სოციალურ ქსელ ფეისბუქში ფოტოგრაფი ბადრი ვადაჭკორია შატილის გზაზე დატრიალებულ ტრაგედიას გამოეხმაურა.
მისი ინფორმაციით, მომხდარი მძღოლის პასუხისმგებლობის საკითხია.
„კიდევ ერთი უდიდესი ტრაგედია მოხდა ჩვენს ქვეყანაში შატილისკენ მიმავალ გზაზე, 17 ახალგაზრდა დაიღუპა ავტოკატასტროფაში, გაოგნებული, უკიდეგანოდ შეწუხებული ვარ მომხდარი უბედურებით, არადა ეს გზა პარასკევს გავიარე მუცომდე და საღამოს თბილისისკენ მომავალმა.. გზა 2-ჯერ უკეთესია ვიდრე შარშან იყო და 10-ჯერ უკეთესი ვიდრე რამდენიმე წლის წინ… მე სულ რამდენიმე წუთია ვესაუბრე ჩემს მეგობარ ზაზა ხიზამბარელს რომელიც ყველაზე რთულ უბანს ხელმძღვანელობს. მისი საუბრიდან გავიგე, რომ მძღოლის პასუხისმგებლობა უფრო იკვეთება: მართალი გითხრა არ მომეწონა მძღოლი ან ძალიან გადაღლილი იყო ან კიდევ….როგორც მან იცის, უკვე სამშვიდობოს გადმოსულს მოსახვევში გაუსწრია წინ მიმავალ სატვირთოსთვის და დაჯახებია მოსახვევში მდგარ ბეტონმზიდს, რომელიც ბეტონს ასხამდა… და ორთავე მანქანა გადავარდა 80 მეტრის სიმაღლიდან… შედეგად დაიღუპა სულ ახალგაზრდა გოგო-ბიჭები და გაუბედურდა ვინ იცის რამდენი ოჯახი…
უდიდესი ტკივილით ვუსამძიბრებ თითოეული დაღუპულის ოჯახს და მთელს საქართველოს“,_ წერს ვადაჭკორია.
შეგახსენებთ, რომ მიკროავტობუსი 80 მეტრის სიმაღლიდან გადავარდა. მომხდარის შედეგად 3 დაშავებულის მდგომარეობა მძიმეა.
