გუშინ იტალიურმა გამოცემამ „napolipiu.com“ კიდევ ერთხელ ოფიციალურად დაადასტურა რომ საქართველოს ნაკრების შემტევმა ხვიჩა კვარაცხელიამ „ნაპოლისთან“ წინასწარი ხელშეკრულება უკვე გააფორმა, ქართველი იტალიური კლუბის მომავალი ვარსკვლავი უნდა გახდეს და ლორენცო ინსინიე ჩაანაცვლოს.
ვებგვერდი ერთ ახალ ამბავსაც გვაწვდის და ამტკიცებს, რომ ნეაპოლში კვარაცხელიას ასე დაუძახებენ – „Cuarascelia“ (კუარასკელია).
გუშინვე ცნობილმა გამოცემამ „გაძეტა დელო სპორტმა“ ოფიციალურად დაადასტურა, რომ ხვიჩა კვარაცხელია მალე „ნაპოლის“ ფეხბურთელი გახდება.
„ეს ზაფხულის სატრანსფერო ბაზარზე „ნაპოლის“ პირველი შენაძენი იქნება. ჯერ ოფიციალურად დადასტურებული არ არის, მაგრამ 21 წლის კვარაცხელიას ნეაპოლურ გუნდში გადასაყვანად, რომელსაც ადრე „მილანს“ უკავშირებდნენ, ყველაფერი გაკეთებულია.
„რუბინთან“ დამშვიდობების შემდეგ კვარაცხელიამ სეზონის სამშობლოში დასრულება გადაწყვიტა, ბათუმის „დინამოში“ გადავიდა, 1-ელი ივლისიდან კი „ნაპოლის“ ახალი მოთამაშე გახდება. ის ძალიან სწრაფი თავდამსხმელია, კარგად ეხერხება დრიბლინგი და „ნაპოლისთან“ კონტრაქტს 2027 წლის ივნისამდე გააფორმებს. ხვიჩა ლორენცო ინსინიეს ადგილს დაიკავებს, რომელიც კანადაში გაემგზავრება, რათა „ტორონტოში“ დაიწყოს თავისი თავგადასავალი“, – დაწერა გამოცემამ.
გუშინ, საქართველოს ნაკრების ნახევარმცველმა ზურიკო დავითაშვილმა ტულის „არსენალის“ დატოვების შემდეგ ბათუმის „დინამოში“ ივარჯიშა.
აჭარული გუნდის პრეზიდენტმა არჩილ ბერიძემ განაცხადა, რომ დავითაშვილს განაცხადში შეიყვანენ და მოლაპარაკებებს გააგრძელებენ, რათა ის მათ გუნდში იმავე პირობით დარჩეს, როგორც კვარაცხელია, ანუ ლაპარაკი არა დროებითი, არამედ სრულფასოვანი კონტრაქტის გაფორმებაზეა.
ესპანეთში კი გავლენიანი გამოცემა „AS“ გიორგი მამარდაშვილის თემას კიდევ ერთხელ გამოეხმაურა.
„სულ რაღაც ხუთიოდე ტურის წინ „ვალენსია“ მესამე იყო, რომელმაც ამ სეზონში ყველაზე მეტი გოლი გაუშვა და „ბარსელონას“ წინააღმდეგ დიდი ანგარიშით (1-4) მარცხი ნიშნავდა, რომ ისინი დაცვით თამაშში ფსკერზე დაეშვნენ, თუმცა კალმის ერთი მოსმით ყველაფერი სასიკეთოდ გადაწყდა.
ისე მოხდა, რომ ხსენებული შეხვედრის შემდეგ ბორდალასის გუნდმა მხოლოდ 1 გოლი გაუშვა. ჯერ ყველაფერი შორსაა იქამდე, თუკი „ვალენსიას“ ევროტურნირებზე გასვლა სურს. თუმცა, ერთი რამ ფაქტია, გიორგი მამარდაშვილი ბრწყინვალე ფორმაშია – მას 20 თებერვლის შემდეგ საკუთარ კარში გოლი არ მიუღია და მისი კარისკენ წასული ბურთი 15-ჯერ მოიგერია.“
ამასობაში დიდ ბრიტანეთში სანქცინირებული რომან აბრამოვიჩი ახალ „საფეხბურთო ნაბიჯებს“ დგამს.
გუშინ ცნობილი გახდა რომ უახლოეს დღეებში რუსი ოლიგარქი თურქული „გიოზთეპეს“ ახალი მფლობელი იქნება. ვარაუდობენ, რომ ინფორმაცია ოფიციალურად პარასკევს, 8 აპრილს დადასტურდება.
„გიოზთეპეს“ აქამდე მეჰმედ სეპილი ფლობდა, რომელიც აბრამოვიჩთან მეგობრობს და მან პრაქტიკულად დაადასტურა ზემოხსენებული ინფორმაცია: „8 წლის შემდეგ მომიწია კლუბის დათმობა, რომელიც სიცოცხლეზე მეტად მიყვარს, თუმცა, მშვიდად ვარ, რადგან კარგ ხელში ვტოვებ“, – აღნიშნა მან.
„გიოზთეპე“ თურქეთის სუპერლიგაში გასავარდნ ზონაში, მე-18 ადგილზეა და ქვედა ლიგაში გავარდნის რეალური კანდიდატია. კლუბს ბოლო დროს ფინანსური პრობლემებიც ჰქონდა.
ომის ქარცეცხლში გახვეულ უკრაინაში „NBA“-ს ორგზის ჩემპიონი, სტანისლავ მედვედენკო პირადად ჩავიდა ბუჩასა და ირპენში და ის საშინელება იხილა, რომელიც რუსულმა არმიამ უკრაინაში დაატრიალა. ახლო წარსულში ცნობილმა უკრაინელმა კალათბურთელმა ნამდვილი დარტყმა მიიღო, რაზეც მის მიერ გაკეთებული კომენტარიც მოწმობს.
„ის, რასაც აქაურ ქუჩებში ვხედავ, გამაოგნებელია სისასტიკის მასშტაბებით და ადამიანს ლაპარაკის უნარსაც კი ართმევს. ყველა ის დანაშაული, რომელსაც რუსეთი უკრაინაში საუკუნეების განმავლობაში სჩადიოდა, ახლა თვალსაჩინო გახდა. ამას მთელი მსოფლიო პირდაპირ ეთერში უყურებს. ამჯერად, მათ აღარ მიეცათ საშუალება, ყველაფერი მიეჩქმალათ და ჩადენილი მხეცობების კვალი წაეშალათ. ყველა ქალაქი თუ სოფელი, საიდანაც ამ ნაძირლებს აძევებენ, ერთდროულად ხდება ტრაგედიისა და გმირობის ადგილი. ძნელია იმ მხეცობის მასშტაბების წარმოდგენა, რომელიც მარიუპოლში, ჩერნიგოვსა თუ ვოლნოვახაში იქნა ჩადენილი. დარჩა კი რაიმე კანონი ან კონვენცია, რომელიც რუსებმა არ დაარღვიეს? ეს საშინელი ფასია, რომელსაც უკრაინა თავისუფლებისთვის იხდის“.
