„თამბაქოს კონტროლის ალიანსი“ პარლამენტის დეპუტატ ისკო დასენს კანონპროექტის ლობირებაში ადანაშაულებს.
საუბარია, „თამბაქოს კონტროლის შესახებ კანონში“ შესატან ცვლილებებზე, რომლის მიხედვით თამბაქოს მოხმარება, დეპუტატების მხარდაჭერის შემთხვევაში, სლოტ კლუბებსა და თეატრებში ნებადართული გახდება.
„თამბაქოს კონტროლის ალიანსის“ ხელმძღვანელის, გიორგი ბახტურიძის განცხადებით, შპს ,,კრისტალბეთის“ დამფუძნებელი პარლამენტის დეპუტატი ისკო დასენია, ხოლო მისი შვილი ,,კრისტალბეთის“ წილის მფლობელი. სწორედ, ამიტომ ბახტურიძე აღნიშნული კანონპროექტის ლობირებას დასენის ოჯახს უკავშირებს.
_ „კრისტალბეთის“ დამფუძნებელი არის ისკო დასენი, ხოლო მისი შვილი არის წილის მფლობელი.
საკანონმდებლო წინადადება რომელმა ორგანიზაციამაც შემოიტანა, მისი დამფუძნებელია „კრისტალბეთი“ და შესაბამისად, ყველაფერი ცნობილი და ნათელია.
იძულებული ვარ, საჯაროდ განვაცხადო, რომ აქ არის ბმა და კავშირი კონკრეტულ ინტერესებს შორის და იმედი მაქვს, პარლამენტი ამ ინტერესებს არ გაატარებს, _ განაცხადა ბახტურიძემ.
,,გურია ნიუსმა“ აღნიშნული ინფორმაცია საჯარო რეესტრში გადაამოწმა და დაადგინა, რომ დეპუტატის ვაჟი ნამდვილად ფლობს შპს ,,კრისტალბეთში“ 22.5 %-იან წლის.
ბრალდებებზე სასაუბროდ დეპუტატ ისკო დასენს მივმართეთ.
დასენი ,,თამბაქოს კონტროლის ალიანსის“ ხელმძღვანელის ბრალდებებს უარყოფს და აღნიშნავს, რომ მისი სახელისა და გვარის ლაფში ამოსვრა უსაფუძვლოდ განიზრახეს.
_ სხვათაშორის, ეს საკითხი დღეს განიხილებოდა დარგობრივ კომიტეტში, რომლის წევრი გახლავართ. მე განვაცხადე, რომ ამ საკითხის განხილვაში მონაწილეობას არ მივიღებ.
ეს არის ტყუილი, ვიღაცამ სპეციალურად ახსენა ჩემი გვარი. არანაირი კავშირი ამ კანონპროექტთან არ მაქვს და ვერც მექნება.
პარლამენტში მარტივად არ ხდება, რომ საკანონმდებლო ორგანოს რიგითმა წევრმა თავისი ინტერესებისა და ბიზნესების დასაცავად კანონპროექტი გაიტანოს. იმ ადამიანებმა, რომლებსაც კავშირი აქვთ პარლამენტთან, ეს ძალიან კარგად იციან“, _ გვითხრა დასენმა.
_ ბატონო ისკო, “თამბაქოს კონტროლის ალიანსში” აცხადებენ, რომ თქვენ ბრძანდებით „კრისტალბეთის“ დამფუძნებელი.
საჯარო რეესტრის ამონაწერიდან ირკვევა, რომ თქვენი შვილი კნიაზ დასენი შსპ „კრისტალბეთის“ 22.5 %-იანი წილის მფლობელია, სწორედ ამიტომ ჩნდება კანონპროექტის ლობირების ნიშნები, რა პასუხი გაქვთ აღნიშნულზე?
_ მე როგორ ვიქნები კრისტალბეთის დამფუძნებელი, პარლამენტის წევრი ვარ. ჩემი შვილი არის 40 წლის და 20 წლიდან ცალკე ცხოვრობს, მე რა შუაში ვარ?
აბსოლუტური სიცრუეა, ამას აქვს ერთი მიზანი, რომ ჩემი სახელი და ჯგუფი, ვისთან ერთადაც ვარ, ცუდად წარმოაჩინონ. მერწმუნეთ, ეს არის სიმართლე“, _ გვითხრა დასენმა.
დაუჭერს თუ არა პარლამენტი მხარს აღნიშნულ ინიციატივას, ჯერჯერობით, უცნობია. ამ ეტაპზე ცნობილია, რომ სადავო კანონპროექტმა დეპუტატებს შორის მწვავე დაპირისპირება გამოიწვია.
