თუ რატომ არ დაასაქმეს ლანჩხუთში, სოფელ შუხუთის საჯარო სკოლაში ინგლისური ენის მასწავლებლის გამოცხადებულ ვაკანსიაზე, ამის თაობაზე ახალგაზრდა სერტიფიცირებულმა პედაგოგმა სოფია სამხარაძემ ფეისბუქზე საკმაოდ ვრცლად დაწერა. რასაც არაერთი გამოხმაურება მოჰყვა, როგორც სოციალურ ქსელში, ისე მედიასაშუალებების მხრიდან.
„გურია ნიუსი“ დაინტერესდა, როგორ განვითარდა სოფია სამხარაძის მხრიდან ფაქტის გასაჯაროების შემდეგ მოვლენები და რა რეაგირება მოჰყვა მას. ამ ყველაფერზე კი სამხარაძე ისევ ფეისბუქის საშუალებით ჰვება დეტალურად.
„კარგად გახსოვთ ჩემი და შუხუთის საჯარო სკოლის ამბები, თუ ვინმეს გაინტერესებთ, როგორ გაგრძელდა ეს ყველაფერი გეტყვით, რომ მათ ნაცნობ ადგილობრივებს, ვინც ეს პოსტი დააკომენტარა, ან გააზიარა უვარდებიან და ლანძღავენ. ზოგ მათგანს მესენჯერში, ზოგს კი პირისპირ. ის ხალხი, ვინც მათთვის პატივსაცემი და წარმოსადეგი გახლავთ (ისეთი, მაღაზიაში ან მესიჯებში გასალანძღად რომ ვერ შეუვარდებიან), მათ ესაურებიან პირისპირ, დიპლომატიურად და უყვებიან, რომ მე ნამდვილად არ მაქვს გარკვეული სტატუსი და ამიტომ ვერ ამიყვანეს სამსახურში (თითქოს ეს ჩემს პოსტში არ მეწერა). უყვებიან, როგორი უზრდელი და თავხედი ვარ, რომელმაც ცილი დასწამა და ტყუილად დაადანაშაულა ისინი. ისინი ზედმიწევნით მართალნი არიან, ამიტომ საჭიროდ თვლიან, სათითაოდ ყველას შინაურულად გაესაუბრონ და ისე დაამტკიცონ ეს.
ვერაფრით მიხვდნენ და გაიგეს, თუ რაზე ვწუხდი და რას ემსახურებოდა ჩემი პოსტი.
ის ადგილობრივები, ვინც კეთილგანწყობილნი იყვნენ ჩემ მიმართ, ახლა თვლიან, რომ მე ამ სკოლას ბოდიში უნდა მოვუხადო, თუ მინდა აქ ცხოვრების გაგრძელება და არსებობა.
ამ ყველაფერთან ერთად, ჩემი დედამთილის სახელზე, რომელიც საჯარო სამსახურში მუშაობს, დაწერეს საჩივარი. თურმე, ეშინიათ მის სამსახურთან გავლის, რომ ეს ემოციური და სრულიად უწყინარი ქალი აბულინგებს და სასწავლო პროცესს უშლის მასწავლებლებსა და მოსწავლეებს. აბრალებენ, რომ ზაირამ (ჩემმა დედამთილმა) ქვები დაუშინა ამ სკოლას და ასე დააშინა მასწავლებლები. თქვენ, თითოეული თქვენგანი, თქვენივე სიმართლის მიხედვით გადაიხდით ადრე თუ გვიან! როგორ არაფრის გეშინიათ, ან დაფიქრდით თუ გიღირთ, რა თანამდებობას ებღაუჭებით ასე, რომ ყველანაირ ტყუილს კადრულობთ?!
შუხუთის პედაგოგები აპირებენ სასამართლოში სარჩელის შეტანას, მაგრამ გადაიფიქრებენ მხოლოდ ორ შემთხვევაში _ თუ პოსტს ავიღებთ და ზაირა ბოდიშს მოიხდის იმის გამო, რომ კომისიის წევრებს „უუნარო“ უწოდა თავის ფესბუქგვერდზე.
