22 ივლისს ბახმაროში “მთის დღეები” ტარდება.
როგორც გავრცელებულ ინფორმაციაშია ნათქვამი, 22 ივლისს ღონისძიებები, რომლის ორგანიზატორიც საქართველოს მთავრობაა, 14 საათზე დაიწყება და საღამოს 22 საათამდე გაგრძელდება.
ამ დროის განმავლობაში ბახმაროში ასულ ადამიანებს სხვადასხვა გასართობი, კულტურული, სპორტული ღონისძიებები დახვდებათ.
“14:00-20:00 საათამდე _ ადგილობრივი მეწარმეების პროდუქციის გამოფენა- გაყიდვა, 14:00–17:00 საათამდე _ ფლორისტების მასტერკლასი, 14:00–14:30 _ ტრიო “აპრილია”, 15:30–16:00_ ტრადიციული დოღი, 16:00–20:00 საათამდე _ ახალგაზრდული სპორტული თამაშები: ორდროშობანა, ქვესტ თამაში, ჯენგა, მძიმე თოკები, ბალანსი, მაგიდის ჩოგბურთი, ბადმინტონი, 16:30-17:30 _ ცნობილი მზარეულების _ ესმა კუნჭულიასა და ავთო ცეცხლაძის მასტერკლასი/ კერძების დეგუსტაცია, 19:00–19:30 _ დაჯილდოების ცერემონია “მთის დღეები 2023:, 19:30–20:30 _ ჯგუფი “ბანი”, 20:30–21:30 _ ჯგუფი “რეგიონი”, 21:30-22:00 _ სიმღერა კოცონთან”, _ წერია ბახმაროზე დაგეგმილ ღონისძიებებთან დაკავშირებით გავრცელებულ ანონსში.
22 ივლისს ტრადიციული დოღის გამართვა, ხომ არ ნიშნავს იმას რომ დოღი 19 აგვისტოს, ფერისცვალების დღეს აღარ ჩატარდება? ამის გასარკვევად ჩოხატაურის მუნიციპალიტეტის მერის მოადგილეს, მინდია ჟღერიას ვესაუბრეთ.
როგორც ჟღერია ჩვენთან საუბრის დროს ამბობს, 22 ივლისს ცხენებთან დაკავშირებით პატარა პერფორმანსი ჩატარდება, თუმცა დოღს, რომელიც ტრადიციულად 19 აგვისტოს ტარდება, ისევ 19 აგვისტოს, ფერისცვალების დღესასწაულზე ვიხილავთ.
“დოღი, რომელიც ტრადიციულად 19 აგვისტოს, ფერისცვალება დღეს, ბახმაროში წყაროს წყალი ბახმაროს, ნაბეღლავისა და ჩოხატაურის მუნიციპალიტეტის ორგანიზებით ტარდება, წელსაც 19 აგვისტოს ჩატარდება. არანაირი ცვლილება დაგეგმილი არ არის.
რაც შეეხება 22 ივლისს, “მთის დღეების” ფარგლებში დოღის გამართვას, იქნება პერფორმანსი ცხენების მონაწილეობით და არ იქნება ისეთი დოღი, როგორიც ჩვეულებრივად, ტარდება”, _ გვითხრა მინდია ჟღერიამ.
მერის მოადგილემ აღნიშნა, რომ “მთის დღეების” ფარგლებში დაგეგმილი ღონისძიებების ძირითადი შემადგენელი ნაწილი იქნება ადგილობრივი მეწარმეების ნაკეთობები და მათი პროდუქცია, სხვადასხვა მასტერკლასები და საკონცერტო ნომრები.
ჩვენს კითხვაზე, თუ რა ღონისძიებები იგეგმება 19 აგვისტოს ბახმაროში, მინდია ჟღერია ამბობს, რომ მიმდინარეობს პროგრამაზე მუშაობა.
“მიმდინარეობს ღონისძიებების დაზუსტება. იქნება კონცერტიც, თუმცა, ძირითადი ღონისძიება მაინც იქნება დოღი”, _ გვითხრა ჟღერიამ.
ავტორი
