დავით კირვალიძე სოფლისა და სოფლის მეურნეობის განვითარების საკითხებში საქართველოს პრემიერ-მინისტრის მრჩევლად დაინიშნა. შესაბამის განკარგულებას გიორგი კვირიკაშვილმა ხელი უკვე მოაწერა.
კირვალიძე სოფლის მეურნეობის მინისტრი იყო. მან თანამდებობა 2013 წლის 2 მაისს, მას შემდეგ დატოვა, რაც სამინისტროს მაღალჩინოსნები სახელმწიფოს კუთვნილი განსაკუთრებით დიდი ოდენობით თანხების გაფლანგვის, სამსახურებრივი გულგრილობისა და ექსპერტებზე ზეწოლის ბრალდებით, თუმცა, მოგვიანებით, ეს ბრალი არ დაუმტკიცდათ.
კირვალიძე ყოფილი პრემიერ-მიისტრის ბიძინა ივანიშვილის რჩეული მინისტრი იყო და გადამდგარ პრემიერს არაერთხელ უთქვამს, რომ კირვალიძის ადგილი მთავრობაში იყო. ივანიშვილი ამბობდა, რომ ირაკლი ღარიბაშვილს ყოფილი მინისტრის თანამდებობაზე აღდგენა ორჯერ სთხოვა, თუმცა, ღარიბაშვილმა ეს არ გაითვალისწინა.
„კარგად ვიხსენებ კირვალიძეს, რომელიც იყო ჩემი ფავორიტი მინისტრი, როგორ კულტურულად მოიქცა როდესაც კითხვები დაისვა, როგორ კულტურულად გადადგა. მისი დაბრუნება ორჯერ შევახსენე ღარიბაშვილს და არ გააკეთა. ეს ხელწერაა, რომელიც ჩვენ მოვიტანეთ განსხვავებით იმისგან, რაც „ნაციონალურ მოძრაობას“ ჰქონდა. მათ ჰქონდათ ყველაფრის უფლება და კანონს არაფრად არ დაგიდევდათ, საშინელ დღეში ყავდათ მთელი მოსახლეობა“, – აღნიშნა ერთ-ერთ ინტერვიუში ივანიშვილმა.
დავით კირვალიძე ამერიკული ორგანიზაცია CNFA-ის დირექტორთა საბჭოს წევრია. CNFA აშშ-ის მთავრობის საერთაშორისო პროექტებს 20-ზე მეტ ქვეყანაში ახორციელებს.
პრემიერის პრესსამსახურის ცნობით, მან 2006 წლიდან დღემდე CNFA-მ საქართველოში 10-მდე მნიშვნელოვანი პროექტი განახორციელა.
დავით კირვალიძე არის სოფლის მეურნეობის მეცნიერებათა დოქტორი, პროფესორი. წლების განმავლობაში იგი კითხულობდა ლექციებს საქართველოს აგრარულ უნივერსიტეტში, აშშ-საქართველოს ეკოლოგიისა და გარემოს დაცვის ინსტიტუტსა და მერილენდის უნივერსიტეტში (აშშ). დავით კირვალიძე ორჯერ იყო საქართველოს სოფლის მეურნეობის მინისტრი და საქართველოს პარლამენტის აგრარულ საკითხთა კომიტეტის თავმჯდომარე.
