ჭაჭიეთიდან კოვიდკლინიკაში გადაყვანილ პიროვნებას რამდენიმე დღეში გაწერენ. მას კოვიდინფექცია მსუბუქ ფორმებში აქვს. ამის შესახებ „გურია ნიუსს“ ჩოხატაურის მერის წარმომადგენელმა ხიდისთავში, ზურა მათითაიშვილმა სატელეფონო საუბრისას განუცხადა.
როგორც მათითაიშვილმა გვითხრა, თვითონაც სახლში, იზოლაციაში იმყოფება.
„იოლ ფორმებში აქვს დაავადება. კლინიკიდან 1-2 დღეში გასწერენ. რაც შეეხება იზოლაციაში მყოფ ხალხს, მათ შორის მეც, ჯერჯერობით არაფერი აგვეღნიშნება.
მე მერმა გუშინ მითხრა, რომ იმდენ ხალხთან გქონდა შეხება, ერთი კვირით იზოლაციაში იყავიო. სახლში ვარ. ტესტი ჯერ არ ჩამტარებია, რადგან ტესტი ტარდება მხოლოდ იმ შემთხვევაში თუ კოვიდ 19-ის რამე სიმპტომი გამოვლინდა.
მთელი ხიდისთავის და ჭაჭიეთის სოფელი გაფრთხილებულია, რომ თავი შეიკავონ გარეთ გასვლისგან. ჩამოსულ ახალგაზდას მთელ ახალგაზრდობასთან ჰქონდა კონტაქტი და იზოლაციაშია მთელი ახალგაზრდობა. სხედან სახლში, მაგრამ აუცილებლობის შემთხვევაში გარეთ მაინც გადიან“,_ გვითხრა მათითაიშვილმა.
ცნობისთვის, როგორც „გურია ნიუსს“ შეატყობინეს, აღნიშნული პიროვნება სოფელში თბილისიდან ხმის მისაცემად ჩამოვიდა.
ის საუბნო საარჩევნო კომისიის ერთ-ერთი წევრის ახლობელია და მასთან ახლო კონტაქტში იმყოფებოდა, კონტაქტი ჰქონდა უბანში მყოფ სხვა პირებთანაც და ახალგაზრდებთან.
„მოვიდა, საარჩევნო უბანზე. ხმის მიცემისას პირბადე ეკეთა, მაგრამ გარეთ რომ გამოვიდა მოიხსნა და ყველა გადაგვკოცნა. ცოტა ხანში თბილისიდან დარეკეს და შევიტყვეთ, რომ კორონავირუსით ინფიცირებულია“,_ ამბობენ სოფელში.
მომხდარის გამო საუბნო კომისიის თავმჯდომარე შეშფოთებას გამოთქვამს. თუმცა, ამბობს, რომ ხმის მიცემა ცესკოსა და ჯანდაცვის უწყების მიერ შემუშავებული წესების სრული დაცვით მიმდინარეობდა, რის გამოც ვირუსის გავრცელების საფრთხე საარჩევნო უბანზე ნაკლებად არის.
სულ ჩოხატაურის მუნიციპალიტეტში ინფიცირების 93 შემთხვევაა გამოვლენილი.
ამავე თემაზე:
“ველოდებით პასუხს”- ჭაჭიეთის მაცხოვრებლების ნაწილი იზოლაციაშია
