22 წლის ნინი გიორგაძე უკვე მესამე წეია, კომპანია CCEH-ის პორტფოლიო პროექტებზე მუშაობს. ჯერ იყო ახალქალაქი ჰესის მშენებლობის პროექტი, რომელიც 2022 წლის ნოემბერში გაეშვა ექსპლუატაციაში, ახლა კი ბახვი 1 და ბახვი 2 ჰესების პროექტებია, სადაც ნინი უმცროსი ინჟინრის პოზიციაზე მუშაობს.
ნინი გიორგაძე 2023 წლის სექტემბრიდან სტენფორდის უნივერსიტეტის დოქტორანტურაზე გააგრძელებს სწავლას. მსოფლიოს საუკეთესო უნივერსიტეტში ნინი სრული დაფინანსებით მოხვდა სამოქალაქო და გარემოს ინჟინერიის ფაკულტეტზე.
“გურია ნიუსი” გთავაზობთ ინტერვიუს ნინი გიორგაძესთან, რომელიც გვიყვება, თუ რა გზა გაიარა მან სკოლის მერხიდან სტენფორდამდე.
_ რომელი სკოლა დაამთავრეთ?
_ 2018 წელს დავამთავრე ქართულ-ამერიკული უმაღლესი სკოლა (Georgian-American High School).
_ სკოლის დასრულების შემდეგ სად გააგრძელეთ სწავლა და რომელ ფაკულტეტზე?
_ სკოლის დასრულებისთანავე ჩავაბარე სან დიეგოს სახელმწიფო უნივერსიტეტი-საქართველოში (San Diego State University Georgia) სამოქალაქო ინჟინერიის (Civil Engineering) ფაკულტეტზე.
_ ამჟამად რას საქმიანობთ?
_ 2020 წელს უნივერსიტეტის რეკომენდაციით მოვხვდი კავკასიის განახლებადი ენერგიის ჰოლდინგში (CCEH) სამოქალაქო ინჟინრის სტაჟირების გასაუბრებაზე. კომპანიის აღმასრულებელი დირექტორი, მიხეილ ნიბლაძე, სან დიეგოს სახელმწიფო უნივერსიტეტის მრჩეველთა საბჭოს წევრია. მან იქ გამიცნო და მიმიწვია თავის კომპანიაში სტაჟირებაზე.
ამავე წლის აგვისტოში დავიწყე მუშაობა კავკასიის განახლებადი ენერგიის ჰოლდინგის (CCEH) ერთ-ერთ პორტფოლიო პროექტზე _ “ახალქალაქი ჰესი”. აღნიშნული მცირე ზომის ჰიდროელექტროსადგური წინა წლის ნოემბერში წარმატებით გაეშვა ოპერირებაში, რის შემდეგაც დავიწყე მუშაობა ამავე კომპანიის ახალ პროექტზე, როგორც უმცროსი სამოქალაქო ინჟინერი. პროექტი ორ, მცირე და საშუალო ჰიდროელექტროსადგურის (“ბახვი 1 ჰესი” და “ბახვი 2 ჰესი”) აშენებას მოიაზრებს გურიაში. ჩემთვის, როგორც გურულისთვის, ორმაგად სასიამოვნო და საპასუხისმგებლოა მსგავსი მნიშვნელობის პროექტში ჩართულობა. აქვე უნდა აღვნიშნო, რომ ჩემთვის ძალიან მნიშვნელოვანი იყო კარგ სამუშაო გამოცდილებასთან ერთად, შემენარჩუნებინა მაღალი ქულები უნივერსიტეტში. საბედნიეროდ სამსახური ამაში ყოველთვის მიწყობდა ხელს.
_ ცხოვრების ასეთ მნიშვნელოვან ეტაპებზე ვინ იყო თქვენი ყველაზე დიდი გულშემატკივარი?
_ ალბათ, როგორც ცხოვრების ყველა ეტაპზე, ამ დროსაც ჩემი ოჯახის წევრები იყვნენ მოტივაციის ყველაზე დიდი წყარო. განსაკუთრებული ჩართულობით მამას გამოვარჩევდი.
_ თქვენი აზრით, რამ განაპირობა თქვენი წარმატება და ელოდებოდით თუ არა მსგავს შედეგს?
_ შრომისმოყვარეობა და მიზანდასახულობა მგონია ყველაზე მნიშვნელოვანი თვისებები ნებისმიერი წარმატების მისაღწევად. ამერიკულ უნივერსიტეტში ჩაბარებას დიდი ხნის განმავლობაში ვფიქრობდი, თუმცა, რა თქმა უნდა, ეს მხოლოდ ბოლო წლების მონდომების დამსახურება არაა და ადრეული ასაკიდან სწორი პრიორიტეტებისა და ღირებულებების ჩამოყალიბებამ შეუწყო ხელი. მოსწავლეობის პერიოდშივე ტექნიკური საგნების მიმართ მქონდა განსაკუთრებული ინტერესი და გამიმართლა, რომ სკოლამ ამ მიმართულებით განვითარებაში ძალიან შემიწყო ხელი. ასევე, გამიმართლა და “ათასწლეულის გამოწვევის ფონდის” მიერ მხარდაჭერილი პროექტით ჩავაბარე სან დიეგოს სახელმწიფო უნივერსიტეტში სრული დაფინანსებით, რამაც კიდევ უფრო დამაახლოვა ამერიკულ განათლებასთან და გამიხსნა გზა მაღალი რეიტინგის უნივერსიტეტებისკენ. თუმცა, ინჟინერია ფართო დარგია და ძალიან მნიშვნელოვანია, იპოვო ის მიმართულება, რომელიც ყველაზე მეტად ემთხვევა შენს ინტერესებს. აკადემიური ცოდნის სწორ, ჩემთვის საინტერესო სფეროში გამოყენება სამუშაო გარემომ განაპირობა.
