გარემოს დაბინძურების უამრავი ფაქტის მოწმე წლების მანძილზე ვართ. ხდება ისე, რომ ამ მხრივ წინსვლა არც კი შეიმჩნევა. მიუხედავად იმისა, რომ სოფლებში, დასახლებულ ადგილებში, ქალაქების მსგავსად, განთავსებულია სანაგვე ურნები, ბევრი პირდაპირ მდინარეში ისვრის ნაგავს, თან ტომრებით, პოლიეთილენის პარკებით…
ამჯერად საყოფაცხოვრებო ნარჩენების შესახებ ვისაუბრებთ, რომელიც არანაკლებ ზიანს აყენებს გარემოს, ვიდრე დიდი ქარხნების, სხვადასხვა საწარმოების საქმიანობისას წარმოქმნილი გამონაბოლქვი თუ სხვადასხვა ნარჩენები.
ოზურგეთის მუნიციპალიტეტში, მხოლოდ ქალაქ ოზურგეთის ტერიტორიაზე და შემოგარენში, მდინარე ბჟუჟის კალაპოტის გასწვრივ, სანაპიროების დათვალიერების შემდეგ, “გურია ნიუსმა” უამრავი ანტისანიტარიული ადგილები ნახა.
კონკრეტული ლოკაციების უმეტესობა, სადაც ნაგავია თავმოყრილი, მდინარის ნაპირების გასწვრივაა, რომელსაც აშკარად ატყვია მოსახლეობის სრული უპასუხისმგებლობის კვალი.
ჯორჯიაშვილის ქუჩის გასწვრივ, საკმაოდ ვრცელ მონაკვეთზე გრძელდება მდინარე ბჟუჟის კალაპოტი. ბუნებრივია, გაზაფხულზე და ზაფხულის დასაწყისში, აქ დანაგვიანების მასშტაბი მატულობს. თუმცა, მეტ-ნაკლებად ყოველთვის ხდება ნარჩენებით მდინარის კალაპოტის და თვით მდინარის და შემოგარენის დაბინძურება.
რაც უფრო მოახლოვდება ზაფხული და ტურისტული სეზონი დაიწყება, მოსალოდნელია უარესი მდგომარეობის ხილვა.
ჩვენ კონკრეტულად მდინარე ბჟუჟის კალაპოტის გასწვრივ არსებულ მდგომარეობას დავაკვირდით, რის შესახებაც მოსახლეობის წარმომადგენლებიც გვწერენ.
თუმცა, იგივე მოსახლეობის მხრიდან, მდინარეში გადაყრილი ნაგვის კვალი ჯორჯიაშვილის ქუჩის გასწვრივ ადვილი დასანახია.
მრავალსართულიანი ბინების ახლოს, სხვადასხვა ნარჩენები და ძველმანები პირდაპირ გადაყრილია მდინარეში, რომელიც ნაწილობრივ მაღალი ჯებირების კონტურებზეა შერჩენილი. სწორედ ეს ადასტურებს, რომ ძონძები მდინარის ჩამოტანილი კი არაა, ამ კონკრეტული ადგილიდანაა გადაყრილი.
უფრო მეტიც, იქვე, ქუჩის გასწვრივ, კორპუსების პირდაპირ, მიჯრითაა ჩამწკრივებული სანაგვე ურნები.
_ რა ვიცით, ვინ გადაყარა? ჩვენ ურნებში ვყრით ნაგავს. იქნებ, ვიღაცამ ღამით გამოიარა და მოიქნია ნაგავი და ძონძები მდინარეში?! გზისპირა ზოლი და მდინარის ნაპირი ერთმანეთს მიჰყვება. არ შველის ამ ხალხს ნაგვის ურნების დადგმა, _ უკმაყოფილოდ საუბრობენ აღნიშნულ კორპუსებში მცხოვრებლები.
თუ მდინარე ბჟუჟის ნაპირთან დადგებით, ნახავთ, როგორ მოაქვს მდინარეს პოლიეთილენის ტომრებში საგანგებოდ ჩაყრილი და თავმოკრული ნაგავი.
ქალაქის გარეუბანში, ექადიის დასახლებისკენ გამავალ ხიდთან, მარჯვენა მხარეს, სანაგვედ ქცეული საკმაო ტერიტორიაზე ბლომად ყრია როგორც საყოფაცხოვრებო, ისე, მყარი ნარჩენები, ირგვლივ კი მიწის გროვებია ჩამწკრივებული, სავარაუდოდ, ნაგვის დასაფარად.
