13 თებერვალს, ოზურგეთის მუნიციპალიტეტის საკრებულოს ბიუროს სხდომა შედგა, რაც იმით იყო ნიშანდობლივი, რომ უახლოეს რიგგარეშე სხდომისთვის წარედგინათ დამტკიცებული დღის წესრიგი. აღნიშნული დღის წესრიგის მიხედვით მოხდება, როგორც მუნიციპალიტეტის მერიის სამსახურების, ისე ყველა ა(ა)იპ-ების და შპს-ების მიერ, 2019 წელს გაწეული მუშაობის მოსმენა.
საკრებულოს თავმჯდომარემ, დავით დარჩიამ დღის წესრიგის გაცნობის შემდეგ, დეპუტატებს მიმართა:
_ ძალიან სერიოზული საკითხების განხილვის დრო დგება. გთხოვთ, გულდასმით მოუსმინეთ ყველას, გააანალიზეთ ყველაფერი და ვისაც მისათითებელი აქვს, მიუთითეთ, რომ უკეთ იმუშაონ. აქ ყველა ერთად მოვისმინეთ, თუ რა გააკეთეს ერთი წლის მანძილზე ა(ა)იპ-ებმა თუ სხვა სამსახურებმა, _ თქვა მან.
საკრებულოს თავმჯდომარის მოადგილემ, გიორგი ღურჯუმელიძემ განაცხადა, რომ დამატებით ორი საკითხი იყო შემოსული _ ერთი ფორმალური ხასიათის, მეორე კი ოზურგეთის მუნიციპალიტეტის მერიის მიერ საგრანტო კონკურსში მონაწილეობას შეეხებოდა, სადაც გაიმარჯვა და იაპონიის საელჩომ გრანტი გამოყო.
_ განკარგულების პროექტი ეხება ერთი ერთეული მცირეგაბარიტიანი ნაგავმზიდის და ოცი ერთეული სანაგვე ურნის შეძენის მიზნით, იაპონიის საელჩოსგან გამოყოფილ გრანტს, _ თქვა გიორგი ღურჯუმელიძემ.
ბიურომ მიიღო განკარგულება, “იაპონიის საელჩო საქართველოში და ოზურგეთის მუნიციპალიტეტს შორის, გრანტის გადაცემის თაობაზე გასაფორმებელი ხელშეკრულების შეთანხმების შესახებ”, რასაც შემდეგ საკრებულო დაამტკიცებს.
“ოზურგეთის მუნიციპალიტეტის ტერიტორიაზე არსებული სახელმწიფო და ოზურგეთის მუნიციპალიტეტის საკუთრებაში არსებული არასასოფლო-სამეურნეო დანიშნულების მიწის ნაკვეთის ნორმატიული ფასის დადგენის შესახებ” , იურიდიული სამსახურის უფროსმა, ლაშა თავაძემ ისაუბრა. მან თქვა, რომ ამ ნორმატიული აქტის შესახებ მოხდა საჯარო ადმინისტრაციული წარმოება და საკრებულოს რიგგარეშე სხდომაზე დადგენილების მიღებას უნდა ეყაროს კენჭი, რისთვისაც ბიუროს წევრთა მხარდაჭერა ითხოვა.
თავის მხრივ, დეპუტატმა ლავრენტი ბიგვავამ გამოთქვა შენიშვნა, რომ ნორმატიული ფასები წლების მანძილზე მუდმივი სიდიდე არ უნდა იყოს:
_ მაგ სიდიდის რეგულირება თავის დროზე მოვახდინეთ. ვერ ვიტყვი, რომ ეს ღრმა მასშტაბის ცვლილება იყო, თუმცა, არ შეიძლება, წლობით გაგრძელდეს, უნდა მოხდეს ცვლილება, _ თქვა მან.
კამათი მოჰყვა “2020 წლის დამტკიცებულ ბიუჯეტში ცვლილებებისა და დამატებების ასახვის შესახებ” საკითხს, რის შესახებაც საფინანსო სამსახურის წარმომადგენელმა პავლე ჭყონიამ ისაუბრა _ მისი თქმით, შემოსავლების და გადასახდელების ნაწილში ზრდა 7 431 349 ლარით იგეგმება.
ლავრენტი ბიგვავამ თქვა, რომ ბიუჯეტი იყოს მთლიანად წარმოდგენილი და განმარტების სახით ახლდეს, რომელ მუხლში რა ცვლილება შევიდა:
_ სხვა რომ არაფერი, ასეთი “საკანონმდებლო სახით მაცნეს ვებგვერდზეც ჭირს ატვირთვა და იქმნება პრობლემა. ასეთი სახით კი, საკმარისია, ბიუჯეტი დავაბრუნოთ უკან, _ თქვა ბიგვავამ.
_ დავაბრუნოთ, ბატონო. მაქსიმალურად ვეცადეთ, ფორმატის სახით, ბიუჯეტი უკეთესად წარმოდგენილიყო. სხვანაირად არ ხერხდება, _ შეეპასუხა ჭყონია.
კრიტიკას უპასუხა საფინანსო-საბიუჯეტო სამსახურის უფროსმა, გია მამაკაიშვილმაც:
_ მესმის, რომ შენიშვნა სწორია, თუმცა, ტექნიკურად არ ხერხდება ისე, როგორც თქვენ ამბობთ, _ უთხრა მან ბიგვავას.
ბიუროს სხდომაზე, ასევე, საინიციატივო ჯგუფის მიერ ინიცირებული დადგენილების პროექტის შესახებ ისაუბრეს, რომელიც იმ დასახლების საერთო კრების ტიპიური დებულების დამტკიცებას ეხება, რომელშიც რეგისტრირებულ ამომრჩეველთა რაოდენობა ორი ათასს აღემატება. ეს საკითხი არასამთავრობო ორგანიზაციების, საქართველოს დემოკრატიული განვითარების კავშირისა და გურიის ახალგაზრდული რესურსცენტრის წარმომადგნელებმა წარუდგინეს ბიუროს. თავის მხრივ კი, ბიურომ ამ პროექტის შესწავლა იურიდიულ საკითხთა კომისიას დაავალა.
ბიუროს წევრების თქმოთ დასახლებებში საერთო კრებების ამოქმედება დადებითი მოვლენა იქნება.
