ესპანეთის „ლა ლიგის“ მორიგ ტურში გიორგი მამარდაშვილის „ვალენსიამ“ მადრიდის „რეალს“ უმასპინძლა და უძლიერესი მეტოქე ქართველი მეკარის დამსახურებით დაამარცხა – 1:0.
მამარდაშვილი ტრადიციულად დამაჯერებელი იყო, განსაკუთრებით შეხვედრის დასკვნით ნაწილში. საინტერესოა რომ თამაშს მსაჯმა 10 წუთი დაამატა და მთავარი პერიპეტიები ამ დროს დაფიქსირდა.
ქართველმა კარის დარაჯმა 91-ე წუთზე ვალვერდეს სასწაული ბურთი აუღო, 93-ე წუთზე მას კიდევ ერთი შესანიშნავი სეივი ჰქონდა როდესაც კროოსის ჯარიმიდან დარტყმული ბურთი მოიგერია.
მატჩის მიწურულს გაწევ-გამოწევა ვინისიუს ჟუნიორსა და მამარდაშვილს შორის მოხდა, ამ დროს ბრაზილიელმა „ვალენსიას“ ფეხბურთელს ხელი სახეში გაარტყა და წითელი ბარათიც დაიმსახურა. გიორგიმ ბოლო წამებზე კიდევ ერთი ბურთი მოიგერია, ერთი ერთზე ბენზემა გავიდა და ამჯერადაც, ქართველი გამოსვლაზე უშეცდომო იყო. მამარდაშვილი მატჩის საუკეთესო მოთამაშედ დაასახელეს.
გიორგის ესპანური მედიისგან კარგი შეფასებები ერგო. „Eldesmarque“-მ 10-დან 10 ქულა დაუწერა, „Superdeporte“-მ კი – 9.
გუშინ, გამოცემამ „The Athletic“ გაავრცელა ინფორმაცია, რომ მამარდაშვილის დამატება „ტოტენჰემსა“ და „ასტონ ვილას“ სურთ. მისი გადაბირებით ასევე „ვილიარეალი“, მადრიდის „ატლეტიკო“ და „პორტუც“ არიან დაინტერესებულები. გიორგი „ვალენსიას“ სეზონის ბოლოს აუცილებლად დატოვებს და ახალ გუნდში გადავა.
ხვიჩა კვარაცხელიას „ნაპოლიმ“ საკუთარ მინდორზე მილანის „ინტერი“ დაამარცხა – 3:1. ქართველი შემტევი (83 წუთი ითამაშა) მთელი მატჩის განმავლობაში აქტიური გახლდათ.
ერთ მომენტში, ჯოვანი სიმეონეს გოლი არ ჩაუთვალეს, რომელიც არგენტინელმა ხვიჩა კვარაცხელიას პასით გაიტანა. კვარამ მას ცარიელ კარში გაატანინა, მაგრამ მსაჯმა შეტევის დასაწყისში პიოტრ ჟიელინსკის მხრიდან თამაშის წესების დარღვევა დააფიქსირა და გოლი არ ჩათვალა.
ხვიჩამ ორჯერ დაარტყა კარში, მაგრამ ორჯერვე „ინტერის“ კარის დარაჯმა ანდრე ონანამ აჯობა.
იტალიურმა მედიამ ქართველის თამაში მაღალი ქულებით შეაფასა.
Tuttonapoli 7 ქულა: “სამი მეტოქე ელოდება, როგორც ყოველთვის ბოლო პერიოდში, მაგრამ მუდამ ახერხებს გულშემატკივრების აღტაცებას. ონანამ გოლი წაართვა, მაგრამ სასარგებლოა თამაშის განვითარებაში და ანგისას გოლშიც მონაწილეობდა”.
Calciomercato 6.5 ქულა: “ინტერის დაცვისთვის უწყვეტი თავსატეხია და მიუხედავად ორმაგი მეურვეობისა, ხშირად ახერხებს ხიფათის შექმნას”.
Mediaset 6.5 ქულა: “ბელანოვა მუდმივად ყურადღებას აქცევს, მაგრამ “ნერაძურის” დაცვას როგორც წესი, იოლად უმკლავდება. მეორე ტაიმში, მიუხედავად დ’ამბროზიოს გაორმაგებისა, ქართველი თავის საქმეს აკეთებდა და მხოლოდ ონანამ შეუშალა ხელი გოლის გატანაში”.
Tuttomercatoweb 6.5 ქულა: “მარცხენა ფლანგზე ცდილობს ისე ითამაშოს, როგორც იცის, პირველ ტაიმში გაუჭირდა, მაგრამ მეორე ტაიმში ლურჯი მაისურით მოთამაშე ფეხბურთელებს შორის ყველაზე სახიფათოთა რიგებში იყო”.