აქვე, გესიამოვნათ თუ არა ის, რაც მე მეწერა, სიტყვა-სიტყვით სიმართლეა. ცხადია, სიმართლის გამო ბოდიშის მოხდას არ ვაპირებთ. მზად ვართ თქვენი სარჩელისთვის და რაც ყველაზე მთავარია, მზად ვართ საბჭოთა კავშირიდან შემორჩენილ ბრძოლის სხვადასხვა მეთოდებისთვისაც.
მადლობა ოჯახის წევრებს, რომლებიც მზად არიან ბოლომდე მხარში მედგნენ, რადაც უნდა დაუჯდეთ ეს! ვეძებ იურისტს, რომელიც დამეხმარება სამართლებრივად დავამტკიცო ჩემი სიმართლე და შევწყვიტო ეს პოსტობანა!
რაც შეეხება მოსაზრებას, რომ მე ამ რაიონში მომავალი არ მაქვს, ღმერთმა მშვიდობაში მოგახმაროთ ეს რაიონიცა და ქვეყანაც, რომელიც მზად არ არის სიმართლე იცოდეს საკუთარ თავზე!“ _ წერს სამხარაძე ფეისბუქზე.
ინფორმაციისთვის: რამდენიმე დღის წინ ფეისბუქის საშუალებით სოფია სამხარაძე განმარტავდა, რომ სკოლას, რეალურად, მისი კანდიდატურა არც კი განუხილავს და პირდაპირ უარით გამოისტუმრეს. მის ნაცვლად კი აიყვანეს კანდიდატი, რომელიც ორ სკოლაში უკვე მუშაობს და ეს მისი მესამე სამუშაო ადგილია.
„ჩემი პატივისცემა მას და არანაირი პიროვნული და პროფესიული პრობლემა არ მაქვს უშუალოდ ამ ადამიანთან. უბრალოდ, მინდა მოგიყვეთ, რა პირობებში და ვინ გადაწყვიტა ჩემი ბედი სრულიად განუხილველად.
გასაუბრებაზე დამიბარა ბატონმა კობა ფირცხალაიშვილმა, სკოლის დირექტორმა და დამახვედრა ჩემთვის სრულიად წარმოუდგენელი სიტუაცია. კანონის თანახმად, კომისია უნდა შედგებოდეს კენტი რაოდენობის წევრებისაგან, ხუთი წევრის ნაცვლად გასაუბრებას ესწრებოდა მხოლოდ ოთხი. გასაუბრება არის მთავარი საკონკურსო ეტაპი, რომელმაც უნდა გადაწყვიტოს ვაკანსიის ბედი. ამ ეტაპის შემდეგ ტარდება ფარული კენჭისყრა და ირჩევენ მათთვის უფრო საინტერესო და მისაღებ კანდიდატს. მაშასადამე, გასაუბრების საფუძველზე შესაძლოა, სკოლამ სტატუსის მიუხედავად, აირჩიოს პედაგოგი, თუ მას აქვს უფრო დიდი სტატუსის მქონესთვის უარის თქმის დასაბუთებული, არგუმენტირებული მიზეზები.
თუმცა, რა არგუმენტებზეა საუბარი, როდესაც ამ სკოლას ჩემი კანდიდატურა საერთოდ არ განუხილავს. შესვლისთანავე გამომიცხადეს, რომ ჩემი აყვანის უფლება არ აქვთ, რადგან არ მაქვს სერტიფიკატი, მეორე კანდიდატი კი სერტიფიცირებულია (რაც არის არასწორი და სიცრუე, სავარაუდოდ, ჩემი კონკურენტის უფროსი მასწავლებლის სტატუსს გულისხმობდნენ). მიჩნდება კითხვა _ მაშინ საერთოდ რისთვის დამიბარეს?!
