ახლახან, ოზურგეთის მუნიციპალიტეტის მერობის დამოუკიდებელმა კანდიდატმა, კონსტანტინე შარაშენიძემ ჟურნალისტებისთვის ბრიფინგი გამართა.
მან თავის გამოსვლა დაიწყო ოზურგეთელებისადმი მიმართვით და ხალხს, ამომრჩევლებს შესთავაზა ახალი მართვის მოდელის, „სამოქალაქო მთავრობის “ შექმნა. ასევე, დებატებში გამოიწვია ავთანდილ და არჩილ თალაკვაძეები.
„პარტია„ ქართული ოცნების“ კანდიდატი და მისი გარემოცვა, მიუღებელი და დამამცირებელი მეთოდებით ცდილობს ამომრჩევლის ნების შეცვლას. ხდება ამომრჩევლის დევნა, მოსყიდვა, შანტაჟი და მისი გამარჯვების შემთხვევაში, ოზურგეთში ჩვენ ვიღებთ კლანურ მმართველობას! ამიტომ აღმასრულებელი და წარმომადგენლობითი რგოლის ეფექტიანად მართვის მიზნით, გთავაზობთ, შევქმნათ ახალი მართვის მოდელი _ „სამოქალაქო მთავრობა“. ამ მიზნით კი მოვუწოდებ და თანამშრომლობის ხელს ვუწვდი უკლებლივ ყველა პრაგმატულად მოაზროვნე ადამიანს, პროდასავლურ ოპოზიციურ პარტიებს, სამოქალაქო აქტივისტებს, უბრალო მოქალაქეებს და მეურნეებს, ვისაც ოზურგეთი უყვარს“, _ თქვა მან.
მეორე საკითხი, რასაც შარაშენიძემ ხაზი გაუსვა, იყო დებატების გამართვა.
„რა პრობლემაა? ორივე მოვიდეს დებატებში და გამცენ პასუხი ოზურგეთელების წინაშე, რომ მე, თითქოს, ოთხი წელი არაფერი გამიკეთებია“.
„გურია ნიუსი“ „ქართული ოცნების“ მერობის კანდიდატის, ავთანდილ თალაკვაძის შტაბს დაუკავშირდა. პრესსამსახურში ასეთი კომენტარი გააკეთეს:
_ საუბარი ზეწოლაზე, დაშინებასა და მოსყიდვაზე სიყალბეა. თუ ასეთი ფაქტები აქვს, შარაშენიძეს შეუძლია, მიმართოს შესაბამის სტრუქტურებს. რაც შეეხება დებატებს, ამაზე უარით ვპასუხობთ“, – თქვეს პრესსამსახურში.
[sexy_author_bio]