აქვე, ექადიის მცხოვრებთა ნაწილის აზრით, ნაგავს მხოლოდ სხვა უბნებიდან ან სოფლებიდან მოსული ადამიანები ყრიან.
_ ღამით შემოდიან ჩუმად, მოაპირქვავებენ მანქანიდან, ან ტომრებით გადმოყრიან და სასწრაფოდ გაიქცევიან. ვინ შეხედავს? აქ ახლოს არაა დასახლება. შუა ქალაქში ყრიან ნაგავს და აქ გაუჭირდებათ დაყრა თუ შერცხვებათ? _ გვითხრა ორი შვილის მამამ, რომელსაც პატარები ბაღში მიჰყავდა და განმარტა, რომ ღონისძიებაა გასატარებელი, რათა ეს ნაგავსაყრელი სასწრაფოდ გაუქმდეს.
“გურია ნიუსი” ოზურგეთის მუნიციპალიტეტის მომსახურების ცენტრის დირექტორს, გია ანთაძეს დაუკავშირდა და ჰკითხა, რატომ ხდება ექადიის სასაფლაოსთან ახლოს, ბჟუჟის ნაპირთან, სხვადასხვა ნარჩენების და ნაგვის დაყრა.
_ სამიოდე დღის წინ ვიყავი იქ და არანაირი ნაგავი არ ეყარა. მიწას კი ყრიან. აღდგომის პერიოდში მანდ მნიშვნელოვანი სამუშაოები ჩავატარეთ. ყოველ ორ დღეში დავდივარ და ნაგავი არ შემინიშნავს. ალბათ, ახლად მიტანილია.
_ ნამდვილად ყრია უამრავი ნაგავი. ჩვენ მოსახლეობის წარმომადგენლებმა შეგვატყობინეს და როცა ადგილზე მივედით, ფაქტი დადასტურდა. გვაქვს ბევრი ფოტომასალაც…
_ აუცილებლად მივალ, დავათვალიერებ და თუ ნაგავი აღმოჩნდება, მალევე გავგზავნით მანქანას, რომ გავიტანოთ და გავასუფთავოთ იქაურობა, _ გვითხრა გია ანთაძემ.
როგორც ვთქვით, ნაგავსაყრელად ქცეულ ბჟუჟის ხიდის მიმდებარე ტერიტორიაზე, უამრავი ნარჩენი და ნაგავი ყრია და თუ დროზე არ მოხდა მისი გატანა, მდინარის ადიდების შემთხვევაში, დიდი ნაწილი წყალში აღმოჩნდება.
_ მდინარე ბჟუჟი ოზურგეთისთვის მხოლოდ მდინარე არ არის _ მაცოცხლებელი ჰაერია, საუცხოო გარემოს ქმნის, რომ ადამიანმა ცოტა ხნით დაისვენოს მის ნაპირებთან. ყველა ვერ გადის ზაფხულში ქალაქგარეთ. გული მოგიკვდება, ისე აბინძურებენ გარემოს. რამდენი აგიტაციაა, მუდამ გვესმის, რომ გარემოს მდგომარეობას თუ არ გავუფრთხილდით, კატასტროფა არ აგვცდება. ამდენი წლის განმავლობაში ადამიანის კულტურა უფრო უნდა ამაღლებულიყო. უარესი თვითდაზიანება რა უნდა მოახდინოს ადამიანმა? ახლა მაინც ყველგან დგას სანაგვე ურნები. კარგია, რომ დასჯადია ასეთი ქმედება, თუმცა, მეტი სიფხიზლე და ყურადღებაა საჭირო, რომ დაისაჯონ გარემოს დამბინძურებლები, _ კონკრეტული პირი იქნება ის თუ რომელიმე საწარმო, _ ამბობს “გურია ნიუსთან” ანასეულის ინსტიტუტის მეცნიერ-თანამშრომელი ლამზირი ბერიძე.
როგორც მან გვითხრა, ბჟუჟის სიახლოვეს ცხოვრობს. ხშირად თავად შეუგროვებია უმისამართოდ დაყრილი ნაგავი და მიუჩენია ადგილი.
ავტორი