კომისიის არცერთ წევრს არ უთქვამს, რომ უფროსმა მასწავლებელმა დააკმაყოფილა მათი ყველა მოთხოვნა, წარმატებით გაიარა გასაუბრებაც და ამ შემთხვევაში მასზე შეაჩერებენ არჩევანს, ამის ნაცვლად უბრალოდ მითხრეს, რომ არაფერი პირადული, უბრალოდ, ვერ ამიყვანდნენ, რადგან ამის უფლება არ ჰქონდათ, სანუგეშოდ კი მზად ჰქონდათ ფრაზები:
ა) „ჩვენ კი გვინდა შენი აყვანა, შენი მამამთილი ჩემი ახლობელია, მარა რა ვქნა, იმას სერტიფიკატი აქვს“; ბ) „შენ კი კაი გოგო ხარ, მარა იმან რო მიჩივლოს, რა პასუხი გავცე“; გ) „მაშინ თქვენ მოგვარდით“, _ მითხრა სკოლის დირექტორმა და იქვე დაურთო: „დაელაპარაკე იმ გოგოს, იქნებ მოხსნას თავის კანდიდატურა შენს სასარგებლოდ“. სამწუხაროდ, ყველა ფრთიანი წინადადება არ დამამახსოვრდა.
იმის ნაცვლად, რომ გასაუბრებაზე საკუთარ უპირატესობებზე მესაუბრა და ჩემი თავი წარმომედგინა მათთვის, მომიწია ახსნა, რომ კი, ის სტატუსით ჩემზე მეტია, მაგრამ მთავარი საკონკურსო ეტაპის ეს გასაუბრებაა და უბრალოდ, ვთხოვდი, ეღიარებინათ ჩემი არსებობა და განეხილათ ჩემი კანდიდატურა. ვეუბნებოდი, რომ რადგან საბუთებმა ამ ეტაპამდე მიმიყვანა, ე.ი. არ ვიყავი უშანსოდ. მოკლედ, ჩემი ბედი გადაწყვიტა კომისიამ, რომელმაც არ იცოდა საკუთარი ფუნქცია-მოვალეობები, რომელსაც აკლდა ერთი წევრი, რომელმაც გაასაჯაროვა ჩემი კონკურენტის პირადი ინფორმაცია და რომელსაც ჩემი რეზიუმედან მხოლოდ ნაწილი ჰქონდა ამობეჭდილი, ანუ მათ საბუთებში არ ედოთ ჩემი დიპლომი და ცნობა, გამოცდის ჩაბარების შესახებ“, _ წერდა სამხარაძე ფეისბუქზე.
შუხუთის საჯარო სკოლის დირექტორის კობა ფირცხალაიშვილის თქმით, შუხუთის საჯარო სკოლაში გამოცხადებული იყო ინგლისური ენის მასწავლებლის ვაკანსია, სადაც დარეგისტრირდა ორი კანდიდატი. ერთ-ერთი მათგანი გახლდათ, სოფია სამხარაძე, პროფესიით ფილოლოგი.
„იგი არის მაძიებელი მასწავლებელი, რადგან ჩაბარებული აქვს მხოლოდ საგნის გამოცდა და არა აქვს გავლილი, არც კანონით გათვალისწინებული 60-კრედიტიანი პროგრამა, ხოლო მეორე კანდიდატი სერტიფიცირებული მასწავლებელია სრულად“, _ განმარტავდა დირექტორი და იქვე იმასაც დასძენდა, რომ კონკურსი ჩატარდა კანონის სრული დაცვით და ამ შემთხვევაში, სოფია სამხარაძის ადგილას საკუთარი შვილიც რომ ყოფილიყო, ვერ აიყვანდა აღნიშნულ ვაკანსიაზე, იმიტომ, რომ მეორე კანდიდატს შეეძლო გაესაჩივრებინა და ის იქნებოდა მართალი.
[sexy_author_bio]
