გუშინ უკრაინის ნაკრებისა და ინგლისური „ვესტ ჰემის“ ნახევარმცველმა ანდრეი იარმოლენკომ რუსეთის ეროვნული გუნდის ფეხბურთელებს მიმართა.
„მე ანდრეი იარმოლენკო უკრაინის ნაკრების ფეხბურთელი ვარ. დავიბადე სანკტ-პეტერბურგში, მაგრამ გავიზარდე უკრაინაში და თავს უკრაინელად მივიჩნევ. შეკითხვა მაქვს რუსეთის ნაკრების მოთამაშეებთან: „ბიჭებო, რას სხედხართ ჩასვრილებივით და არაფერს ამბობთ? ჩემს ქვეყანაში კლავენ ადამიანებს, ჩვენს ცოლებს, დედებსა და ბავშვებს. მაგრამ თქვენ ხმას არ იღებთ, კომენტარს არაფერზე აკეთებთ. თქვით, რა მოგივათ იმისთვის, თუკი ერთად დადგებით და აჩვენებთ ხალხს, რა ხდება ჩვენს ქვეყანაში? ბევრთან ნაცნობობაც მაქვს და თქვენ ყველა მეუბნებოდით, რომ ასე არ უნდა ხდებოდეს, რომ თქვენი პრეზიდენტი არასწორად იქცევა. ბიჭებო, თქვენ გაქვთ გავლენა ხალხზე. გთხოვთ, აჩვენეთ, რა შეგიძლიათ”.
საინტერესოა რომ იარმოლენკომ უკრაინის არმიის დახმარების ფონდში ასი ათასი დოლარი გადარიცხა.
რუსს ფეხბურთელებს დაუპირისპირდა ინგლისური „ევერტონის“ უკრაინელი მცველი ვიტალი მიკოლენკო. მან რუსეთის ნაკრების ყოფილ კაპიტანს, არტიომ ძიუბას შემდეგი არაკორექტული ფორმით მიმართა.
„სანამ შენ, ჩუმად ხარ, არტიომ ძიუბა და შენი ჩასვრილი ფეხბურთელუკები, უკრაინაში მშვიდობიან მოსახლეობას ხოცავენ. გულწრფელად მიხარია, თქვენ ვერასოდეს ეღირსებით პატიებას, „პეტუხებო“. თუ რუსეთის ნაკრების მოთამაშეებმა იარმოლენკოს არ უპასუხეს, არტიომ ძიუბა უფრო ენაწყლიანი აღმოჩნდა.
„პასუხი ამ „ევერტონელ“ შვილიკოს. ძალიან ბევრს ლაპარაკობს თავისთან ინგლისში. მათ მხოლოდ ლაპარაკი შეუძლიათ“.
გუშინ ცნობილმა უკრაინელმა ძიუდოისტმა დარია ბილოდიდმა სოციალურ ქსელში ემოციური პოსტი გამოაქვეყნა:
„რამდენიმე დღეში ყველაფერი შეიცვალა. ჩემი ქვეყნის ტერიტორიას თავს დაესხნენ რუსული ჯარები. ისინი ბომბავენ ქვეყანასა და ხოცავენ ხალხს. მათ წამართვეს სახლი და ჩემი საყვარელი კიევი. ხალხი ბომბებს თავშესაფრებსა და მეტროებში ემალება, იქ ქალები მშობიარობენ. საზღვრებთან მშიერმა უსახლკაროებმა არ იციან, სად გაიქცნენ საკუთარი თავისა და შვილების გადასარჩენად. ვიმსახურებთ ამას?! არაადამიანები ხართ! ჩვენ ამას არასდროს გაპატიებთ, თქვენ და თქვენი შვილები ამ სირცხვილით იცხოვრებთ! მთელ მსოფლიოს ეზიზღებით!
მაგრამ უკრაინელი ხალხი ერთიანია! ჩვენ ვართ ერთად და ერთმანეთისთვის ვიქნებით ბოლომდე! მინდა უდიდესი მადლობა გადავუხადო უკრაინის შეიარაღებულ ძალებს, მადლობა, რომ გვიცავთ! იბრძვით ბოლომდე, ჩვენი სიცოცხლისა და დამოუკიდებლობის დაცვისთვის! თქვენ გმირები ხართ! არ დავნებდებით! დიდება უკრაინას!“.
თორნიკე შენგელიას აწ უკვე ყოფილი კლუბი „ცსკა“ ზედიზედ მეექვსე კალათბურთელმა დატოვა – გუნდი ამერიკელმა დენიელ ჰეკეტმაც მიატოვა. „ცსკა“ თავდაპირველად საქართველოს ნაკრების კაპიტანმა დატოვა. შემდეგ მას შეუერთდნენ: იფე ლიუნდბერგი, მარიუს გრიგონისი, იოჰანეს ფოიტმანი და ჯოელ ბოლომბოი. წასულების ნაცვლად „ცსკა“-მ სარეზერვო გუნდიდან ექვსი კალათბურთელი დააწინაურა, ყველა ადგილობრივი.
სამწუხაროდ გუშინ დადასტურდა რომ უკრაინაში მიმდინარე საომარი დაპირისპირებისას ორი ახალგაზრდა უკრაინელი ფეხბურთელი დაიღუპა. ინფორმაცია ფეხბურთელთა საერთაშორისო გაერთიანებამ გაავრცელა.
კიევის დაცვისას დაიღუპნენ 21 წლის მეკარე ვიტალი საპილო (ლვივის „კარპატი“) და 25 წლის დმიტრო მარტინენკო, რომელიც ბოლოს „გოსტომელში“ ასპარეზობდა. საპილო უკრაინის დედაქალაქის დაცვისას, ტანკის მეთაური იყო. მარტინენკო დედასთან ერთად სახლში იმყოფებოდა – ისინი რუსულ დაბომბვას ვერ გადაურჩნენ.
ომი დაუნდობელია. გუშინ მას კიდევ ერთი ახალგაზრდა უკრაინელი სპორტსმენი შეეწირა. ბიატლონისტი ევგენი მალიშევი ხარკოვთან ბრძოლის დროს დაიღუპა. 19 წლის სპორტსმენი, რომელიც უკრაინის შეიარაღებულ ძალებში კონტრაქტით მსახურობდა, მშობლიურ ქალაქს იცავდა.
ინფორმაცია უკრაინის ბიატლონის ფედერაციამ გაავრცელა. ევგენი მალიშევი უკრაინის იუნიორთა ნაკრების ყოფილი წევრი იყო. ხარკოველ სპორტსმენს 20 წელი 10 მარტს შეუსრულდებოდა.
[sexy_author_bio]