გუშინ, „ვალენსიას“ ფეხბურთელმა ედინსონ კავანიმ, რომელიც თავის დროზე ნეაპოლურ გუნდში სამი სეზონი ასპარეზობდა ტელეკომპანიას „DAZN“ ინტერვიუ მისცა და „ნაპოლისა“ და ხვიჩა კვარაცხელიას შესახებ ისაუბრა:
„ნაპოლის“ ჩემპიონობა დიდებული მომენტი იყო, ყველა გაგიჟდა, რადგან ეს მაშინ ხდება, როცა ამდენს იბრძვი და გამარჯვებას შეჩვეული არ ხარ. გულშემატკივრებს ძალიან სჭირდებოდათ ასეთი კარგი ემოცია. ჩემი კარიერის ყველა წელი ფანტასტიკური იყო, მაგრამ ნეაპოლში გატარებული წლები კულტურის მხრივ განსაკუთრებული გახლდათ. მე უფრო ისეთი სტილის გუნდების ფეხბურთელი ვარ, რომლებსაც დიდებთან ბრძოლა უწევთ, უფრო მომწონდა ჩრდილოეთის გუნდებთან დაპირისპირება. ნაპოლიში ბევრი ტიტული ვერ მოვიგე, მაგრამ ლამაზი მომენტები გავიარე, თუნდაც დიდი ხნის შემდეგ იტალიის თასის მოგება.
ნეაპოლში დიდი ხანია არ დავბრუნებულვარ, მაგრამ ერთ დღეს აუცილებლად დავბრუნდები. ჩემი ორივე ვაჟი „ნაპოლის“ ფანები არიან. როცა „ნაპოლი“ ვერ იგებს, გიჟდებიან. ისინი დაიბადნენ და გაიზარდნენ ნეაპოლში, ქალაქში, რომელმაც მეც ბევრი რამ მომცა. ასე რომ, სწორია, „ნაპოლის“ რომ გულშემატკივრობენ. ჩემი შვილების კუმირები? ისინი ბევრს საუბრობენ კვარაცხელიასა და ოსიმენზე. სასიამოვნოა, რომ მათ ასეთი კუმირები ჰყავთ“.
ლუჩანო სპალეტის ნაპოლიდან წასვლა პრაქტიკულად გადაწყვეტილია და დროის ამბავია.
რასაკვირველია აქტუალურია საკითხი, თუ ვინ შეცვლის 64 წლის სპეციალისტს. გუშინ „RAI“-ის ჟურნალისტმა ჩირო ვენერატომ განაცხადა, რომ აურელიო დე ლაურენტისმა ახალი მწვრთნელი უკვე აირჩია – ჯან პიერო გასპერინი.
„დე ლაურენტისმა როგორც ჩანს, ახალ მწვრთნელად ჯან პიერო გასპერინი აირჩია – ორწლიანი კონტრაქტი და 4 მილიონი ევრო სეზონში. მომდევნო სეზონიდან გუნდის სათამაშო სქემა 3-4-3 იქნება. ბერგამოში კი გასპერინის ივან იურიჩი შეცვლის“, – განაცხადა ჩირო ვენერატომ.
იტალიური გამოცემები მაინც აგრძელებენ სხვა ვარიანტების დასახელებასაც. დაიწერა, რომ ფავორიტი რაფაელ ბენიტესია, რომელთანაც თურმე დე ლაურენტისს კონტაქტი უკვე ჰქონია. ასევე ახსენეს იულიან ნაგელსმანი, ვინჩენცო იტალიანო, ანტონიო კონტე, მაქს ალეგრი, სერჟიო კონსეისაო და თვით დიეგო სიმეონეც კი.
აღსანიშნავია ის, რომ გასპერინის ნეაპოლელ ფანებთან წარსულში არაერთი ინციდენტი გადახდა თავს. ზემოხსენებული ინფორმაციის გაჟღერების შემდეგ კი ნაპოლის ტიფოზები უკმაყოფილებას გამოხატავენ, რადგან გასპერინის საყვარელ გუნდში ხილვა არ სურთ.
ჯან პიერო გასპერინი 2014 წლიდან ბერგამოს „ატალანტაში“ მუშაობს და ძალიან წარმატებითაც. მანამდე მან სახელი „ჯენოაში“ გაითქვა, რომელიც ჯერ „სერია A“-ში დააბრუნა, მერე კი უეფას თასზე (დღევანდელი ევროპალიგა) გაიყვანა.
ავტორი
