გურიასა და აჭარაში მუნიციპალური განვითარების ფონდმა მშენებლობასთან დაკავშირებული მომსახურების შესყიდვის შესახებ ელექტრონული ტენდერი აუქციონის გარეშე გამოაცხადა.
როგორც სატენდერო დოკუმენტაციიდან ირკვევა, სამშენებლო სამუშაოების ჯამური ღირებულება: 106 000 000 ლარია და 55 ობიექტს მოიცავს.
აღნიშნულთან დაკავშირებით “გურია ნიუსმა” მუნიციპალური განვითარების ფონდს წერილობით მიმართა.
“გთხოვთ, მოგვაწოდოთ ინფორმაცია, 55 ობიექტიდან, რამდენი მდებარეობს გურიაში და კონკრეტულად სად მაგალითად, რამდენი ობიექტია ჩოხატაურის მუნიციპალიტეტში, ოზურგეთის მუნიციპალიტეტში, ლანჩხუთის მუნიციპალიტეტში).
გარდა ამისა, შესყიდვის სავარაუდო ღირებულება 4 240 000.00 ლარს შეადგენს. რამდენი ლარია აქედან გამოყოფილი გურიაში შესასრულებელი სამუშაოსთვის?
აქვე, გთხოვთ გვიპასუხოთ, რატომ არის აუცილებელი მრავალდარგოვანი სამშენებლო და სარეკონსტრუქციო სამუშაოებისთვის საინჟინრო ზედამხედველობის მომსახურების შესყიდვა?” _ ვწერდით მუნიციპალური განვითარების ფონდს 24 ნოემბერს გაგზავნილ წერილში.
მუნიციპალური განვითარების ფონდმა განაცხადზე პასუხი 5 დეკემბერს დაგვიბრუნა.
“სსიპ მუნიციპალური განვითარების ფონდმა, კომპეტენციის ფარგლებში, განიხილა მიმდინარე წლის 24 ნოემბრის #6317 თქვენი წერილი, რომელიც ეხება საინჟინრო ზედამხედველობის მომსახურების შესყიდვას.
გაცნობებთ, რომ აღნიშნული შესყიდვა დაგეგმილი პროექტების მასშტაბიდან გამომდინარე მიზნად ისახავს ფონდის დაკვეთით გასახორციელებელი კომპლექსური სამშენებლო-სარეკონსტრუქციო სამუშაოების ხარისხიანი, უსაფრთხოების ნორმებთან შესაბამისი და ეფექტური განხორციელების უზრუნველყოფას.
პროექტების სპეციფიკიდან გამომდინარე, სამუშაოები მოიცავს სხვადასხვა სამშენებლო, სამონტაჟო, საავტომობილო გზების, საინჟინრო ქსელების, არქიტექტურულ და სხვა უსაფრთხოების სტანდარტებთან დაკავშირებულ კომპონენტებს. შესაბამისად, აუცილებელია კვალიფიციური და გამოცდილებაზე დამყარებული საინჟინრო ზედამხედველობის მომსახურება. საზედამხედველო ორგანიზაცია უზრუნველყოფს შესრულებული სამუშაოების ფაქტობრივი მოცულობების, ხარისხისა და ღირებულების გადამოწმებას, რაც აუცილებელია პროექტების დადებითი შედეგის მისაღწევად.
აღნიშნულ ტენდერთან დაკავშირებით ამ ეტაპზე არსებული ინფორმაცია შეგიძლიათ იხილოთ სახელმწიფო შესყიდვების ერთიან ელექტრონულ სისტემაში”, _ წერია ჩვენთვის მოწოდებულ ინფორმაციაში.
“აღნიშნულ გეოგრაფიულ არეალში დაგეგმილია სამშენებლო და სარეაბილიტაციო სამუშაოების განხორციელება მრავალი მიმართულებით. ამასთან, გარდა წინამდებარე მომსახურებისა შემსყიდველს აქვს უფლება, საჭიროებისამებრ, გამოაცხადოს დამოუკიდებელი შესყიდვა.
