“2021 წლის მუნიციპალური არჩევნები, ვფიქრობ, შორს არის იმისგან, რასაც ქვია მართლაც თავისუფალი არჩევნები.“ – თქვა “გურია ნიუსთან“ საუბრის დროს “საქართველოსთვის“ და ოზურგეთის მუნიციპალიტეტის საკრებულოს წევრმა, ალეკო ბურჭულაძემ.
“მიუხედავად ამისა, ჩვენმა პარტიამ მოიპოვა მოსახლეობის მხარდაჭერა და წარმოდგენილები ვართ საქართველოს ყველა რეგიონში ადგილობრივ დონეზე და მეტიც, რამდენიმე მუნიციპალიტეტში ჩვენ მოვიპოვეთ გადამწყვეტი ხმები. ჩვენ ზუსტად ვაცნობიერებთ იმ მოცემულობას, თუ რატომ დაგვიჭრა მხარი, ოთხი თვის შექმნილ პარტიას, ამდენმა ადამიანმა: საზოგადოება ელოდება, რომ ჩვენ ვიმოქმედებთ ყოველთვის სახელმწიფოს, მოქალაქის ინტერესებიდან გამომდინარე. და სახელმწიფო ინსტიტუტებს მაქსიმალურად გამოვიყენებთ იმისთვის, რომ რაციონალური ნაბიჯებით და სწორი გადაწყვეტილებებით, არ მივცეთ საშუალება არავის, რომ ქვეყნის ხვალინდელი დღე გადააყოლონ თავის პოლიტიკურ ინტერესებს.
ჩვენ გვქონდა მხოლოდ ერთი პირობა, რომ საკრებულოში არავის ექნებოდა სრული უმრავლესობა და ყველა კომისია თანაბრად უნდა გადანაწილებულიყო, რაც არის ჩვენი ამომრჩევლის მთავარი დაკვეთა.
სამწუხაროდ, ორივე პოლიტიკურმა ძალამ უარი თქვა ამ პროცესზე. ამის შემდეგ, კვლავ მოქალაქეების ინტერესებიდან გამომდინარე და მათი ნების შესაბამისად, ჩვენ გადავდგით კიდევ ერთი ნაბიჯი და შევთავაზეთ ორივე მათგანს საკრებულოების თავმჯდომარეებად ჩვენი კანდიდატების წარდგენა, იმ შემთხვევაში თუ ორივეს წარმომადგენელი იქნებოდა საკრებულოს თავმჯდომარის მოადგილე, რაც უზრუნველყოფდა მმართველობის დაბალანსებას.
როგორც ხედავთ, ბალანსის დასაცავად ჩვენ გამოვიყენეთ ჩვენს ხელთ არსებული ყველა ბერკეტი, არ შეგვიწყვეტია ამ ბერკეტების გამოყენება, არ ვწყვეტთ ახლაც და არ მივიღებთ მონაწილეობას არავის სცენარში“, _ გვითხრა ბურჭულაძემ.
[sexy_author_bio]