რაც შეეხება მოლოდინებს, საკმაოდ ბევრ უნივერსიტეტში მქონდა გაგზავნილი აპლიკაციები და დადებით პასუხს ველოდებოდი უმეტესობისგან. თუმცა თავიდანვე ვაფასებდი, რომ კონკრეტულად სტენფორდში მიღების შესაძლებლობა ნაკლები იყო და მოლოდინიც, შესაბამისად, თითქმის არ მქონდა. სტენფორდს მსოფლიოს საუკეთესო უნივერსიტეტებს შორისაც კი მიღების ერთ-ერთი ყველაზე დაბალი მაჩვენებელი აქვს, განსაკუთრებით საინჟინრო დარგებში. ძალიან ბედნიერი ვარ, რომ შერჩევითობის ამ მაღალმა კრიტერიუმმა არ დამაბრკოლა და მაინც გავგზავნე აპლიკაცია.
_ როგორ წარმოგიდგენიათ თქვენი თავი სტენფორდის უნივერსიტეტში და რა მოლოდინები გაქვთ?
_ ჯერ კიდევ იმის გააზრების ეტაპზე ვარ, რომ სტენფორდში გავაგრძელებ სწავლას სექტემბრიდან. ჩემთვის სრულიად ახალი ცხოვრების ეტაპი იწყება, რასაც მოუთმენლად ველოდები. იმასთან ერთად, რომ მივიღებ უმაღლესი დონის თეორიულ და პრაქტიკულ განათლებას, ჩავატარებ კვლევას იმ სფეროში, რომელიც მაინტერესებს, გავიცნობ დარგის სახელოვან სპეციალისტებს, პროფესორებს, ასევე, ჩემი თაობის წარმატებულ ადამიანებს და ამ მხრივაც გავიმდიდრებ ჩემს გამოცდილებას.
_ რომელ ფაკულტეტზე ჩაირიცხეთ და რამდენ ხანს მოგიწევთ აღნიშნულ ფაკულტეტზე სწავლა?
_ ჩავირიცხე სამოქალაქო და გარემოს ინჟინერიის (Civil and Environmental Engineering) ფაკულტეტის სადოქტორო პროგრამაზე. საშუალოდ კვლევა ხუთ წელს გრძელდება ხოლმე, ზოგ შემთხვევაში მეტიც. იმედია, როგორც გურული, აქაც სწრაფი ვიქნები.
_ მოდით, სამომავლო “გეგმებზეც” ვისაუბროთ, აპირებთ ამერიკაში დარჩენას თუ საქართველოში დაბრუნდებით?
_ მიუხედავად სკეპტიკური განწყობებისა, დარწმუნებული ვარ, რომ საქართველოში დავბრუნდები. ჩემი კვლევის მიზანიც თავისთავად საქართველოს რეალობისა და საჭიროების გათვალისწინებით ავირჩიე. ორ წელზე მეტია ჰიდროელექტროსადგურების მშენებლობაში ვარ ჩართული და კარგად ვაცნობიერებ ამ მიმართულებით საქართველოს გამოუყენებელ ენერგორესურსებს და შესაძლებლობებს. წინა წელს გამოვაქვეყნე ნაშრომი “Importance of Renewable Energy, Specifically Hydropower Development” (“განახლებადი ენერგიის, კერძოდ ჰიდროენერგეტიკის განვითარების მნიშვნელობა”). ჩემი კვლევაც ამ მიმართულებით იქნება წარმართული. რა თქმა უნდა, ვგეგმავ, მიღებული ცოდნა და გამოცდილება ისევ საქართველოს განვითარებაში, კერძოდ ენერგოდამოუკიდებოლობის მოპოვებაში გამოვიყენო.
_ თქვენი ცხოვრების დევიზი რა არის?
_ ყოველთვის მომწონდა გამოთქმა: “work until your idols become your rivals” (“იმუშავე მანამ, სანამ შენი კერპი შენი კონკურენტი არ გახდება”). ახლა განსაკუთრებული დევიზი არ მაქვს, უფრო ვცდილობ, ჩემს თავს ვაჯობო და მაქსიმალურად გამოვიყენო ყველანაირი გამოცდილება. სტენფორდიც ჩემთვის არის ახალი შესაძლებლობა, კიდევ უფრო ბევრი რამე დავუმტკიცო ჩემს თავს.
_ რას ეტყოდით იმ სტუდენტებსა და აბიტურიენტებს, ვინც ამ გზას ახლა გადის?
_ უნივერსიტეტის არჩევა და ჩაბარების პროცესი საკმაოდ სტრესულია, ნერვიულობა კი თანმდევი გრძნობა. აპლიკაციის მომზადება, გაგზავნა, ლოდინის პერიოდი – თითოეული ეტაპი მეტად სანერვიულო იყო. მთავარია, ამ განცდამ თავდაჯერებულობისა და შრომისმოყვარეობის ხარისხი არ შეამციროს. აბიტურიენტებსა და სტუდენტებს ვურჩევდი, გაითვალისწინონ ერთი დეტალი, ზოგჯერ გამოცდებზე შესაძლებლობის მაქსიმუმს ვერ ავლენ, მაგრამ ყველაფერი წინ არის და ცხოვრება გვთავაზობს ახალ შესაძლებლობებს, როგორც დიდი რუსთაველი ბრძანებს: “ბედი ცდაა, გამარჯვება ღმერთსა უნდეს, მო-ცა-გხვდების”.
