„ნაპოლი“ – „მილანის“ ფრედ დასრულებული შეხვედრის შემდეგ, მასმედიასთან პირველი კომენტარი ნეაპოლური კლუბის მთავარმა მწვრთნელმა რუდი გარსიამ გააკეთა.
„ფრე სამართლიანი იყო, რადგან „მილანმა“ პირველ ტაიმში დაიმსახურა მოგება, ჩვენ მეორე ტაიმში. მომეწონა გუნდის რეაქცია და ინტენსივობა. მატჩში დავბრუნდით, გავათანაბრეთ და ცოტა მეტი იღბლით ბოლოს კვარას მომენტში შეგვეძლო მოგვეგო. გვინდოდა მოგება, მაგრამ ვფიქრობ, ფრე სამართლიანია, რადგანაც ძლიერ მეტოქეს ვეთამაშეთ.
მეორე ტაიმში სქემა შეცვალეთ, სიმეონეს სახით თავდამსხმელი გვჭირდებოდა, რადგან რასპადორის ხაზებს შორის კარგად თამაში შეუძლია. გარდა ამისა, ფეხბურთში მხოლოდ 4-3-3 სქემა არ არის. პოლიტანო და კვარა ფლანგებზე კარგები იყვნენ. მატეო ბევრს მუშაობს და მისი თამაშით კმაყოფილი ვარ, მას თავდაჯერება და სტაბილურობა სჭირდებოდა. ის და კვარაცხელია გადამწყვეტი მოთამაშეები არიან, ამიტომაც, თამაშობენ ხშირად. ბიჭებით კმაყოფილი ვარ, მათ აჩვენეს ხასიათი და სიამაყე, რაც ძალიან მომწონს“, – თქვა გარსიამ.
„მილანის“ მთავარი მწვრთნელი სტეფანო პიოლი შედეგით უკმაყოფილო იყო და ფრეს იმედგაცრუება უწოდა.
„ეს თამაშიც რომ წაგვეგო, ძალიან სამწუხარო იქნებოდა. შეცდომა დავუშვით პირველი გოლის გაშვებისას და ბევრი საგოლე მომენტი ვერ გამოვიყენეთ, რის გამოც მხოლოდ ორი გატანილი გოლი ძალიან. სამწუხაროა, რადგან კარგად ვითამაშეთ, მხოლოდ ერთი ქულით წასვლა, იმედგაცრუებაა.
ლეაუ იმიტომ შეცვალე, რომ მოედანზე ენერგიის მქონე ფეხბურთელები მჭირდებოდა. ბოლო ერთ კვირაში მესამე მატჩი იყო და ბიჭები დაიღალნენ. როდესაც ორბურთიანი უპირატესობა გაქვს, თამაში უნდა მოიგო. „ნაპოლის“ ჰქონდა თავისი მომენტები, მაგრამ ჩვენ პასიურები არ ვიყავით. უნდა გავაგრძელოთ მუშაობა და გაუმჯობესება. მწვრთნელების ბედი ყოველთვის კლუბის ხელშია, თუ რამდენიმე წლის წინ მიზანი ოთხეულში შესვლა იყო, ახლა სკუდეტოს მოგებაა. „იუვენტუსი“, „ინტერი“ და „ნაპოლი“ ძლიერები არიან, მაგრამ ახლოს ვართ მათ დონესთან“, – თქვა პიოლიმ.
იტალიურმა მედიამ ხვიჩა კვარაცხელიას თამაში შემდეგნაირად შეაფასა:
Corriere Della Sera 6.5 ქულა: „სპრინტი, ფინტი, გადახვევები: ის „ეშმაკს“ აწუხებს“.
Calciomercato 6 ქულა: „მშვენიერი დუელი კალაბრიასთან. „მილანის“ მცველი მას ძალიან ცოტა სივრცეს უტოვებს, ორმაგი მეურვეობა მუდმივია, მაგრამ ქართველი ხიფათს ხშირად ქმნის. ბოლო წამებში ქაოსი შექმნა და ახლოს იყო გამარჯვების გოლის გატანასთან, მაგრამ მენიომ ეს არ გააკეთებინა“.
Mediaset 6.5 ქულა: „მთელი 90 წუთის განმავლობაში მარცხენა ფლანგიდან უტევდა ჩვეული ხარისხით და არაპროგნოზირებადობით“.
Eurosport 6.5 ქულა: „თავისუფალ სივრცეებში დამანგრეველია. კალაბრია მას თითქმის მთელი მატჩი არ სცილდებოდა, მაგრამ სისწრაფით გავლენა მაინც მოახდინა. მე-60 წუთზე ლამის ანგარიში გაათანაბრა, კომპენსირებულ დროში კი გამარჯვების გოლთან ძალიან იყო“.
Tuttomercatoweb 6 ქულა: „კალაბრიამ შარშანდელივით კარგად გაანეიტრალა, მაგრამ როდესაც ის თავის ტექნიკასთან ერთად სისწრაფეს რთავს, ყოველთვის სასიამოვნო სანახავია“.
Tuttonapoli 6 ქულა: „პოლიტანო 27-ე წუთზე კარის წინ დატოვა. ხშირად უწევდა ორ მეტოქესთან დაპირისპირება და მაინც ცდილობდა რიცხობრივი უპირატესობის შექმნას. ბოლოს ჰქონდა შანსი „სტადიო მარადონა“ აეფეთქებინა, მაგრამ დაქანცულმა კუთხეში ვერ დაარტყა“.
„ნაპოლი“ 18 ქულით სატურნირო ცხრილის მეოთხე პოზიციაზეა და მომდევნო ტურში 4 ნოემბერს „სალერნიტანას“ სტუმრად დაუპირისპირდება.
გუშინ, „აიაქსის“ მთავარ მწვრთნელად 59 წლის ჯონ ვან ტ’სხიპი დაინიშნა. მან ხელშეკრულება 2025 წლის ზაფხულამდე გააფორმა.
ვან ტ’სხიპი ბოლოს საბერძნეთის ნაკრების მთავარი მწვრთნელი იყო, მანამდე კი, „ცვოლეს“, „მელბურნის“ და „ჩივასის“ თავკაცი იყო. ის ძალიან კარგად იცნობს „აიაქსს“, რადგან 1981-1992 წლებში ფეხბურთელის რანგში იცავდა ამსტერდამელთა ღირსებას, შემდეგ სხვადასხვა წლებში ახალგაზრდული გუნდის მთავარი მწვრთნელი და პირველი გუნდის სამწვრთნელო შტაბის წევრი იყო. ასევე, 2004-2008 წლებში ნიდერლანდების ნაკრების მთავარი მწვრთნელის ასისტენტად მუშაობდა.
ვან ტსხიპის დებიუტი 2 ნოემბერს, „ვოლენდამის“ წინააღმდეგ შედგება. „აიაქსს“ აგვისტოს შემდეგ თამაში არ მოუგია და ერედივიზიონში 5 ქულით ბოლო ადგილზეა.
ავტორი
