გუშინ ცნობილი გახდა, რომ ტოკიოს ოლიმპიური თამაშების გამარჯვებული, ქართველი ძიუდოისტი ლაშა ბექაური პარიზის ოლიმპიადამდე, მომდევნო 3 წლის განმავლობაში კიმონოზე ოქროს არშიით იასპარეზებს, რაც მსოფლიო ძიუდოს სამყაროში დიდ პატივად ითვლება.
ძიუდოს საერთაშორისო ფედერაცია ამ უფლებას მხოლოდ მოქმედ ოლიმპიურ ჩემპიონებს აძლევს, რისი დასტურიც ქართველ ოქროს მედალოსანსაც მიუვიდა.
საქართველოს ნაკრებისა და ბელგიური „გენტის“ ნახევარმცველმა გიორგი ჩაკვეტაძემ ტრავმა მიიღო _ ქართველი ფეხბურთელი კონფერენს ლიგის მე-2 ტურში ფამაგუსტას „ანორთოსისთან“ მატჩის განაცხადში ვერ მოხვდა და როგორც ბელგიელთა მთავარმა მწვრთნელმა ჰეინ ვანჰაეზებრუკმა განაცხადა, მიზეზი სწორედ ტრავმაა.
დაზიანება სერიოზული არ ჩანს და შესაძლოა, ჩაკვეტაძე მოედანს ბელგიის „ჟუპილერ ლიგის“ მომდევნო ტურში, 3 ოქტომბერს დაუბრუნდეს. ეს გამოკვლევის შედეგებზე იქნება დამოკიდებული.
თუმცა, გავრცელდა განსხვავებული მოსაზრებაც _ ბელგიური გამოცემამ „Voetbalprimeur.be“ გუშინ გაავრცელა ინფორმაცია რომ „გენტის“ მწვრთნელმა ჰაინ ვანჰეზებრუკმა გადაწყვიტა, დაასვენოს ქართველი შემტევი, რათა გადატვირთულმა გრაფიკმა ნეგატიურად არ იმოქმედოს ძველი კონდიციების აღდგენის პროცესზე _ ხანგრძლივი პაუზის შემდეგ დაბრუნებულმა ჩაკვეტაძემ დოზირებულად უნდა გაზარდოს დატვირთვებიც და სათამაშო პრაქტიკის ინტენსივობაც. სხვა ბელგიური საიტებიც არაფერს წერენ ტრავმაზე.
გასულ წელს საქართველოს ნაკრების თავდამსხმელი თორნიკე შენგელიამ კარიერა მოსკოვის „ცსკა“-ში გააგრძელა. კალათბურთელის ამ ნაბიჯმა საქართველოში დიდი ვნებათაღელვა გამოიწვია და შენგელია ლამის იყო ერის მოღალატედ გამოაცხადეს. მოთამაშე ღიად გააკრიტიკა საქართველოს პრეზიდენტმა სალომე ზურაბიშვილმაც.
გუშინ ქართველმა რუსულ გამოცემას „Sports.ru“ ინტერვიუ მისცა და „ცსკა“-ში გადასვლის პერიპეტიებიც გაიხსენა.
„ცსკა“ ევროლიგის ერთ-ერთი საუკეთესო კლუბია, თუ საუკეთესო არა. როდესაც ასეთ გუნდში გადასვლის საშუალება გაქვს, უბრალოდ ვერ იტყვი: „არა“. ჩვენ მოლაპარაკებები სამჯერ თუ ოთხჯერ გვქონდა, თუმცა, მხოლოდ მაშინ დავთანხმდი, როდესაც საუკეთესო კლუბში, საუკეთესო თანაგუნდელებთან და საუკეთესო მწვრთნელებთან მუშაობის გარდა, იმის უფლებაც მომცეს, რომ ეროვნულ ნაკრებში მეთამაშა. ამის გამო, „ცსკა“-ს პრეზიდენტ ანდრეი ვატუტინს მადლობას ყოველთვის ვუხდი, როგორც კი, საშუალება მეძლევა. მან შემხვედრი ნაბიჯი გადმოდგა, მითხრა, რომ ხვდებოდა საქართველოს ნაკრებში თამაში როგორ მინდოდა. ეს ნამდვილად მაგარი ჟესტი იყო და მისი მადლიერი ვარ.
