ოზურგეთის მუნიციპალიტეტის სოფელ ციხისფერდში (გურიანთის თემი) მდინარე სკურდუმზე კომუნისტების დროს აშენებულ ხიდს, გასულ ზაფხულს საძირკველი გამოეცალა და ორივე მხარეს ნაწილობრივ ჩაინგრა.
უბანი, სადაც 15-მდე ოჯახი ცხოვრობს, ამ ხიდით უკავშირდებოდა ცენტრალურ გზას. ბავშვებიც სკოლაში ამ გზით გადაჰყავდათ.
უფრო თვალნათლივ რომ წარმოვიდგინოთ, სოფელ ციხისფერდის სკოლა, ოზურგეთი-ურეკის გზატკეცილის მარჯვენა მხარეს მდებარეობს. მარცხნივ კი, გზას, პარალელურად რკინიგზის ლიანდაგი მიუყვება. ლიანდაგს იქით მდინარე სკურდუმზე, რომელიც გზას კვეთს და მდინარე ნატანებისკენ მიედინება, ხიდია დანგრეული. უფრო სწორად, ორივე მხარეს საძირკვლების ნაწილი აქვს ჩანგრეული.
აქ ამბობენ, რომ ხიდი კომუნისტების დროს, საუკეთესო პროექტით იყო აგებული. გასულ ზაფხულს კი, მოულოდნელად, საძირკვლები გამოეშალა. დარწმუნებით საუბრობენ, რომ ეს მდინარე სკურდუმის კალაპოტის ერთბაშად დაწევამ გამოიწვია, რასაც კარიერებიდან განუსაზღვრელი რაოდენობის ქვა-ღორღის გატანას უკავშირებენ.
ადგილობრივები, რომლებიც ხიდს გაღმა, ყოფილი ჩაის ფაბრიკის ბინებში ცხოვრობენ, შეშფოთებული საუბრობენ.
_ საცალფეხო ბილიკი გავაკეთეთ ჩაქცეულ კიდესთან. ბავშვებს აქ ვხვდებით, სკოლიდან რომ მოდიან. იქითაც ვაცილებთ. გვპირდებიან გაკეთებას და საშველი არ დადგა, _ გვეუბნებიან აქ მცხოვრებლები: მამია მამუდიანი, გურამ აბაშიძე, ნაზი დიდიძე, მაყვალა აბაშიძე და სხვები.
_ ორი შვილიშვილი დადის სკოლაში. ვერასდროს ვუშვებ მარტო. აქ დიდს შეეშინდება გავლა. ხომ ხედავთ? დილით გადავიყვანთ. შუადღეზე აქ, ხიდის კიდესთან ვხვდებით. საცალფეხო გზის გასაკეთებლად ვიწვალეთ, ძლივს მოვახერხეთ, _ გვეუბნება ადგილობრივი ნაზი დოლიძე, _ აქ მეტი გზა არ არის. ან უკან უნდა დაბრუნდე და სამი კილომეტრი მანძილი შემოიარო და ისე გადახვიდე ტრასაზე, ან აქ უნდა იხტუნო. მოკლედ, გურიანთის ცენტრში უნდა ახვიდე, შემოიარო და ასე მოცლილივით უნდა იხეტიალო.
აქ მცხოვრები მაყვალა აბაშიძე ამბობს, რომ გზის მოხრეშვას, რომელიც, ასევე, უვარგისია და ხიდის გაკეთებას გუბერნატორის მოადგილე დაპირდათ:
_ დაგვპირდა გუბერნიის წარმომადგენელი. მოადგილესთან მივიტანეთ განცხადება. გვითხრა, გავაკეთებთ, ოღონდ ჯერ სამხარაულის ექსპერტიზის ბიუროშია გაგზავნილი მონაცემები, ექსპერტიზა უნდა ჩაუტარდესო. სადაა ეს სამხარაული? სანამ უნდა ვუცადოთ? არჩევნებზე რომ მოდიან, იმდენჯერ რომ ისე მოვიდნენ, ამბავი იკითხონ და დაგვეხმარონ, რა გაგვიჭირდება?!
