სახელმწიფო აუდიტის მხრიდან გაჟღერებულ ბრალდებებთან დაკავშირებით, სადაც ის ლანჩხუთის მუნიციპალიტეტს ტრანსპორტის შენახვისა და ექსპლუატაციის ხარჯის გაწევისას საბიუჯეტო სახსრების რაციონალური და გონივრული ხარჯვის პრინციპების არ დაცვასა და მოქმედი კანონმდებლობის მოთხოვნების დარღვევაშიც ადანაშაულებს, საკუთარ პოზიციას აფიქსირებს ყოფილი გამგებელი ზაზა ურუშაძე.
აუდიტის დასკვნის მიხედვით, ირკვევა, რომ ყოფილ გამგებელს საკუთარი ავტომობილები გამგეობისთვის ჰქონდა მიქირავებული.
„2013 წლის თებერვალში, როდესაც დავინიშნე მუნიციპალიტეტის გამგებლად, მემსახურებოდა ავტომობილი, რომელიც, ფაქტობრივად, ამორტიზირებული და გამოუსადეგარი იყო. იმის გამო, რომ მუნიციპალიტეტს საშუალება არ ჰქონდა ახალი მანქანის შესაძენად, კონსულტაციების შემდეგ გადავწყვიტეთ, 1997 წელს გამოშვებული ჩემ საკუთრებაში არსებული „ფოლკსვაგენ პასატით“ მესარგებლა. სამი წლის შემდეგ მანქანის მდგომარეობა ისეთი იყო, რომ დიდ მანძილზე მისი სარგებლობა რისკებთან იყო დაკავშირებული“, _ აცხადებს ყოფილი გამგებელი.
ზაზა ურუშაძის თქმით, 2015 წლის ბოლოდან სარგებლობდა ოჯახის საკუთრებაში არსებული ავტომანქანა „ვოლვოთი“, რაზედაც იყო გაფორმებული ხელშეკრულება გამგეობასთან მხოლოდ საწვავის მოხმარებაზე.
„მინდა, სრული პასუხისმგებლობით განვაცხადო, რომ არც ერთი თეთრი „ვოლვოს“ შეკეთებაზე გამგეობის ბიუჯეტიდან არ დახარჯულა. დაინტერესებულ პირებს შეუძლიათ გამგეობაში გადაამოწმონ. რაც შეეხება „ფოლკსვაგენზე“ გაწეულ ხარჯებს, ესეც მიზერულია, 5 წლის განმავლობაში მხოლოდ ერთხელ მოხდა საბურავების შეძენა. აუდიტის დასკვნაში მოყვანილ ფაქტს, სადაც წერია, რამდენიმე თვის განმავლობაში ავტომანქანაზე გაწეულია ხარჯი, ხოლო ბენზინი ჩამოწერილი არ არის, მინდა გითხრათ, რომ ამ თვეების განმავლობაში ავტომანქანა იდგა რემონტზე და ბენზინი თავისთავად ვერ ჩამოიწერებოდა. 5 წლის განმავლობაში, რაც მე გამგებელი ვიყავი, ყოველთვის ვცდილობდი, რაც შეიძლება ეკონომიურად მომხდარიყო მუნიციპალიტეტის სახსრების ხარჯვა. ამას დაადასტურებს გამგეობის შესაბამისი სამსახურები. 5 წლის განმავლობაში 3 წელი მე მძღოლი არ მყოლია, ესეც დაზოგილი თანხებია. საქართველოს მასშტაბით, არა მგონია, მუნიციპალიტეტი მოიძებნოს, სადაც გამგებელს 500 ლიტრი საწვავი ექნება თვის განმავლობაში გამოყოფილი. მე არასდროს არ დამირღვევია კანონი და არც არასდროს დავარღვევ“, _ ამბობს ურუშაძე და დასძენს, რომ მას ვერანაირ კანონდარღევას ვერ უნახავენ.
„საინტერესოა, ვის და რაში სჭირდება ეს ყველაფერი. თუ ის ჯობდა, გამგებლად როგორც კი დავინიშნე, შავი „ტოიოტას“ 90- ათასიანი ჯიპი შემეძინა, როგორ სხვა მუნიციპალიტეტებში მოხდა?! დაინტერესებულმა პირებმა, ვისაც გინდათ, რამე მიპოვოთ, ეძებეთ და ეძებეთ. დარწმუნებული ვარ, ვერაფერს იპოვით, იმიტომ, რომ არც არაფერია მოსაძებნი. ისე არ დაგემართოთ, „თაგვმა თხარა, თხარა და კატა გამოთხარაო“, _ დასძენს ლანჩხუთის ყოფილი პირველი პირი.
