„ჩოხატაურში 15 ადამიანია თვითიზოლაციაში, ხოლო კარანტინში 1 ადამიანი იმყოფება“, _ ამის შესახებ ინფორმაცია „გურია ნიუსს“ გურიის საზოგადოებრივი ჯანდაცვის ცენტრის დირექტორმა არჩილ მჟავიამ მოაწოდა.
როგორც “გურია ნიუსს” ბათუმის საკარანტინო ზონიდან შეატყობინეს, ბათუმში სასტუმრო “სპუტნიკში” ამ დროისთვის 3 ადამიანი იმყოფება. ამავე ინფორმაციით, 1 ჩოხატაურელი საირმის საკარანტინო ზონაშია დაბინავებული, 2-იც ბათუმის სხვა სასტუმროში.
კითხვაზე, რატომ არ ფლობენ ინფორმაციას ჩოხატაურისა და გურიის ჯანდაცვის ცენტრის ხელმძღვანელები ამ პიროვნებების შესახებ, მჟავია გვპასუხობს, რომ მასთან ინფორმაცია სასაზღვრო ზოლიდან არ მიდის.
„მე ვერ გადავამოწმებ. ეს ინფორმაცია ჩემამდე სასაზღვრო ზოლიდან არ მოდის. გურიაში რომ გვქონდეს საკარანტინო ზონა, მეცოდინებოდა,“_ გვითხრა მჟავიამ.
რაც შეეხება ჩოხატაურის საზოგადოებრივი ჯანდაცვის ცენტრის დირექტორს, როგორც ნატო ჯიბუტი ჩვენთან საუბარში ამბობს, კარანტინში ჩოხატაურიდან 1 ადამიანი იმყოფება.
შეკითხვაზე _ შესაძლებელია თუ არა რომ აღნიშნული პიროვნებები, რომლებიც ჩვენ გვწერენ და მათ შესახებ ინფორმაციის დამალვაში გვადანაშაულებენ, კარანტინში სასაზღვრო ზოლიდან ისე მოხვედრილიყვნენ, რომ ადგილობრივ უწყებას ამის შესახებ ინფორმაცია არ ჰქონოდა, _ ჯიბუტი ამბობს, რომ შეუძლებელია.
“კარანტინში გადავაგზავნეთ ერთი. ჩემი გვერდის ავლით კარანტინში ვერ მოხვდებოდნენ. ეს არის ჩემი კომენტარი, რაც სიმართლეს შეესაბამება, იმას გეუბნებით, იქედან რას გწერენ, მე არ ვიცი“_ ამბობს ჯიბუტი.
