გუშინ, “ESPN”-ის ჟურნალისტი კატალონიური “ბარსელონას” პრეზიდენტ ჟოან ლაპორტას ესაუბრა, რომელმაც განაცხადა, რომ არ არის გამორიცხული უახლოეს მომავალში გუნდის ხელმძღვანელი ქალი გახდეს _ საუბარია ლაპორტას ამჟამინდელ მოადგილე მარია ელენა ფორტიზე და კლუბის ადმინისტრაციის უფროსს მანანა გიორგაძეზე. “ბარსას” პრეზიდენტის მტკიცებით, ხელმძღვანელის სავარძლის დაკავების ყველაზე მეტი შესაძლებლობა ამ ორი ქალბატონიდან ერთ-ერთს აქვს.
ვინ არის მანანა გიორგაძე? ის ქართველი ბიზნესმენი გიორგი მიქაძის მეუღლეა. გიორგაძე ლაპორტას წინა პრეზიდენტობის დროს მისი მდივანი იყო. იმედია, გიორგაძე “ბარსელონას” მართვის სათავეებში ღირსეულ ადგილს დაიკავებს და მისი სახით ქართველებს საქმე საამაყოდ გვექნება.
ამასობაში გამოცემამ “Deportevalenciano.com” გიორგი მამარდაშვილს ცალკე წერილი მიუძღვნა.
“ლა ლიგა დაიწყო და ყველა პროგნოზის მიუხედავად, ვალენსიას პირველი მეკარე გიორგი მამარდაშვილია. მან უკვე ტრიუმფით ჩაატარა პირველი მატჩი, მაგრამ ის, რაც მოხდა “გრანადასთან” შეხვედრის წინ, ძალზე მნიშვნელოვანია. ეს არის სიგნალი, რომ სწორედ სხვა გოლკიპერებმა უნდა იზრუნოს შემადგენლობაში მოხვედრისთვის და არა ქართველმა. ეს იმას არ ნიშნავს, რომ სილესენს შანსი აღარ აქვს უახლოეს კვირებში სიტუაცია შეცვალოს, მაგრამ ბორდალასის გადაწყვეტილება შორეული გეგმების გამოცხადებაა.
ამასობაში, მამარდაშვილი კარგად თამაშს აგრძელებს და ის იმსახურებს “ვალენსიას” სასტარტოში თამაშს. რა თქმა უნდა, მან უნდა მოუმატოს, გამოსვლებზე თამაშში, ფეხით თამაშში და გუნდელებთან კომუნიკაციაში. როგორც კი ენას შეისწავლის, პროგრესიც აშკარა იქნება”.
ესპანური გამოცემა “Marca”-ს მტკიცებით, მე-3 ტურის წინ, რომელშიც “ვალენსია” ბასკურ “ალავესს” უმასპინძლებს, “ღამურების” სასტარტოში ისევ გიორგი იდგება.
მამარდაშვილი ესპანურ სიმაღლეებს იპყრობს, აი ქართველი “ტყავის ბურთის” ოსტატი ლუკა გადრანი კი ლატვიაში საშვილიშვილოდ შერცხვა. გახსოვთ, ალბათ 2006 წლის მსოფლიო საფეხბურთო პირველობის გადამწყვეტი ორთაბრძოლა და ზიდანი – მატერაცის “ისტორიული დაპირისპირება”.
რაღაც ამდაგვარი გადრანმაც გაიმეორა _ მხოლოდ “ზიდანურის” დუბლირება რომ ყოფილიყო, კიდევ არაფერი, მაგრამ ქართველმა ამის შემდეგ მოწინააღმდეგეს ცხვირიც გაუტეხა.
ლატვიის თასის მეოთხედფინალში ლუკა გადრანის “ვალმიერამ” რიგის “დინამოს” უმასპინძლა და 5:0 დაამარცხა. ზემოთ მოხსენიებული კონფლიქტი კი მატჩის 89-ე წუთზე დაფიქსირდა. გადრანსა და “დინამოს” მცველ ნიკიტა სამსონოვს შორის ინცინდენტი მოხდა.
გადრანი ჯერ “ზიდანისებურად” გაუსწორდა მეტოქეს, რომელმაც მის წინააღმდეგ უხეშად ითამაშა, თამაშის შემდეგ კი გასახდელში ცხვირი გაუტეხა ანდრეი კირილინს, რომელიც ცხვირის ძვლის მოტეხილობით საავადმყოფოში გადაიყვანეს.
რა გახდა 24 წლის ქართველი მცველის გაცხარების მიზეზი? როგორც გადრანმა მოგვიანებით განმარტა, მოედანზე ერთ-ერთი ორთაბრძოლის შემდეგ კირილინმა მას დედა შეაგინა. გადრანს სერიოზული დისკვალიფიკაცია ელის. ის “ვალმიერაში” 2020 წლიდან თამაშობს, მანამდე კი “ცხინვალის”, “რუსთავისა” და ირანული “შაჰინ ბუშეჰრის” ღირსებას იცავდა.
უახლოეს დღეებში კილიან მბაპე “პარი სენ-ჟერმენს” დატოვებს და მადრიდის “რეალს” შეუერთდება. “RMC Sport” იტყობინება, რომ მბაპემ “პსჟ”-ს კონტრაქტის გაგრძელებაზე საბოლოოდ უარი უთხრა, რაც იმას ნიშნავს, რომ ფრანგ ვარსკვლავს პარიზული გრანდის დატოვება სურს და თანაც, ახლავე. საქმე ისაა, რომ მბაპეს “პარი სენ-ჟერმენთან” კონტრაქტი გაისად ეწურება და თუ ახალს ახლავე არ გააფორმებს, ერთ წელიწადში უფასო იქნება.
მბაპეს უარის შემდეგ პარიზული გრანდის ხელმძღვანელებმა მის გაყიდვაზე ფიქრი უკვე სერიოზულად დაიწყეს. “RMC Sport” იმასაც იტყობინება, რომ მბაპეს წასვლის შემთხვევაში, “პსჟ” კრიშტიანო რონალდოს გადაიბირებს და გამორიცხული არ არის, უახლოეს დღეებში მესი და რონალდო თანაგუნდელები გახდნენ!
კიდევ ერთი გავრცელებული ინფორმაციის თანახმად, პარიზში მბაპეს შემცვლელად რიშარლისონსაც განიხილავენ, რომელიც ნეიმარის ახლო მეგობარია და ახლა “ევერტონში” ასპარეზობს.
და ბოლოს ჩოგბურთი. საქართველოს პირველი ჩოგანი ნიკოლოზ ბასილაშვილი უინსტონ-სალემის (აშშ) ტურნირიდან მოიხსნა.
29 წლის ქართველი ჩოგბურთელი რომელსაც ტურნირში ასპარეზობა მეორე წრიდან უნდა დაეწყო და 24 აგვისტოს არგენტინელ ფედერიკო კორიას შეხვედროდა, კორტზე გასვლას ავადმყოფობის გამო ვერ შეძლებს.
[sexy_author_bio]
