახმაროს 75 წლიან ისტორიაში ერთხელ იყო კლუბის ფუნქციონირების შეწყვეტის ფაქტი _ გასული საუკუნის ბოლოს კლუბი დაიშალა და მისი აღდგენა 10 წლის შემდეგ, 2009 წელს მოხერხდა.
მას შემდეგ „ბახმარომ“ ახალი ისტორიის წერა დაიწყო, _ 2 ლიგით დაწინაურდა და დღეს ლიგა 3 წევრია, რაც საუკეთესო შედეგია გურიაში (ლანჩხუთის გურია და ოზურგეთის მერცხალი ლიგა 4- ში გამოდიან). ამ ლიგის ზემოთ მხოლოდ ოცი საუკეთესო ქართული კლუბია.
„ბახმარო“ საქართველოს ფეხბურთის განვითარების ფონდიდან წელს 200 ათასი ლარით ფინანსდება, რაც კლუბის ფუნქციონირებისათვის არ არის საკმარისი. გუნდი მუნიციპალიტეტის საკუთრებაა და მათი პასუხისმგებლობაა მისი შენარჩუნება, განვითარება, სპონსორების მოძიება, საფეხბურთო ინფრასტრუქტურის განვითარება, მწვრთნელთა აღზრდა და განათლება და ა. შ.
„ბახმაროს“ ჩოხატაურელების მთავარი საგულშემატკივრო გუნდია. დღევანდელ დღემდე ეს კლუბი მოვიდა უამრავი ადამიანის შრომის და ძალისხმევის შედეგად, მათ შორის ფეხბურთელების, მწვრთნელების, კლუბის ხელმძღვანელების, რაიონის მერების, საკრებულოს თავმჯდომარეების, გულშემატკივრების, ბიზნესმენების….
და დღეს გუნდი დაშლაზე მიდის საუბარი…
გვიჩნდება შეკითხვები _ რატომ ხდება ასე? ჯერ არ ყოფილა შემთხვევა, ლიგა 3-ის კლუბი სეზონის დაწყებამდე დაშლილიყო, მაშინ როცა ფონდიდან გარანტირებული 200 ათასი ლარი აქვს. ვინ იღებს ამ გადაწვეტილებებს? რატომ ვერ ხერხდება კლუბისთვის თვეში 20 000 ლარის მოძიება? რატომ ვერ მოიძებნა სპონსორი?
იმედია, მივიღებთ ამ შეკითხვებზე პასუხს და მოინახება კლუბის არსებობის გაგრძელების საშუალება.
დრო ძალიან ცოტაა….
„ბახმარო“ უნდა გადარჩეს!!!” _ წერენ “ბახმაროს” გულშემატკივრები.
სამწუხაროდ, საფეხბურთო კლუბ „ბახმაროს“ ფეისბუქგვერდზე ეს პოსტი 19 თებერვალს, დილით აღარ იძებნება. ჩვენ ვარკვევთ, თუ რატომ წაიშალა პოსტი.
ამასთანავე, გაგვაჩნია საფუძვლიანი ეჭვი, რომ პოსტის წაშლა ემსახურება “გურია ნიუსის” დისკრედიტაციას, თითქოს ჩვენ ფეიქნიუსებს ვაქვეყნებთ. თუმცა, ჩვენი დისკრედიტაციის მოსურნეებს გვინდა, ვაცნობოთ, რომ “ბახმაროს” გულეშემატკივართა პოსტის სქრინი რედაქციაში ინახება და მისი ნახვა ამ წერილის დასაწყისში შეგიძლიათ.