მიმწოდებლის მიერ გასაწევი საზედამხედველო მომსახურება (შემდგომში _ “მომსახურება”) მოიცავს სამშენებლო სამუშაოების ყოველდღიური ზედამხედველობის დაგეგმვას, კოორდინაციასა და განხორციელებას განსაზღვრულ ობიექტებზე. ზედამხედველობის პროცესში მიმწოდებელი ვალდებულია უზრუნველყოს სამუშაოების უწყვეტი კონტროლი, მათი სრული შესაბამისობა დამტკიცებულ პროექტთან, ტექნიკურ სპეციფიკაციებთან, მოქმედ სამშენებლო ნორმებთან, ხარისხის სტანდარტებთან და მოქმედ კანონმდებლობასთან. ასევე შრომის უსაფრთხოების წესებთან . მიმწოდებლის მიერ გასაწევი საზედამხედველო მომსახურება მოიცავს სამშენებლო სამუშაოების ზედამხედველობას დეტალური საპროექტო დოკუმენტაციის საფუძველზე. დამკვეთის მოთხოვნის საფუძველზე, მომსახურება მოიცავს მთელი საპროექტო დოკუმენტაციის ან მისი კონკრეტული ნაწილის ტექნიკურ ანალიზსა და შეფასებას მშენებლობის დაწყებამდე. აღნიშნული შეფასების მიზანია დოკუმენტაციაში არსებული ხარვეზების დროულად გამოვლენა და მათი კორექტირება, რათა პროექტი იყოს სრულად თავსებადი ტექნიკურ დავალებასთან, მოქმედ ნორმებთან და კონკრეტული ობიექტის გეოლოგიურ, კლიმატურ თუ ინფრასტრუქტურულ რეალობასთან. ეს ქმნის საფუძველს მაღალი ხარისხის, შეუფერხებელი და სტაბილური მშენებლობის პროცესისთვის.
მომსახურების მიწოდების სავარაუდო ხანგრძლივობა არის 2028 წლის 31 დეკემბრის ჩათვლით. (დეფექტებზე პასუხისმგებლობის პერიოდის ჩათვლით). გარდამავალი პერიოდისთვის მიმწოდებელი ვალდებულია: საანგარიშო წლის დამთავრებასთან დაკავშირებით მშენებლებთან ერთად შეადგინონ გარდამავალ ობიექტებზე საინვენტარიზაციო უწყისები და გადასცეს სსიპ საქართველოს მუნიციპალურ განვითარების ფონდს მომავალი პერიოდის გეგმაში გასათვალისწინებლად (კალენდარული წლის ოქტომბრის თვეში საორიენტაციო). მიმწოდებელი ახორციელებს საინჟინრო ზედამხედველობას 2028 წლის 31 დეკემბრის ჩათვლით, რის შემდეგაც იწყება ერთთვიანი გარდამავალი პერიოდი, რომელიც გრძელდება 2029 წლის 1 იანვრიდან 31 იანვრის ჩათვლით”, _ წერია სატენდერო დოკუმენტაციაში.
ინფორმაციისთვის, შესყიდვის გამოცხადების შესახებ 14 ნოემბერს გამოცხადდა. განაცხადების მიღება კი 11 დეკემბერს დაიწყო და 16 დეკემბერს შეწყდა.
ამ დროისთვის მუნიციპალური განვითარების ფონდის მიერ გამოცხადებული ტენდერი შერჩევა-შეფასების ეტაპს გადის. პრეტენდენტი შპს “ჯეოექსპერტია”, რომელიც სამუშაოების შესრულებას 2 862 000.00 ლარად აპირებს.
აღნიშნული კომპანია 2019 წელს არის რეგისტრირებული.
Tendermonotor.ge-ს ინფორმაციით, შპს “ჯეოექსპერტს” მონაწილეობა 134 ტენდერში აქვს მიღებული. მოგებული ტენდერების საერთო სავარაუდო ღირებულება _ 28,352,786 ლარს შეადგენს. მოგებული კონტრაქტების საერთო ღირებულება 26,547,618.60 ლარია. 19 გამარტივებული შესყიდვის ხელშეკრულებების საერთო ღირებულება 664,639.44 ლარია.
ინფორმაციისთვის, აღნიშნული კომპანია ახორციელებდა ჩოხატაურის მუნიციპალიტეტში დაბლაციხისა და იანეულის სოფლების დამაკავშირებელი საავტომობილო ხიდის სამშენებლო სამუშაოების ტექნიკურ ზედამხედველობას.
ავტორი
