დაბალი აქტივობა და “მთების დამთვალიერებელი” ბიჭები უბნებზე

ოზურგეთში, ადგილობრივი თვითმმართველობის არჩევნების მეორე ტური დასრულდა, რომელსაც უნდა გამოევლინა, თუ ვინ გახდებოდა ოზურგეთის მუნიციპალიტეტის მერი.

როგორც ცნობილია, მეორე ტურში “ქართული ოცნების” კანდიდატი, ავთანდილ თალაკვაძე დამოუკიდებელ კანდიდატს, ოზურგეთის მუნიციპალიტეტის მოქმედ მერს, კონსტანტინე შარაშენიძეს დაუპირისპირდა.

ორი ოქტომბრის არჩევნების მიხედვით, პირველ ტურში, ავთანდილ თალაკვაძემ 43, 75% (14 967 ხმა) მიიღო, კონსტანტინე შარაშენიძემ კი _ 29,16% (9 976 ხმა).

მეორე ტური “ქართული ოცნების” კანდიდატის, ავთანდილ თალაკვაძის გამარჯვებით დასრულდა. ამავე დროს ოთხ მაჟორიტარულ ოლქში, რომელიც 16 საარჩევნო უბანს მოიცავს, საკრებულოს არჩევნების მეორე ტური გაიმართა.

ლაითურში გაიმარჯვა ენმ-ოს კანდიდატმა, რაინდი დუმბაძემ, რომელიც “ქართული ოცნების” კანდიდატს, გია ჩაგანავას უპირისპირდებოდა.

ძიმითში ენმ-ს კანდიდატს შალვა თავდიშვილს მოუგო “ქართული ოცნების” კანდიდატმა ტიტე მგელაძემ.

ქალაქ ოზურგეთში, გახარიას “საქართველოსთვის” კანდიდატმა გიორგი სირაძემ გაიმარჯვა “ქართული ოცნების” კანდიდატ ლელა საჯაიასთან დაპირისპირებაში.

სოფლების: ოზურგეთი, გურიანთა, მელექედურის ოლქში დამოუკიდებელი კანდიდატი დათა მიქელაშვილი დამარცხდა, “ქართული ოცნების” კანდიდატ ნინო მახარაძესთან. დათამ საკუთარ სოფელში _ მელექედურში მახარაძეს დიდი სხვაობით მოუგო, მაგრამ დანარჩენ სოფლებში მიღებული შედეგის მიხედვით წააგო.

როგორ ჩატარდა არჩევნები

30 ოქტომბერს, დილით, არჩევნები მშვიდ გარემოში დაიწყო, რასაც თბილი, მზიანი შემოდგომის დღე უწყობდა ხელს. ამას გამოხატავდნენ კიდეც დილაადრიან ოზურგეთის ქუჩებში მოსიარულე ადამიანები.

თუმცა, შედარებით ხალვათობა იგრძნობოდა. არ იყო ისეთი ხალხმრავლობა, რაც ახასიათებს შაბათ-კვირას.

კითხვაზე, როგორია საარჩევნო გაწყობა, რიგითი ოზურგეთელები სხვადასხვანაირი პოზიტიური ჟესტით გვპასუხობდნენ: “აი, ასეთი”, _ გვითხრა ცერა თითის ჩვენებით, “მოდერნის” მიმდებარედ, თონის პურით ხელში ერთ-ერთმა მამაკაცმა და დააკონკრეტა, რომ ოჯახისთვის პური შეიძინა და მერე აპირებდა წასვლას მოქალაქეობრივი ვალის მოსახდელად.

_ განწყობა ამ ამინდისნაირი, გვაქვს _ თბილი, მშვიდობიანი. აი, საღამოს როგორი განწყობა იქნება ორივე მხარეს, ეს არ ვიცი, მალე წავალ ხმის მისაცემად, _ გვითხრა ოზურგეთელმა ილო ნაცვალაძემ.

თაყაიშვილის ქუჩაზე, გარე ვაჭრობით დაკავებული თინა პეტროსიანი, ხელში ხილით შეგვეგება:

_ არჩევნები ნაკლებად მაინტერესებს. მე ის მაინტერესებს, ამ ჩემს კარალიოკს თუ გავყიდი დღეს. აი, მაშინ მექნება კარგი განწყობა. თუ “კაი სიფთა” იცით, გაჩუქებთ, _ პოზიტიური ხუმრობა არ დაიშურა ქალბატონმა.

