დიდი დრო არ გასულა მას შემდეგ, რაც მაგისტრალებზე სიჩქარის შემნელებელი, ხელოვნური ბარიერები გაკეთდა სახელმწიფოს მიერ. რაც უნდა უცნაურად მოგვეჩვენოს, გადამეტებული სიჩქარის აღსაკვეთად გადადგმულ ნაბიჯს, ზოგი უარყოფითად შეხვდა. არაერთგან აღებასაც ითხოვდნენ.
დღეისთვის, ოზურგეთის არაერთ სოფელში მეტად უცნაური ფაქტის შემსწრე ვხდებით. მოსახლეობის წარმომადგენლები, სოფლის მოასფალტებულ გზებზე, ცენტრალურ სივრცეში თუ ცალკეულ უბნებში, საკუთარი გადაწყვეტილებით, აკეთებენ ე.წ. ბუგორებს. ასხამენ ცემენტის ზოლს. ზოგან წყვეტილების სახით, ზოგან კი მთლიან ზოლს ავლებენ. თან მონაკვეთების დაშორება, შესაძლოა, ას მეტრზე ნაკლებიც იყოს.
_ თუ ყოველ ას მეტრში „ბუგორი“ უნდა გავჭიმოთ, რა საჭირო იყო ასფალტი? რა წესია ეს, რეგულაციის გარეშე, ვის აქვს უფლება, როგორც მოეპრიანება, ისე მოზილოს ცემენტი და აკეთოს ჯებირი? თავის, თუ მეზობლის ეზოსთან, ასფალტზე საკუთარი გადაწყვეტილებით, ერთპიროვნულად რატომ უნდა დაადგინოს ბარიერი? ბარიერების თვითნებულად კეთება ,ერთგვარი ლინჩის წესია. ლამის „დომინოს პრინციპი“ ამოქმედდა და ბევრგან აკეთებენ. სოფლებისთვის ეს მალე აქტიურად გადამდები გახდება. უმჯობესი იქნება, საპატრულო პოლიცია ხშირად შევიდეს სოფლების გზებზე და გააკონტროლოს, დააჯარიმოს მაღალი სიჩქარით მოსიარულე მძღოლები, _ ამბობენ გაბრაზებული ადამიანები, რომლებიც ოზურგეთის სოფლებში ცხოვრობენ.
ჩვენ გადავიღეთ სოფლების _ ოზურგეთის, დვაბზუს, გურიანთის შიდა მოასფალტებული გზები და ვნახეთ, თუ როგორ პრიმიტიულად და საფრთხის შემცველადაა გაკეთებული გზებზე ბარიერები.
პრობლემის ირგვლივ, ოზურგეთის მუნიციპალიტეტის მერიის ზედამხედველობის სამსახურის უფროსს, მიხეილ შილაკაძეს ვესაუბრეთ:
_ ასეთი ქმედება სამართალდარღვევას წარმოადგენს. არაერთხელ აღვკვეთეთ. თუმცა, სოფელში არავინ აღიარა, ვინ გააკეთა ეს და იდენტიფიცირება ვერ მოვახდინეთ. წესით, ეს სკოლებთან უნდა იყოს. ხოლო სხვაგან, სავალ ნაწილზე თუ გაკეთდება, ეს უნდა მოხდეს საკრებულოს გადაწყვეტილების თანახმად. ამის შემდეგ კი დაიდგას საგზაო ნიშანი. წინააღმდეგ შემთხვევაში, ეს არის კანონდარღვევა. ჩვენ სასწრაფოდ გავატარებთ ღონისძიებას და დავშლით ასეთ ბარიერებს, თუკი ასეთი ფაქტი გამოვლინდება, _ გვითხრა მიხეილ შილაკაძემ.
„გურია ნიუსი“ კვლავ შემოივლის ოზურგეთის მუნიციპალიტეტის სოფლების შიდა გზებს და მკითხველს მივაწვდით ინფორმაციას, გატარდა თუ არა ღონისძიება ასეთ სახიფათო, უკანონო ქმედებებზე.
[sexy_author_bio]
