“ბახმაროში “ორბის” მასშტაბური კომპლექსის პროექტი წინააღმდეგობაშია გაეროს მდგრადი განვითარების მიზნებთან”,_ ამის შესახებ ურბანული განვითარების ინსტიტუტის განცხადებაშია ნათქვამი.
როგორც ურბანული განვითარების ინსტიტუტში აცხადებენ, წარმოდგენილი კომპლექსი გაანადგურებს გარემოს ავთენტურობას და მუნიციპალიტეტს მოუწოდებენ, რომ პროცესები დაბრუნდეს ქალაქგეგმარებითი პროექტირების სტადიაზე.
“მუნიციპალიტეტმა უნდა მიიღოს გადაწყვეტილება, რომელიც ერთის მხრივ შეზღუდავს დეველოპერის ინტერესს და მეორეს მხრივ სასიცოცხლოდ მნიშვნელოვანია ბახმაროს მდგრადი განვითარებისთვის.
წარმოდგენილი კომპლექსი გაანადგურებს გარემოს ავთენტურობას, რომელსაც მოყვება საერთაშორსო ტურისტების ინტერესის ნაკლებობა, რაც გამოიწვევს ბახმაროს და მუნიციპალიტეტის მოსახლეობისთვის ჯანსაღი ინვესტიციების და შემოსავლების შემცირებას.
კომპლექსი სრულად არის ამოვარდნილი გარემოს მოცულობითი კონტექსტიდან.
ქალაქგეგმარებითი კუთხით კრიტიკულად მცდარია გადაწყვეტები და არ ითვალისწინებს მთელ რიგ გამოწვევებს რომელიც ამ მოცულობას მოყვება.
კომპლექსი წინააღმდეგობაშია ადამიანურ მასშტაბთან.
ურბანული დიზაინის კუთხით, აუცილებელია გარკვეული ინტერვალით იცვლებოდეს ფასადის ელემენტები.
კომპლექსი მისი სიგრძის მონაკვეთში სრულად აქრობს ადამიანისთვის მთის ხედის აღქმას.
არსებობს თუ არა გარემოზე ზემოქმედების შეფასების დოკუმენტი, რადგან ეს უზარმაზარი ბეტონის ფარდა, ჰაერის მასებს ცირკულაციაში ხელს შეუშლის.
ყველა მშენებლობა განვითარებას არ ნიშნავს. ეს მშენებლობა დიდ საფრთხეს შეუქმნის ბახმაროს განვითარებას.
ყველა ინვესტიცია ეკონომიკისთვის სასარგებლო არა, თუ მას არ მოჰყვება გააზრებული გადაწყვეტილებები. ამის ნათელი მაგალითია გუდაური და ბაკურიანი.
მიზანშეწონილად მიგვაჩნია: ხელისუფლებამ გაითვალისწინოს სამოქალაქო და პროფესიული საზოგადოების პოზიცია.
პროცესები დაბრუნდეს ქალაქგეგმარებითი პროექტირების სტადიაზე.
გამოცხადდეს ღია კონკურსი აღნიშნული ტერიტორიის განვითარებისა და განაშენიანების გეგმის მოსამზადებლად”,_ აცხადებენ ურბანული განვითარების ინსტიტუტში.