_ მე გორელი კაცი ვარ. ჩვენთან არ არის მეორე ტური. მივედი არჩევნებზე, როცა იყო და მოვიხადე ვალი. მაშინაც ვშრომობდი, ახლაც ვშრომობ, ოღონდ ახლა ოზურგეთში ვარ. კარგი ხალხია გურულები. მინდა, მშვიდობიანი დღე გისურვოთ. ერთმანეთის სიყვარული ყველა არჩევნებს სჯობს, _ გვითხრა გორელმა მეურნემ ზურაბ აკოფაშვილმა, რომელიც ოზურგეთში ხშირად ყიდის საკუთარ ბაღში მოწეულ ვაშლს, სხვადასხვა ხილს და ოზურგეთელები კარგად იცნობენ.

ოფიციალური საარჩევნო ორგანოს, ოზურგეთის საოლქო საარჩევნო კომისიის თამჯდომარემ, ბერდია ლომაძემ “გურია ნიუსთან” განაცხადა, რომ ყველა საარჩევნო უბანში, დილიდანვე ხმის მიცემის პროცედურა დროულად და გართულებების გარეშე დაიწყო.

დღის განმავლობაში “გურია ნიუსი” სხვადასხვა უბნებს სტუმრობდა. დაკვირვებისას და მოსახლეობასთან გასაუბრების მიხედვით, უმთავრესად რაც შეიმჩნეოდა, იყო შედარებით ნაკლები აქტიურობა, ვიდრე პირველ ტურში.

ანასეულსა და სერის უბანზეც ამომრჩევლის დაბალ აქტივობაზე საუბრობდნენ:

_ ჩვენთან სულ 1 301 ამომრჩეველი ფიქსირდება. 2 საათისთვის მოსული იყო 485 ამომრჩეველი. 10%-ით უფრო დაბალია ეს მაჩვენებელი, ვიდრე იყო პირველ ტურში, _ გვითხრეს კომისიის წევრებმა #08 უბანზე.

ანასეულის #57 საუბნო კომისიაში გვითხრეს, რომ სულ 796 ჰყავთ ამომრჩეველი. პირველ ტურში 12 საათისთვის ორასამდე ამომრჩეველი მოვიდა, მეორე ტურში კი _168, ანუ შედარებით ნაკლები, _ გვითხრა კომისიის მდივანმა ნათია კაჭარავამ.

ჭანიეთის # 60/53 საარჩევნო უბანზე დილიდან მივიდნენ ამომრჩევლები. თუმცა, როგორც აქ გვითხრეს, პირველ ტურში, დილის ათი საათისთვის მეტი ხალხი იყო მოსული.

_ შემოდგომაა, ძლივს ამინდები გამოვიდა. ხალხს ბევრი საქმე აქვს. მოვლენ, ალბათ. მთავარია, როგორც დღე არის მშვიდი და მზიანი, ყველაფერი ასე დასრულდეს, _ გვითხრეს სოფლის ცენტრში მდგომმა ადგილობრივმა მცხოვრებლებმა, რომლებიც აქ მოქალაქეობრივი ვალის მოსახდელად მოვიდნენ.

ნაგომრის # 39 უბანზე, ხუთი საათისთვის 391 ამომრჩეველი გამოცხადდა.

_ პირველ ტურში ამ დროისთვის, 495 ამომრჩეველს ჰქონდა საკუთარი ნება გამოხატული. მეორე ტურში აქტივობა ცოტა უფრო დაბალია. ვნახოთ, იქნებ, მოგვიანებით მოვიდნენ მოქალაქეები, _ გვითხრეს საარჩევნო კომისიაში.

ნაგომარში სულ 857 ამომრჩეველია რეგისტრირებული.

კომისიაში გვითხრეს ასევე, რომ დღის განმავლობაში სიწყნარეა, საარჩევნო პროცესი მშვიდ გარემოში მიმდინარეობს და კონკრეტულად ამ საარჩევნო უბანზე, რაიმე ექსცესს ადგილი არ ჰქონია.

ანალოგიური პასუხები ისმოდა თითქმის ყველა უბანზე, რომ წინა ტურთან შედარებით, 5-10%-ით ნაკლები ამომრჩეველი მივიდა.

გარდა პირველ ტურთან შედარებით ნაკლები აქტივობისა, თვალში საცემი იყო კიდევ ერთი გარემოება _ როგორც ადგილებზე გვეუბნებოდნენ, სოკოებივით იყო გამრავლებული ე. წ. “შავი და შპანა დამკვირვებლები”. თითქმის ყველა უბანთან ჯგუფებად იდგნენ ახალგაზრდები, რომლებიც თავისებური მანერებითა და საუბრის ტონით გამოირჩეოდნენ.

