პარტია “ევროპული საქართველოს” ჩოხატაურის რაიონული ორგანიზაციის ინფორმაციით, ჩოხატაურის მუნიციპალიტეტმა 2023 წელს მერის სამუშაო ოთახის გარემონტებაში 27 328 ლარი გადაიხადა. მუნიციპალიტეტმა ტენდერი 2023 წლის მარტში გამოაცხადა და ოთხი მონაწილე კომპანიიდან გამარჯვებულად “შპს როიალ პალასი” გამოავლინა.
სატენდერო დოკუმენტების მიხედვით, მუნიციპალიტეტმა 27 328 ლარი გადაიხადა: ლამინირებული პარკეტის იატაკის მოწყობაში, შეკიდული ჭერის თაბაშირ მუყაოს ფილებით გაკეთებაში, ფანჯრის რაფისა და ფარდა-ჟალუზის მოწყობაში, ასევე, დამონტაჟდა გათბობის პანელური რადიატორი, განხორციელდა ელ. სისტემის გამართვა და შტეფსელის მონტაჟი.
არსებული ინფორმაცია შეესაბამება თუ არა სიმართლეს – ამის გასარკვევად ჩოხატაურის მერს დავით შარაშიძეს გავესაუბრეთ.
მერი ადასტურებს, რომ კაბინეტის გარემონტება 27 328 ლარი დაუჯდა და აღნიშნავს, რომ რემონტი კაბინეტს 20 წელია არ ჩატარებია.
“დიახ, სიმართლეა, ოთახს, ბოლოს რემონტი 2003 წელს ჩაუტარდა, მას შემდეგ 20 წელი გავიდა, ოთახის რემონტი არ არის მერის პრიორიტეტი, ეს იმისთვის არის, რომ როდესაც სტუმარი ჩამოვა ჩოხატაურში შესაბამის ნორმალურ გარემოში უნდა მოხდეს მისი მიღება და მინიმუმ იატაკში ფეხი არ უნდა უვარდებოდეს, ეს ჩვეულებრივი ამბავია, რემონტი მუნიციპალიტეტის მერიას რჩება და მინიმუმ ადამიანი როცა შემოვა მერიაში, ჩოხატაურელებიც კი, ნორმალურ სამუშაო გარემოში უნდა იგრძნონ თავი, ეს მერიაა, ჩოხატაურის უმაღლესი ორგანო და არა ფარდული”,_ ამბობს შარაშიძე.
როგორც მერი აღნიშნავს, მერიის შენობაში ეტაპობრივად სხვა შენობების გარემონტებაც აპირებენ.
“ჩვენ სხვა ოთახების რეაბილიტაციასაც ვაპირებთ ეტაპობრივად. მინდა შეგახსენოთ, რომ ამ თანხით არამხოლოდ მერის მისაღებ ოთახს, დამხმარე ოთახსაც ჩაუტარდა მცირედი რეაბილიტაცია, თანხის გამოყოფა მოხდა ადგილობრივი ბიუჯეტიდან, გამოიცვალა ჭერი კედლები, იატაკი, სრული რეაბილიტაცია ჩაუტარდა ოთახს, ასევე მისაღებ და დამხმარე ოთახში მოიხვეწა იატაკი,“_ გვითხრა მერმა.
ავტორი