_ აქედან არც ისე შორს, სადაც სკურდუმი მდინარე ნატანებს უერთდება, უზარმაზარი კარიერია. ფსკერი გამოუღეს კალაპოტს. გადახედეთ, მდინარის ნაპირი მინდვრების გასწვრივ მდებარეობდა. ახლა რა სიღრმეზეა ჩავარდნილი. ამიტომ გამოვარდა საძირკველი ამ ხიდსაც, თორემ კომუნისტების დროს აშენებულია, აქამდე არ დანგრეულა. ამ პატარა მდინარე სკურდუმის კალაპოტიც დაიწია. იქ, კარიერზე არის ხიდი. ახლახან, წყალდიდობისას დაინგრა. მძიმე ტვირთმზიდები ხრეშს ეზიდებიან ავტობანისკენ. უცებ გააკეთეს. აქ კი, ვითომც არაფერი. მოიტანეს მიწა, ტალახი და უზარმაზარი გროვები დაყარეს ორივე მხარეს. “შუქნიშანია”, “ახალი” სახეობა გამოიგონეს, რომ მანქანა არ გავიდეს. რას ჰგავს, ხედავთ? ხიდის ორივე მხარეს ტალახის, მიწის ზვინებია. ესაა მაგათი დახმარება, _ ირონიულად ამბობენ ადგილობრივები, _ ახლა იტყვიან, კარიერზე ინვესტორმა გააკეთა ხიდიო და ჩვენ ჯერ გვაცალეთ, არ ვიცით, როდის გავაკეთებთ, ექსპერტიზას ველოდებითო… ის კარიერი ამ სოფლის არაა, ღამითაც რომ არ ჩერდებიან და მუშაობენ? მოსწრებაზე რომ არიან? ღმუიან მთელი ღამე. ქვასატეხი არ ჩერდება, ტვირთმზიდები არ ჩერდებიან… ძილი მაინც არ ეკიდებათ, ნეტავ? დიდი საშოვარია, ეტყობა… ეს ხიდი მაინც გააკეთონ, რომ ეზიდებიან და ქვესკნელში ჩაიტანეს მდინარის კალაპოტი. ჩვენია ეს მდინარეც, ხეობაც და ტერიტორიაც. გადახედეთ “რუსის გორადან”, არის აქ ერთი ზეგანი ამ სახელწოდებით.
აღნიშნული უბნის მცხოვრებლები განსაკუთრებით იმის გამო ბრაზობენ, რომ მათ მუდამ ეუბნებიან, უკანონოდ ცხოვრობთ ამ ბინებში და ნუ ყვირითო: _ ამაზე უკეთესი თუ გაგვაჩნია რაიმე, აქ რატომ მოვიდოდით? _ ამბობენ ისინი.
აღნიშნული უბნის მცხოვრებლები, ასევე, ითხოვენ გზის ორკილომეტრიანი მონაკვეთის გაკეთებას, რომელიც სოფელ გურიანთის ცენტრიდან შემოდის აღნიშნულ დასახლებაში.
_ ხრეშის დაყრა გვინდა. რამდენჯერ ვთხოვეთ. დაგვპირდნენ. მანქანა რომ ვერ შემოდის წესიერად, იქ ცხოვრება შეიძლება? გვიჭირს, ხომ? ჭირვეულ ხალხს ხედავთ აქ თუ გაჭირვებულს? სულ რომ გვატყუებენ, რაც აუცილებლად გასაკეთებელია, ის გაგვიკეთონ. ნუ დაგვამადლიან ერთჯერად დახმარებას, რაც, ძირითადად, საკვები პროდუქტია. ესეც ხომ ძალიან გაჭირვებულს უნდა, _ ამბობს გურამ აბაშიძე.
