სახელმწიფო ინტერესები დგას პირველ ადგილზე ყოველთვის და ყოველ დღეს ამიტომ დავით გარეჯის საკითხს ნუ დავუკავშირებთ არჩევნებს, – განაცხადა თავდაცვისა და უშიშროების კომიტეტის თავმჯდომარემ, ირაკლი სესიაშვილმა.
მისი თქმით, დავით გარეჯის საკითხთან დაკავშირებით მომხდარი ფაქტი გამაოგნებელია.
„გაოგნებული ვარ იმის გამო, რომ რუკა, რომლითაც საერთაშორისო სამართლის მიხედვით, ორ ქვეყანას შორის შეთანხმების მიხედვით, ჩვენ უნდა გვეხელმძღვანელა და სამართლიანად მოგვეხდინა საზღვრის დემარკაცია ორ ქვეყანას შორის, რომელზეც გვიმტკიცებდნენ, რომ დაკარგულია და არ არსებობდა და ამის გამო ჩვენი პოზიციები იყო წამგებიანი, აღმოჩნდა, რომ ეს რუკა არსებობს, არსებობს ორიგინალური ვერსია. რუკა ინახებოდა თუ გადამალული იყო, ეს ალბათ გამოძიებამ უნდა დაადგინოს. საერთო ჯამში მხარეები ხელმძღვანელობდნენ იმ რუკებით, რომლის ფარგლებშიც ზიანდებოდა ჩვენი სახელმწიფო და რომლის ფარგლებშიც ჩვენი სახელმწიფო უარს აცხადებდა 3500 ჰექტარ მიწაზე, მათ შორის იმ ტერიტორიაზე, რომელიც წარმოადგენს ჩვენი ქვეყნის სიწმინდეებს. გამოძიებამ უნდა დაადგინოს ვინ დგას ამ მძიმე ფაქტის უკან, ქმედებით მოხდა თუ უმოქმედობით და ვინმეს დავალებით ამ რუკის შენახვა და გადამალვა“, – განაცხადა ირაკლი სესიაშვილმა რომელიც ასევე მიიჩნევს, რომ ეს საკითხი, არანაირად არ უკავშირდება არჩევნებს, რამდენადაც აქ საუბარია სახელმწიფო ინტერესებზე, რომელიც პირველ ადგილზე დგას ყოველთვის და ყოველ დღე.
პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.
