ლანჩხუთის მუნიციპალიტეტის სოფელ ქვიანში, ბერაიების უბანში, გზასთან დაკავშირებული პრობლემა დიდი ხანია აწუხებთ. ამის თაობაზე წლებია, საქმის კურსშია მუნიციპალიტეტის, როგორც საკანონმდებლო, ისე აღმასრულებელი ხელისუფლება, თუმცა, დღემდე მოსახლეობა საბოლოო ვერდიქტის მოლოდინშია _ ეღირსებათ თუ არა გზა, რომელზეც უსაფრთხოდ გადაადგილებას შეძლებენ.
მოსახლეობის თქმით, ქვიანში რუსთაველის ქუჩა მთლიანად სავალალო მდგომარეობაშია, თუმცა, განსაკუთრებით მძიმე მდგომარეობა ქუჩის იმ ნაწილშია, რომელსაც ადგილობრივები ბერაიების უბნად მოიხსენიებენ. მოსახლეობა ამბობს, რომ დახმარების თხოვნით არაერთხელ მიმართეს ადგილობრივი ხელისუფლების ყველა საჭირო ინსტანციას, თუმცა, ყოველ ჯერზე მხოლოდ დაპირებებს იღებენ.
“ყველამ, ვისაც ევალება, კარგად იცის, რა მდგომარეობაა გზასთან დაკავშირებით ამ უბანში, მაგრამ არაფერი შედეგი არ დგას. ამ ბოლოს, არჩევნების წინ მოვიკითხეთ ეს ამბავი და გვითხრეს, პროექტი მზადაა, დაფინანსებას ველოდებითო. არავინ იცის, რეალურად როდისთვის მოაღწევს ჩვენამდე ეს დაფინანსება.
სასწრაფო სამედიცინო დახმარების მანქანა ვერ ამოდის ამ უბანში, ისეთი მძიმე მდგომარეობაა, ოთხი წელია, ატალახებული გვაქვს ყველას გზა და კარი, ვისთვისაც შეიძლებოდა მიგვემართა პრობლემის მოსაგვარებლად, ყველას მივმართეთ, მაგრამ მაინც არაფერი გვეშველა. მოგვარების ნაცვლად მდგომარეობა წლიდან წლამდე უფრო უარესდება, ყოველი გაწვიმებისას მდინარესავით მოედინება ქუჩაზე წყალი”, _ ამბობს მოსახლეობა.
მათივე თქმით, აღნიშნული გზის მონაკვეთი წლების წინ სტიქიის შედეგად დაზიანდა, თუმცა, მიუხედავად იმისა, რომ მუნიციპალიტეტის მასშტაბით არაერთხელ გახორციელდა სტიქიის სალიკვიდაციო სამუშაოები და ამ მხრივ სოლიდური თანხებიც გაიხარჯა, მათი პრობლემის მოგვარებაზე არავის უზრუნია.
“ახლაც, ამ წინასაარჩევნო პერიოდში, ბევრგან გვესმოდა, რომ მუნიციპალიტეტში 2018 წლის სტიქიის თანხების მობილიზება ხდებოდა და მიმდინარეობდა სალიკვიდაციო სამუშაოები, მაგრამ, რატომღაც ჩვენი ქუჩა არ მოხვდა ამ ჩამონათვალში. არადა, სწორედ რომ ძლიერი წვიმისა და სტიქიის შედეგადაა გზა ავარიულ მდგომარეობაში. ძალიან ცუდ დღეში ვარ< აქ ძირითადად ასაკოვანი ადამიანები ცხოვრობენ და ძალიან უჭირთ ფეხით გადაადგილება, მანქანა ვერ ამოდის, დავიღალეთ წლებია ფუჭი დაპირებებით. რაოდენობრივად ბევრი ოჯახი არ ცხოვრობს აქ, ამიტომაც, ეტყობა, არ უღირთ ჩვენთვის თავის შეწუხება -ჩვენთან ხომ ყველაფერი საარჩევნო ხმებს უკავშირდება?!” _ ამბობს მოსახლეობა.
აღსანიშნავია, რომ ქვიანში, ბერაიების უბანში, გზასთან დაკავშირებული პრობლემა ზუსტად ერთი წლის წინ სოფლის მაჟორიტარმა დეპუტატმა ზაზა წულაძემაც გააჟღერა, საკრებულოს ერთ-ერთ სხდომაზე, როცა სტიქიის თანხების განაწილებასთან დაკავშირებით საყვედური გამოთქვა:
“ჩამონათვალი ვნახე, სად რა კეთდება და ნიგოითის თემი არსადაა ნახსენები. ქვიანში, ბერაიების უბანში გზა ისეა დაზიანებული, სასწრაფო სამედიცინო დახმარების მანქანა ვერ აღწევს დანიშნულების ადგილამდე. წლებია, ამაზე ვსაუბრობ. მითხარით, იქნებ, მე ვერ მომაქვს ამბავი და ვერ გაგებინებთ ამ ყველაფერს. თუ ვინმე ისე იღებს გადაწყვეტილებებს, რომ ჩვენ არაფერს გვეკითხება?! მაშინ რაღა საჭიროა დეპუტატი ან წარმომადგენელი სოფელში?!”
მაშინ ზაზა წულაძემ “გურია ნიუსთან” საუბარში დაადასტურა, რომ აღნიშნული პრობლემა დროულად საჭიროებდა მოგვარებას და იმედი გამოთქვა, საკითხი მოკლე ვადებში აუცილებლად მოგვარდებოდა. თუმცა, საკითხით დაინტერესებიდან ერთი წლის შემდეგაც ფაქტად რჩება, რომ ბერაიების უბანში პრობლემა ისევ მოუგვარებელია და მოსახლეობა კვლავაც ხელისუფლების მხრიდან გაცემული დაპირებების იმედადაა.
იმის გასარკვევად, როდისთვის შეასრულებს ადგილობრივი ხელისუფლება ბერაიების უბნის მოსახლეობისთვის მიცემულ პირობას და როდის მოუგვარებს გზის პრობლემას ,”გურია ნიუსი” კვლავ სოფლის მაჟორიტარს დაუკავშირდა _ ზაზა წულაძემ გვითხრა, რომ პროექტი ტენდერზეა უკვე გასული და ბერაიების უბანში გზის სარეაბილიტაციო სამუშაოები ერთი თვის ვადაში დაიწყება.