ჩვენ მართლაც გადავედით ტყე-ტყე და “რუსის გორიდან” გადავხედეთ სოფელ მერიისა და გურიანთის ტერიტორიაზე არსებულ კარიერს, მდინარე ნატანების ხეობაში. კარიერზე არსებული მდგომარეობა ცალკე თემაა, თუმცა, კარგად ჩანს ხიდი, რომელზეც შეუჩერებლად გადადიან მძიმე ტვირთმზიდები. როგორც ადგილობრივები ამბობენ, აღნიშნული ხიდი, წყალდიდობისას სკურდუმმა დაანგრია. თუმცა, სასწრაფოდ აღადგინეს. სამართლიანია მათი მოთხოვნა, როცა ამბობენ, ტვირთმზიდი, ხრეშით სავსე რომ უპრობლემოდ გადადის, ისეთი ხიდი არ გვინდა, ჩვენ რომ ვიმოძრაოთ, ისეთი გაგვიკეთონო.
“გურია ნიუსი” ოზურგეთის მუნიციპალიტეტის მერის წარმომადგენელს, სოფელ გურიანთაში, გია ფასიეშვილს ესაუბრა:
_ ეს ბინები კერძო საკუთრება არ არის _ აქ ყველა საიდანღაცაა მოსული და თვითნებურად არიან შესახლებული. ყველას სადღაც აქვს თავისი სახლი…
_ ამაზე უარესი პირობები სად შეიძლება იყოს?! აქ რატომ უნდა იცხოვროს ადამიანმა, თუ არ უჭირს?
_ აქ ორი ადამიანი ხვარბეთიდან გადმოსახლდა. ძროხები ჰყავთ. გადმოიყვანეს აქ, რადგან საბალახოებია. ამიტომ ცხოვრობენ.
_ აქ სხვებიც ცხოვრობენ, ბავშვები ჰყავთ. იმ მიზეზით, რომ მათი კერძო საკუთრება არაა, ნიშნი უნდა მოვუგოთ? ასეთი ბევრი გვყავს, სხვათა შორის…
_ მესმის. ნიშნს არ ვუგებ. უბრალოდ, ის ხიდი ვერ აღდგება _ უნდა დაინგრეს და გაკეთდეს უფრო პატარა. ამას სჭირდება ტენდერი, ექსპერტიზა უნდა ჩატარდეს.
_ როდის მოხდება ეს?
_ დაზუსტებულ დროს ვერ გეტყვით. კონკრეტული თარიღი არ ვიცი და ხომ ვერ მოგატყუებთ?
_ სწორედ ამას ამბობენ ისინიც. გვპირდებიან და გვატყუებენო.
_ ჩვენ მათ სულ ვეხმარებით. ჭაბურღილი დავუდგით. გარე განათება გავუკეთეთ. ასევე, დავდგით ნაგვის ურნა.
_ ისინი ყველაზე მთავარს, გზის და ხიდის გაკეთებას ითხოვენ.
_ ხიდის შესახებ გითხარით. გზას რაც შეეხება, ეს გზა რომ გაკეთდეს, გურიანთის ცენტრთან, რკინიგზის ლიანდაგი უნდა გადმოკვეთოს. ამას კი ვერ გავაკეთებთ, რკინიგზის დეპარტამენტის ნებართვა თუ არ იქნა. ასე ადვილი არაა.
_ მიწის გორები დაგვიყარეს, “შუქნიშნების” ახალი სახეობა გამოიგონესო, ირონიულად ამბობენ…
_ აბა, გადავარდეს ვინმე უფსკრულში? გვერდზე წითელი ლენტები შევაბი, რომ დაენახათ. ვეცდებით, მალე მოგვარდეს ეს პრობლემა და შეგატყობინებთ, _ გვითხრა ფასიეშვილმა.
ავტორი
