მამა თომას სახელობის ფონდის ინიციატივითა და ადგილობრივი თვითმმართველობის მხარდაჭერით, 22 ნოემბერს, ჩოხატაურის ხელოვნების სასახლეში ტარიელ ხარხელაურის შემოქმედებითი საღამო გაიმართა.
ჩოხატაურს პოეტი მეუღლესთან, მარინა ხარხელაურთან და პოეტ გიზო თავაძესთან ერთად ესტუმრა.
ღონისძიებაში, ჩოხატაურის ყოვლადწმიდა ღვთისმშობლის სახელობის სკოლის მოსწავლეები, მუსიკალური სკოლის მოსწავლეები და ანსამბლი “ნართი” მონაწილეობდნენ.
ჩოხატაურის საკრებულოს თავმჯდომარემ, ირაკლი კუჭავამ პოეტს სპეციალურად მისთვის შეკერილი გურული ყაბალახი გადასცა საჩუქრად.
“ჩოხატაურს ეწვია პოეზიის ხევისბერი ტარიელ ხარხელაური. მთელი ჩოხატაური მოიცვა და გააერთიანა ტარიელ ხარხელაურის, ამ უდიდესი პოეტის პოეზიისადმი სიყვარულმა და ამ ღონისძიებით ბატონ ტარიელს გვინდა მადლობა გადავუხადოთ ამ შემოქმედებისათვის და იმისთვის, რომ პოეზიისადმი სიყვარული გადაგვირჩინა”, _ თქვა “გურია ნიუსთან” საუბრისას ღონისძიების ორგანიზატორმა, ჩოხატაურის ყოვლადწმიდა ღვთისმშობლის სახელობის სამრევლო სკოლის მასწავლებელმა ნანა მგალობლიშვილმა.
პოეტმა დიდი მადლობა გადაუხადა ჩოხატაურელებს გულთბილი მასპინძლობისა და სიყვარულისთვის.
„ცხოვრების მანძლზე არის განსაკუთრებული დღეები, მაგარამ ეს დღე იყო სრულიად განსხვავებული. ჩოხატაურელებმა დაგვიმტკიცეს, რომ თუ შენ გულწრფელად ემსახურები პოეზიას, მისი თაყვანისმცემლები გულწრფელ სიყვარულს არ იშურებენ.
მე არ შემიძლია არ აღვნიშნო, რაოდენ ლამაზად წაიკითხეს ჩემი ლექსები ჩვენმა ბავშვებმა. მართლაც ჩემში და აქ მოწვეულ სტუმრებში დიდი ემოციები გამოიწვიეს და იმდენად გრძნობით და ემოციით კითხულობდნენ ლექსებს, ჟრუანტელი მივლიდა ტანში. ყველას დიდი მადლობა ჩემი და ჩემი მეუღლის ტკივილის გაზიარებისთვის. ჩვენ ამ ტკივილმა გაგვაძლიერა და მოგვცა სტიმული, რომ არ დავნებდეთ.
ქედს ვიხრი თითოეული ჩოხატაურელის წინაშე და მადლობას ვიხდი იმ სიყვარულისთვის, რომლითაც ასე მანებივრებენ, _ თქვა პოეტმა.
ავტორი: მარიამ ცენტერაძე
