“გურია ნიუსის“ მკითხველმა იცის, რომ ჩოხატაურში, სოფლების – ბუკისციხის, საყვავისტყის საზღვარზე მცირე პროექტი ხორციელდება. პროექტის მიზანი ტყის ეკოსისტემების მდგრადი მართვის ხელშეწყობაა; სამწუხაროდ, ადამიანების დიდი ნაწილი მხოლოდ მომხმარებლურად ექცევა გარემოს, ტყეებს; ბევრს ვსაუბრობთ ჩვენი ქვეყნის ლამაზი ბუნების შესახებ, მაგრამ ყოველი ფეხის ნაბიჯზე ვხვდებით დაბინძურებულ გზისპირებს, ნაგავსაყრელად და საკანალიზაციო არხებად ქცეულ მცირე მდინარეებს, ნარჩენებით მოფენილ “საქეიფო“ ადგილებს. სამწუხაროდ, ჩვენი ყოველდღიურობის ნაწილია სხვადასხვა საუკუნეში, სხვადასხვა მიზეზით გაჩეხილი, გახრიოკებული ნატყეურები.
საქართველოში ტყის მდგრადი მართვის გაუმჯობესებას ჩვენი პარტნიორი ქვეყნები წლების განმავლობაში უჭერენ მხარს და ფინანსურადაც ეხმარებიან. ორი წლის წინ, 2023 წელს, ტყის მდგრადი მართვის საკითხებზე პროექტ ECO.Georgia-ს ინიციატივით, გამოცხადდა საპროექტო იდეების კონკურსი, რომელიც რვა სამიზნე მუნიციპალიტეტს, მათ შორის, მთელ გურიას მოიცავდა. ECO.Georgia საქართველოში სატყეო სექტორის რეფორმის განხორციელების მხარდაჭერის პროექტია, რომელიც კლიმატის მწვანე ფონდის (GCF), გერმანიის ეკონომიკური თანამშრომლობისა და განვითარების ფედერალური სამინისტროს (BMZ) და შვეიცარიის განვითარებისა და თანამშრომლობის სააგენტოს (SDC) მიერ ფინანსდება და გერმანიის საერთაშორისო თანამშრომლობის საზოგადოებისა (GIZ) და საქართველოს მთავრობის მიერ ხორციელდება. პროექტში, საწყისი ეტაპიდანვე აქტიურად იყო ჩართული ადგილობრივი მუნიციპალური თვითმმართველობა.
სწორედ ამ კონკურსში გაიმარჯვა ახალგაზრდების ჯგუფის პროექტმა “ჩვენი ხე(ლ)ებით“! რომლის ფარგლებში, დონორების მცირე გრანტით, პაწია მდინარის _ ორპირას ტერიტორიაზე სტიქიური ნაგავსაყრელი მოწესრიგდა; მოეწყო საპიკნიკე, საცეცხლე ადგილები; ეკალ-ბარდებისგან გასუფთავდა საბანაო “ჭა“ ორ მცირე ჩანჩქერზე, რომელიც ადგილობრივი ახალგაზრდებისთვის საყვარელი საბანაო ადგილია; პრაქტიკულად, თავიდან აშენდა თითქმის დანგრეული, დაზიანებული სახურავის გამო დამპალი, ცნობისმოყვარე ბავშვებისთვის საფრთხედ ქცეული საერთო სარგებლობის წისქვილი;
ორივე ლოკაციაზე დაიდგა ბიოტუალეტები; შემოკავდება მავთულით ღობე, რომ ნარგავები პირუტყვისაგან იყოს დაცული…
პროექტის დირექტორი აკაკი სიხარულიძე ამბობს, რომ ყველა ლოკაციის უცხოელი ტურისტების მიზიდულობის ცენტრად ქცევა, ჩაბეტონება ან მძიმე მანიპულაციური ჩარევებით დამახინჯება მიუღებელია, სისუფთავის დაცვა, ხანძრების პრევენცია, ჯანსაღ გარემოზე ზრუნვა კი, აუცილებელი.
_ საქართველოში, ჩვენს ახლომახლო უამრავი ადგილია, რომლებიც, შესაძლოა, უცხოელი ვიზიტორების მიზიდულობის არეალი არაა, მაგრამ ადგილობრივ თემებში პოპულარულია. სწორედ ამგვარი ადგილები უნდა გახდეს ადგილობრივი ახალგაზრდების ზრუნვის საგანი, სასიცოცხლოდ გვჭირდება ჩვენც და ჩვენს ბუნებასაც დაცული, საინტერესო, ლამაზი და მოწესრიგებული დასვენების კერა. ძალიან ბევრი საქმე გაკეთდა მინიმალური დანახარჯებით – ძირითადი სამუშაოს შესრულება განმახორციელებელმა ჯგუფმა აიღო თავის თავზე, მოხალისეებიც დაგვეხმარნენ, დაქირავებულმა ადამიანებმაც მინიმალური გასამრჯელო მოითხოვეს. ერთად კი ძალიან კარგი შედეგი მივიღეთ.
ვეცადეთ, მინიმალურად ჩავრეულიყავით ლანდშაფტში, მხოლოდ ბუნებრივი მასალები გამოგვეყენებინა – მდინარესთან, საპიკნიკე ადგილებთან ჩასასვლელი საფეხურები კი გამძლე ხის – აკაციის გავაკეთეთ.
ეს ადგილი იმითაცაა მნიშვნელოვანი, რომ მიმდებარე ტერიტორიიდან მარაგდება ბუკისციხე და მოსაზღვრე სოფლები სასმელი წყლით, მოსახლეობა აგროვებს ტყის მეორეულ პროდუქტებს _ მარწყვს, მაყვალს, ეკალას… ახალგაზრდები მოდიან საბანაოდ ან დროის ერთად გასატარებლად…. მოკლედ, საჭირო და ლამაზი ადგილია, თუმცა, ზრუნვა და ხელის შევლება სჭირდებაოდა. მოვლითა და მზრუნველობით აქაურობა ადამიანებს მეტ სიამოვნებას მიანიჭებს და წყლის დებეტის შემცირების, ხანძრების, დაბინძურების რისკებისგანაც მეტად დაცული ვიქნებით, _ ამბობს აკაკი.
_ გზის და ნაგავსაყრელის გაწმენდა, ჩვენივე ინიციატივით გზის ბორდიურების გაკეთება, დანგრეული წისქვილის შენობის გამოცვლა – ამ ძირითადი სამუშაოების გარდა, უამრავი რამ გაკეთდა: საპიკნიკე, საცეცხლე ადგილები მოეწყო, ბიოტუალეტები დაიდგა, გასუფთავდა ჯაგნარით და ეკლით დაფარული ჩანჩქერები, მისასვლელი ბილიკები…
მუშაობის პროცესშივე დაიწყო ხალხის ნაკადმა საბანაოზე მოსვლა – მათ შორის, ქვეყნის სტუმრებიც იყვნენ და ადგილობრივი ბთინეიჯერები, ბავშვები.
ვფიქრობ, მათთვის საინტერესო გაკვეთილი იყო ჩვენი საქმიანობა – შემდეგ ისინი გაწმენდენ ამ ბილიკებს და სხვებს უჩვენებენ მაგალითს, _ ამბობს პროექტის სტაფის წევრი მამუკა მამალაძე.
