დღეს, ქალაქ ოზურგეთში, არასამთავრობო ორგანიზაცია “საქართველოს ახალგაზრდა იურისტთა ასოციაციის ოზურგეთის ოფისისა“ და “ეკოს“ ინიციატივით და ორგანიზებით, მედიის წარმომადგენლებისთვის პრესკონფერენცია გაიმართა.
შეხვედრაზე “ეკოს“ დამფუძნებელმა ირმა გორდელაძემ წარადგინა ექსპერტთა ჯგუფი, რომლებიც, მისი თქმით, სწავლობენ “ბახვი 1“ ჰესის დოკუმენტაციას, რომლის განმახორციელებელი კომპანიაა შპს “სი-სი-ი-ეიჩ ჰაიდრო VI (და ასევე,“ნატანები 3“-ის დოკუმენტაციას, რომლის განმახორციელებელი კომპანიაა შპს „უნივერსალ ენერჯი ქორფორეიშნი“); ასევე, ადგილს, სადაც უნდა დაიწყოს მშენებლობა. ექსპერტთა ჯგუფში შედიან ეკოლოგები: მარიამ არჩვაძე, ვაკო თევდორაძე, მარიამ ხვედელიძე.
გორდელაძის შეფასებით, პროექტი ხარვეზითაა შედგენილი და მათი ამ სახით გახორციელების შემთხვევაში, უარყოფით გავლენას იქონიებს კლიმატსა და ბიომრავალფეროვნებაზე. მისივე შეფასებით, დაზიანდება ბახმაროს უნიკალური ეკოსისტემა, რადგან ჰესის მშენებლობა სწორედ კურორტის მოსაზღვრე ტერიტორიაზე იგეგმება.
“ორი თვის განმავლობაში შევისწავლეთ “ბახვი 1“ ჰესის სკოპინგის დოკუმენტაცია… მთავარი ხარვეზი, ამ შემთხვევაში, არის წყლის ხარჯის საკითხი. კომპანია აპირებს მდინარეში დატოვოს წყლის ხარჯის 12-13%-ს, რაც, ჩვენი აზრით, არასაკმარისია იქ არსებული ბიომრავალფეროვნების არსებობისთვის და იქაური ჰაბიტატების ასე ვთქვათ სასიცოცხლო ფუნქციების უზრუნველსაყოფად. “ბახვი1“ ჰესის მშენებლობასთან დაკავშირებით, ასევე მნიშვნელოვანია, რომ მშენებლობა დაგეგმილია რეკრეაციულ ზონაში; მართალია, მშენებარე კომპანია ამტკიცებს, რომ ეს მშენებლობა იგეგმება ბახმაროს საზღვრებს გარეთ“, _ თქვა ჟურნალისტებთან შეხვედრაზე ეკოლოგმა მარიამ არჩვაძემ.
არასამთავრობო სექტორის მიერ მოწვეული ექსპერტები პოტენციურ საფრთხეებზე საუბრობენ და აუცილებლობად მიაჩნიათ, გარემოზე ზემოქმედების შესწავლის ეტაპზე, პროექტს სპეციალისტების მიერ მომზადებული ჩაღრმავებული კვლევები დაერთოს.
მოწვეული ექსპერტი ვაკო თევდორაძე ამბობს, რომ მათი ფუნქცია ჰესის აშენება-არაშენებაზე დასკვნის გაკეთება კი არა, არსებულ ანგარიშებში ხარვეზების გამოვლენაა: “წარმოდგენილი იყო ანგარიშები და ამ ანგარიშებში ხარვეზები წარმოვადგინეთ“. შეხვედრაზე ასევე ითქვა, რომ უკვე მომზადებულია 36 –შენიშვნიანი დოკუმენტი, რომელიც უკვე საქართველოს გარემოს დაცვისა და სოფლის მეურნეობის სამინისტროშია. ეს დოკუმენტაცია ეხება “ბახვი 1“ ჰესის დაგეგმილ მშენებლობას“.
დღეს, ბრიფინგზე “ბახვი 1“ ჰესთან დაკავშირებით გაჟღერებული თემების შესახებ “გურია ნიუსთან“ კომენტირებისას, “ბახვი 1 ჰესის“ გარემოსდაცვითი, სოციალური საკითხების და მმართველობის მენეჯერი დავით მიქელაძე ამბობს: “მოგეხსენებათ, “ბახვი 1 ჰესი“ არის მდინარე ბახვისწყალზე არსებული მცირე ჰიდრო ელექტრო სადგური 12 მეგავატი დადგმული საპროექტო სიმძლავრით, რომელიც იმყოფება კვლევის საწყის ეტაპზე. ჩვენი მიზანია, რომ საქართველოში ჩვენ მიერ ინიცირებული მცირე ჰესების პროექტირება და მშენებლობა გახორციელდეს მსოფლიოს წამყვანი ქვეყნების პრაქტიკაში არსებული სტანდარტებით. გვინდა ხაზი გავუსვათ, რომ ვართ მუდმივი დიალოგის რეჟიმში ყველა დაინტერესებულ ჯგუფთან, მათ შორის, ადგილობრივ გარემოსდამცველებთან და არასამთავრობო ორგანიზაციებთან. ამა წლის 5 მაისიდან ვახორციელებთ შეხვედრებს გურიის მუნიციპალიტეტებში ჩოხატაურსა და ოზურგეთში. შესაბამისად, დღეს გაჟღერებული არც ერთი კითხვა არ ყოფილა ჩვენთვის ახალი _ არაერთგზის გვიმსჯელია და გაგვიცია დეტალური პასუხი დაინტერესებული მხარეებისთვის ამ საკითხებზე. მზად ვართ, გავაგრძელოთ იგივე შესაბამისი დაინტერესების შემთხვევაშიც. ხაზგასმით ვამბობთ, რომ პროექტი ბახმაროს რეკრეაციული ზონის გარეთ არის დაგეგმილი. პროექტმა, ასევე განიცადა ცვლილება, რის შედეგადაც სარკის ზედაპირი იქნება გაცილებით მცირე, ვიდრე გაჟღერდა წინასწარი შესწავლის დროს. ბიომრავალფეროვნების კვლევებში ჩაერთო საერთაშორისო კომპანია SLR –ი; 18 ივნისს, პირველადი შედეგების შესახებ პრეზენტაცია უკვე ჰქონდა ბრიტანელ ექსპერტს ადგილობრივ არასამთავრობო ორგანიზაციებთან ოზურგეთში. ვგეგმავთ, რომ კლიმატის კვლევა განვახორციელოთ ფრანგი ექსპერტი პიერ ბიდერმანის ჩართულობით. ხოლო რაც შეეხება მდინარეში დატოვებულ წყლის პროცენტს, გაჟღერებული 12% –ი არ ასახავს რეალობას _ ჩვენი გათვლებით, მდინარეში რჩება მინიმუმ 29%-ი. შესაბამისად, ჩვენი შეთავაზებაა, შევქმნათ ერთობლივი სამუშაო ჯგუფი, ვიწვევთ რა ყველა დაინტერესებულ და კვალიფიციურ მსურველს ამ ჯგუფში სამუშაოდ, მათ შორის “ეკოს“, ექსპერტების გუნდსაც და ვთავაზობთ, რომ შევიმუშავოთ ერთობლივი პროექტი, რომელიც შექმნის ერთობლივი მუშაობის ახალ პრეცედენტს, რაც, პირველ რიგში, იქნება მომგებიანი რეგიონისათვის, რეგიონში მცხოვრები ადამიანებისთვის, ჩვენი ქვეყნისთვის“.
ავტორი: გიორგი გირკელიძე