საქართველოს პრეზიდენტის განცხადება? ცხადია, ამან ჩემზე გარკვეული ზეგავლენა იქონია, თუმცა, ვერ ვიტყვი, რომ ძალიან დიდი. უბრალოდ, თუკი მას ასე მიაჩნია და სხვებიც ასე ფიქრობენ, მე ვერაფერს გავაკეთებ. ვფიქრობ, რომ ეს გადამეტებული რეაქცია იყო და არასწორი გახლდათ… სხვა საქმეა, რომ მე ვერაფერს ვიზამ. მხოლოდ იმაზე ვარ ფოკუსირებული, რისი კონტროლიც შემიძლია”.
კატალონიურ „ბარსელონას“ კი მძიმე დღეები დაუდგა. თუ ესპანეთის პირველობაზე ასე თუ ისე დამაკმაყოფილებელ შედეგებს აღწევს, ევროპის ჩემპიონთა ლიგაზე უსუსტეს გუნდებს შორის გაერია _ მიუნჰენის „ბაიერნთან“ მარცხს 0:3, ლისაბონის „ბენფიკასთან“ ამავე ანგარიშით წაგება მიაყოლა.
ლისაბონიდან ბარსელონაში დაბრუნების შემდეგ კლუბის პრეზიდენტი ჟოან ლაპორტა და გუნდის წარმომადგენლები შეიკრიბნენ და მწვრთნელის მომავალზე იმსჯელეს. შეხვედრა ადგილობრივი დროით დილის 4 საათამდე გაგრძელდა. შეხვედრას წამყვანი ფეხბურთელებიც ესწრებოდნენ, რათა მათი აზრიც გაეგოთ გუნდში არსებული მდგომარეობის შესახებ. „ბარსელონაში“ რონალდ კუმანის შემცვლელად სამ კანდიდატურას განიხილავენ _ ჩავის, რობერტო მარტინესსა და ანდრეა პირლოს.
ესპანური მასმედიის მტკიცებით, კუმანი მინიმუმ კვირის ბოლომდე გააგრძელებს მუშაობას. 2 ოქტომბერს „ბარსელონა“ მადრიდის „ატლეტიკოს“ ეწვევა, შემდეგ სანაკრებო პაუზა უწევს და შესაძლოა, სწორედ ამ დროს მიიღონ ნიდერლანდელი სპეციალისტის თაობაზე გადაწყვეტილება.
ლაშა ბექაური ოქროს არშიიანი კიმონოთი იასპარეზებს, რონალდ კუმანი „ბარსელონადან“ ასაბარგებლად ჩემოდანს ალაგებს… აი, ქალბატონი დოლორეს ავეირო კი ოჯახში შფოთს თესავს. ვინ არის სენიორა დოლორესი? ვინ არის და კრიშტიანო რონალდოს დედა.
გუშინ ბრიტანულმა გამოცემამ „The Sun“ გაავრცელა ცნობა რომ დოლორეს ავეიროს არ სურს, რომ მისმა შვილმა ჯორჯინა როდრიგესზე იქორწინოს. ვარსკვლავის მშობლის თქმით, არგენტინაში დაბადებულ მოდელს ეკონომიკური ზრახვები ამოძრავებს.
პორტუგალიელი შემტევი საპასუხოდ თავის ამჟამინდელ სატრფოსთან ბედნიერია, სოციალურ ქსელში ხშირად ვხვდებით ერთად გადაღებულ ფოტოებს. წყვილი კი კრიშტიანო ჯუნიორთან, ევასთან, მატეოსთან და ალანასთან ერთად მანჩესტერში ცხოვრობს. ეს უკანასკნელი მათი საერთო შვილია. გავრცელდა ინფორმაცია, რომ მოდელი სპორტსმენისგან ხელის თხოვნას ელოდება, თუმცა, როგორც ჩანს, რონალდოს დედა ამის წინააღმდეგია.
[sexy_author_bio]