“გურია ნიუსმა” სოფელ ოზურგეთში გადაიღო ახალგაზრდების ჯგუფი, რომლებმაც გვითხრეს, რომ არჩევნებში მიიღეს მონაწილეობა და იმიტომ არიან აქ.

კითხვაზე, თუ თავიანთი მოქალაქეობრივი ვალი მოიხადეს, რატომ დგანან აქ საათობით და არ ტოვებენ ტერიტორიას, გვიპასუხეს, რომ მთებს ათვალიერებენ.

_ მთებს ვათვალიერებთ, არ შეიძლება?! კი ვდგავართ, მაგრამ ვინმეს   ვეჩხუბებით? ვინმეზე ზეწოლას ვახდენთ? ვესაუბრებით ერთმანეთს, მეტი არაფერი, _ გვითხრა ერთ-ერთმა ახალგაზრდამ. შემდეგ კი კითხვის დასმა თავად ითხოვა:

_ დიდი ბოდიშით გკითხავთ, მაგრამ თუ ინტრიგანი არ ხარ, რატომ გვეკითხები, აქ რატომ ვდგავართ?

იქვე მდგომმა პოლიციელმა ჩვენც განგვიმარტა, რომ არაფერს არ აშავებენ: _ აქეთ-იქით თუ იყურებიან, ამისთვის ხომ ვერ ვეტყვით რაიმეს? _ გვითხრა მან.

_ აქეთ-იქით რომ იყურებიან, ამით ატერორებენ წინასწარ ისედაც დატერორებულ ამომრჩევლებს. არჩევნები წინასაარჩევნო პერიოდში ყალბდება ძირითადად _ ხდება ფულის დარიგება, ზეწოლა, დაპირება, შანტაჟი. ამ არჩევნებს, ყველაფერი შეიძლება ეწოდოს, არჩევნების გარდა. პატიმრის გამოშვებას რომ ოჯახს დაპირდები ხმების სანაცვლოდ თუ პრობაციის პერიოდის შემცირებას, ამას რა ქვია?!. ვის და რას დაემსგავსა “ქართული ოცნება”? არჩევნების თანმხლებ პროცესად რატომ აქციეს მოსყიდვის ეს გაუგონარი ფორმები, “ნაციონალების” მსგავსად? დილიდან ასეთი ამბავია სოფელ ოზურგეთსა და გურიანთაში. საათობით დგანან, სხედან მანქანებში და არიან ამბავში… სახლში რატომ არ მიდიან ასეთ მზიან ამინდში? რატომ ფლანგავენ დროს? პატრონს მიეხმარონ და საკუთარ თავსაც, შემოდგომაა. ამდენი ჩაცუცქული თუ დაყუდებული რა ამბავია? ასეთია ჩვენი საშიში რეალობა. ვიმეორებ, ეს დააბრუნა “ქართულმა ოცნებამ”. განწირულია ის ხელისუფლება, რომელიც ამის გარეშე არჩევნებს ვერ იგებს ან გაჭირვებით იგებს, _ გვითხრა ია ჭარხალაშვილმა, რომელიც დამოუკიდებელი კანდიდატის კოტე შარაშენიძის შტაბის დამკვირვებელი იყო.

“გურია ნიუსთან” კომენტარი გააკეთა ოზურგეთის #60 საარჩევნო ოლქის თავმჯდომარემ, ბერდია ლომიძემ:

_2021 წლის ადგილობრივი თვითმმართველობის არჩევნებში, ოზურგეთის მუნიციპალიტეტის მერი გახდა “ქართული ოცნების” კანდიდატი, ავთანდილ თალაკვაძე, რომელმაც 19 ათას ხმაზე ოდნავ მეტი მიიღო, რაც 55%-ზე ოდნავ მეტია. დამოუკიდებელმა კანდიდატმა, კონსტანტინე შარაშენიძემ მიიღო 15170 ხმა, რაც 44,15%-ია. სულ ოზურგეთში რეგისტრირებულია 60 471 ამომრჩეველი. არჩევნებზე გამოცხადდა 35340 ამომრჩეველი”, _ გვითხრა მან.

ბერდია ლომიძემ, ასევე, გვითხრა, რომ 1 ნოემბერს, კომისიაში ჩატარდა სხდომა და მოხდა წილისყრა, ცნობილი ლოტოტრონის პრინციპით. გამოვლინდა ის შვიდი უბანი, რომლის მონაცემების გადათვლა უნდა მოხდეს _ ესენია: # 56, 23, 01, 35, 23, 25 და 43-ე უბნები.

ამ უბნების ბიულეტენების გადათვლა ოზურგეთის სპორტის სასახლეში მართლაც შედგა და დარღვევა არ გამოვლენილა.

[sexy_author_bio]