ბახმაროში მძიმე ტექნიკის მდინარე ბახვისწყალზე გამოჩენამ საზოგადოების და გარემოსდამცველების ყურადღება მიიქცია.
გვერდმა “გადავარჩინოთ გურიის მდინარეები” სოციალურ ქსელში გაავრცელა ვიდეო, სადაც ჩანს როგორ ხდება მდინარე ბახვისწყლიდან ღორღის ამოღება.
გარემოსდამცველი ირმა გორდელაძე ამბობს, რომ მდინარიდან ღორღის ამოღება დაუშვებელია და მსგავს სამუშაოს სპეციალური ნებართვები სჭირდება.
რა ხდება კურორტ ბახმაროზე ? _ ამის გასარკვევად ჯერ მერის წარმომადგენელს, რომან კალანდაძეს დავუკავშირდით.
თუმცა, კალანდაძემ მუნიციპალიტეტის მერთან გადაგვამისამართა.
დავით შარაშიძის თქმით, მდინარიდან ამოღებული ღორღით ბახმაროს შიდა გზების მოხრეშვა ხდება. უფრო მეტიც, სამუშაოების პროცესში მდინარე ბახვისწყლის კალაპოტის ფორმირებაც კი გახორციელდა.
“ჩვენი სამსახურები მუშაობენ და ვხრეშავთ ბახმაროს შიდა გზებს, რაც ისტორიაში არ მომხდარა არასდროს. გზები იყო ძალიან გაუვალი. ვასწორებთ მძიმე ტექნიკით და ვაგებთ ინერტულ მასალას. იქვე მდინარიდან ვიღებთ ღორღს და ვხრეშავთ გზებს. გამოვაცხადეთ ტენდერი მძიმე ტექნიკის მომსახურებაზე და გამარჯვებული არის შ.პ.ს. ბეჟან ჟღენტი, რომელიც ახორციელებს ამ ყველაფერს და შესაბამისი ლიცენზიაც გააჩნია”,_ გვითხრა მერმა და ყურადღება მდინარის კალაპოტის ფორმირებაზეც გაამახვილა.
“მძიმე ტექნიკები ავიყვანეთ ზევით და დავიწყეთ ბახვისწყლის კალაპოტის ფორმირება, რომ ეს მდინარე ერთ კალაპოტში მოგვექცია. კალაპოტს გავუკეთეთ ფორმირება და შემდეგ ნაწილი, რაც იქ საჭირო არ იყო წამოვიღეთ და დახრეშვა დავიწყეთ შიდა გზების, სადაც გაუვალი იყო და მოსახლეობა მოგვმართავდა თხოვნით, რომ რამენაირად გზა გაგვეკეთებინა და გადავწყვიტეთ, რომ ჩვენი დამსვენებლებისთვის და კურორტისთვის უკეთესი გარემო შეგვექმნა“,_ ამბობს შარაშიძე.
რამდენად ვართ დაზღვეულები, რომ მდინარის კალაპოტის ფორმირება შემდგომში უფრო დიდ პრობლემებს არ გამოიწვევს?
ცუდი შედეგები რომ იყო გასულ წლებში და წყალდიდობის დროს წყალი მოსახლეობამდე აღწევდა, ამის გამო გავაკეთეთ კალაპოტის ფორმირება. მანდვე 1 600 000 ლარის ღირებულების პარკი დავამთავრეთ ახლა და პიონერის, უჩხუბის, იგივე ცენტრალური ქუჩის მაცხოვრებლებს პრობლემა რომ არ შექმნოდათ წყალდიდობების გამო, ამიტომ გადავწყვიტეთ კალაპოტის ფორმირება და ამ ფორმირების დროს გავაკეთეთ მეორე საქმე, რომ შიდა გზებზე შევედით.
ცნობისთვის, ჩვენ მერს ვთხოვეთ შესაბამისი დოკუმენტაციის გადმოგზავნა და კონკრეტულად, რა სამუშაოების გახორციელების უფლება აქვს სამუშაოების მწარმოებელ კომპანიას, დოკუმენტაციის მიღების შემთხვევაში შემოგთავაზებთ.
