გუშინ “ერთიანი ნაციონალური მოძრაობის” თავმჯდომარემ, ნიკა მელიამ გადაცემა “რეაქციაში” თქვა, რომ გურიის მაჟორიტარმა დეპუტატმა ვასილ ჩიგოგიძემ მას ექვსჯერ დაურეკა და შეპირდა, რომ მისთვის სადეპუტატო უფლებამოსილების შეწყვეტას მხარს არ დაუჭერდა; თუმცა, ასე არ მოხდა და “ჩიგოგიძემ ღილაკი კინაღამ ჩატეხა, ისე დააჭირა ხელი“.
გარდა ამისა, მელიამ ისიც თქვა, რომ ჩიგოგიძეს 2020 წლის საპარლამენტო არჩევნებზე „ნაციონალური მოძრაობიდან“ უნდა ეყარა კენჭი, მაგრამ, როგორც მელიამ თქვა, ჩიგოგიძემ „დრუზა თავი და “ოცნებიდან” იყარა კენჭი.”
“ჩიგოგიძე “ნაციონალური მოძრაობიდან” აპირებდა კენჭისყრას, მას მე გავუწიე რეკომენდაცია პარტიაშიც, ჩამოვართვით ერთმანეთს ხელი, საარჩევნო კამპანია უნდა დაეწყო და… დრუზა თავი და “ოცნებიდან” იყარა კენჭი”, _ თქვა ნიკა მელიამ.
მელიამ ისიც დასძინა, რომ ჩიგოგიძე მაშინ გაიცნო, როცა „ქართუ ბანკის“ გაკოტრების საქმეზე დაკითხვაზე ერთად იმყოფებოდნენ.
ამ ყველაფერზე „გურია ნიუსი“ კომენტარისთვის ვასილ ჩიგოგიძეს დაუკავშირდა, რომელმაც მელიას ნათქვამს აბსურდი უწოდა: „აბსურდია ამაზე საუბარი“, _ გვითხრა დეპუტატმა.
_ ბატონო ვასილ, ჩვენი ინფორმაციით, წინასაარჩევნოდ თქვენ კონსულტაციები გქონდათ აგრეთვე პოლიტიკურ გაერთიანება „ლელოსთანაც“, სადაც განიხილებოდა თქვენი კანდიდატურა მაჟორიტარად იმ შემთხვევაში, თუ ძველი საარჩევნო სისტემა დარჩებოდა და გურიას ისევ ორი მაჟორიტარი ეყოლებოდა. თქვენ, ამ შემთხვევაში, ჩოხატაური-ლანჩხუთის საარჩევნო ოლქი უნდა წარმოგედგინათ. ბატონო ვასილ, ამაზე რა იტყვით?
_ აბსურდია! რა, სამივე მუნიციპალიტეტის რომ ვყოფილიყავი, შემეშინდებოდა?!
_ თავის დროზე, ბანკი „ქართუს“ გაკოტრების საქმეში თქვენ ერთ-ერთ მთავარი ფიგურანტი იყავით და როგორც მელია ამბობს, სწორედ მაშინ გაგიცნოთ, როცა პროკურატურაში დაკითხვაზე იმყოფებოდით ერთად…
_ რა მთავარი ფიგურანტი?! ადეიშვილი ვარ მე?! შეკითხვებს მისვამთ, რაც არ იცით იმ საქმეზე!
მკითხველს შევახსენებთ, რომ ბანკი “ქართუს“ გაკოტრების საქმეზე “გურია ნიუსს“ არაერთი პუბლიკაცია აქვს მომზადებული და დეტალურად აქვს შესწავლილი მაშინდელი მმართველი პარტიის და ხელისუფლების მიერ, ბიზნესის დატერორების უამრავი ფაქტი.
ბიზნესმენები, რომლებიც “ნაციონალებს” “ქართუ ბანკის” წინააღმდეგ გაურიგდნენ
“ჩვენ შეგვითანხმდა, თუმცა, “დრუზა” თავი და “ოცნებიდან” იყარა კენჭი” _ მელია ჩიგოგიძეზე
