“COVID-19” პანდემია და ტუბერკულოზი

COVID-19″ პანდემია განიხილება თუ არა, როგორც ტუბერკულოზის დიაგნოსტირების ხელისშემშლელი ფაქტორი?

პანდემიის პირველ ეტაპზე რეგულაციებით განსაზღვრული შეზღუდვების გამო ხშირად ვერ ხერხდებოდა აქტიური ტუბერკულოზის შემთხვევათა გამოვლენა, უპირველესად სამედიცინო დაწესებულებაში პაციენტთა პასიური მიმართვიანობის გამო.

არის თუ არა საჭირო ინვესტიციები ტუბერკულოზის მართვაში?

“მეტი ინვესტიცია ტუბერკულოზის დასასრულებლად და სიცოცხლის გადასარჩენად“, _ ეს გახლავთ 2022 წლის ტუბერკულოზთან ბრძოლის პროგრამის სლოგანი. მართლაც განსაკუთრებული ყურადღება ესაჭიროება რესურსების ინვესტირებას, რაც აუცილებელია ტუბერკულოზის წინააღმდეგ ბრძოლის გასაძლიერებლად.

ეს ინვესტიციები განსაკუთრებით მნიშვნელოვანია COVID-19-ის პანდემიის კონტექსტში, რომელმაც ტუბერკულოზთან ბრძოლაში ადრე მიღწეული პროგრესი რისკის ქვეშ დააყენა.

პანდემიის დროს მიეკუთვნება თუ არა ტუბერკულოზი საშიში ინფექციების რიცხვს?

ტუბერკულოზი რჩება მსოფლიოში ერთ-ერთ ყველაზე მომაკვდინებელ ინფექციურ დაავადებად.

მსოფლიოში აქტიური ტუბერკულოზით ყოველწლიურად ავადდება 9 მილიონამდე ადამიანი და იღუპება დაახლოებით 1,5 მილიონი.

ახლად დიაგნოზირებული ტუბერკულოზის შემთხვევათა მაჩვენებელი შემცირდა 65%-ით თუმცა უნდა გავითვალისწინოთ ისიც, რომ 2020-2021 წლებში ტუბერკულოზის შემთხვევების გამოვლენის მნიშვნელოვანი შემცირება სავარაუდოდ COVID-19 პანდემიის გავლენას უკავშირდება.

არის თუ არა ხელმისაწვდომი მკურნალობა COVID-19 პანდემიის პირობებში?
საქართველოში, სახელმწიფო პროგრამითა და გლობალური ფონდის თანადაფინანსებით უზრუნველყოფილია ტუბერკულოზის ყველა ფორმის, მათ შორის რეზისტენტული ტუბერკულოზის თანამედროვე მკურნალობაზე უნივერსალური ხელმისაწვდომობა.

ვიდეო მხარდაჭერით მკურნალობა COVID-19 პანდემიის პირობებში
საქართველოში შემუშავდა მობილური ტელეფონის აპლიკაცია ვიდეო მხარდაჭერით მკურნალობისთვის.

ახალი ტექნოლოგიის გამოყენება განსაკუთრებით გაფართოვდა COVID-19 პანდემიის დროს და შესაძლებელი გახადა მკურნალობის მეთვალყურეობა ჯანდაცვის დაწესებულებაში პაციენტის ვიზიტის გარეშე.
GeneXpert აპარატით მოლეკულური მეთოდით ხდება მგრძნობელობის სწრაფი დადგენა. იგივე აპარატები გამოიყენება “COVID-19″ინფექციის დიაგნოსტიკისთვის.
შესაძლებელია თუ არა “COVID-19″ პანდემიის პირობებში კონტაქტების კვლევისა და ლატენტური(ფარული) ტუბერკულოზის მკურნალობის გაფართოება?
ტუბერკულოზით დაავადებულ ინდექს-პაციენტთან კონტაქტის მქონე პირები აქტიური სკრინინგის ერთ-ერთ ძირითად ჯგუფს წარმოადგენს. აუცილებელია პაციენტთან ახლო კონტაქტში მყოფი პირების კვლევა აქტიური და ლატენტური ტუბერკულოზის გამოსავლენად.

“COVID-19″ პანდემიის პირობებში შეიქმნა ელექტრონული პლატფორმა (TraceTB), რომელიც კონტაქტირებულთა და ლატენტური ტუბერკულოზური ინფექციის მკურნალობაზე მყოფი პირების აღრიცხვისა და სრულყოფილი მართვის საშუალებას იძლევა.

რა არის საჭირო ტუბერკულოზის გავრცელების შესაჩერებლად“COVID-19″ პანდემიის პირობებში?

დღეს, როცა ინფიცირების საერთო ფონი მომატებულია, განსაკუთრებული ყურადღება უნდა მიექცეს ტუბერკულოზის აქტურ შემთხვევათა დროულ გამოვლენას, ამიტომ თუ თქვენ გაქვთ:

ხველა ნახველით;

სხეულის ტემპერატურის მომატება, ოფლიანობა;

წონის კლება;

სისხლიანი ნახველი;

ტკივილი გულმკერდის არეში;

უმადობა;

საერთო სისუსტე, ადვილად დაღლა;

ქოშინი.

აუცილებლად მიმართეთ სამედიცინო დაწესებულებას;

ჩაიტარეთ ტესტირება “COVID-19″ინფიცირების სტატუსის დასადგენად ;

მიმართეთ ექიმს, რათა გამოირიცხოს ტუბერკულოზით ინფიცირება; გაითვალისწინეთ, რომ ტუბერკულოზის გადამდები ფორმით დაავადებული ერთი ადამიანი წლის განმავლობაში შესაძლოა 10-15()ჯანმრთელი ადამიანის დაინფიცირების წყარო გახდეს.

გაუფრთხილდით საკუთარ და გარშემომყოფთა ჯანმრთელობას!