26 მაისი საქართველო დამოუკიდებლობის დღეა. “გურია ნიუსის” ინფორმაციით, წელს ჩოხატაურში საქართველოს დამოუკიდებლობის დღე მასშტაბურად აღინიშნება.
ჩოხატაურის მუნიციპალიტეტის მერმა დავით შარაშიძემ “გურია ნიუსს” განუცხადა, რომ სხვადასხვა ღონისძიებების გარდა, წელს პირველად “საპატიო ჩოხატაურელს” გამოავლენენ:
“მასშტაბურ ღონისძიებას ვგეგმავთ. ის ტრადიციული აქტივობები, რაც აქამდე ტარდებოდა, დოღი და სხვადასხვა სპორტული აქტივობები, კვლავ ჩატარდება. ასევე, კულტურის სამსახურის და ა(ა)იპ-ის ორგანიზებით გაიმართება ღონისძიება და მოეწყობა ფლეშმობი ხელოვნების სასახლის ეზოში.
ასევე, მიმდინარე წელს გვინდა, საფუძველი ჩავუყაროთ საპატიო ჩოხატაურელის გამოვლენას. პირველად წელს გამოვავლენთ და შემდეგ ყოველწლიურად გამოვლინდება საპატიო ჩოხატაურელი. ეს არის გამოძახილი იმ უძველესი ტრადიციიდან, რომელსაც ერისკაცობა ერქვა”, _ ამბობს შარაშიძე.
ინფორმაციისთვის, უმნიშვნელოვანესი დღესასწაული 1918 წლიდან იღებს სათავეს, რაც რუსეთის ბურჟუაზიულ რევოლუციას იმპერიის დაშლა მოჰყვა. 1918 წლის 26 მაისს საქართველოს ეროვნულმა საბჭომ მიიღო სახელმწიფოებრივი დამოუკიდებლობის აქტი და ჩამოაყალიბა დამოუკიდებელი საქართველოს მთავრობა. სახელმწიფოს პოლიტიკური მმართველობის ფორმად აღიარეს დემოკრატიული რესპუბლიკა; შეიქმნა ევროპული ტიპის ქართული სახელმწიფოებრიობა, დემოკრატიული სისტემა.
საქართველოს დამოუკიდებლობას იმთავითვე მტრულად შეხვდა ბოლშევიკური რეჟიმი, რომლის მიზანს წარმოადგენდა რუსეთის ყოფილი იმპერიის აღდგენა.
1921 წელს საქართველოში წითელი არმია შემოიჭრა და ქვეყნის ანექსია მოახდინა. საქართველოს მთავრობა და დამფუძნებელი კრების უმრავლესობა ემიგრაციაში წავიდა. ქვეყანაში დიქტატორული რეჟიმი დამყარდა. საქართველო 70 წელი ელოდა თავისუფლების ხელმეორედ მოპოვებას.
1991 წლის 31 მარტის საყოველთაო რეფერენდუმის შედეგად, მოსახლეობის ერთსულოვანი გადაწყვეტილებით, ქვეყანამ დამოუკიდებელი რესპუბლიკის სტატუსი დაიბრუნა. 1991 წლის 9 აპრილს ძალაში შევიდა საქართველოს სახელმწიფოებრივი დამოუკიდებლობის აღდგენის აქტი.
1991 წლიდან მოყოლებული, 26 მაისს საქართველო დამოუკიდებლობის დღეს აღნიშნავს.
ავტორი
