დაზიანებული ხიდებიდან ტენდერებამდე: რა ეტაპზეა ჩოხატაურში სტიქიით დაზარალებული სოფლების დახმარების პროცესი

ჩოხატაურის მუნიციპალიტეტში, გუთურის ადმინისტრაციულ ერთეულში სტიქიის შედეგად დაზიანებული ბ. თოხაძის უბანში, საავტომობილო ხიდის აღდგენის სამუშაოები, ჯვარცხმის ადმინისტრაციულ ერთეულში სოფ. ინტაბუეთში სტიქიის შედეგად დაზიანებული საავტომობილო ხიდის აღდგენის სამუშაოები, ზოტის ადმინისტრაციულ ერთეულში სტიქიის შედეგად დაზიანებული თეთრ ღელეზე საავტომობილო ხიდის აღდგენის სამუშაოები, ამაღლების ადმინისტრაციულ ერთეულში ბიკნარას ხიდის აღდგენისა და გაბიონის მოწყობის სამუშაოები-ს ექსპერტიზა გავლილი საპროექტო-სახარჯთაღიცხვო დოკუმენტაციის შეძენა, _ ამას ითვალისწინებს ჩოხატაურის მუნიციპალიტეტის მერიის მიერ 26 იანვარს გამოცხადებული ელექტრონული ტენდერი აუქციონის გარეშე, ხელშეკრულების  სავარაუდო ღირებულებით 7200 ლარი, რომელიც ადგილობრივი ბიუჯეტიდან უნდა დაიხარჯოს.

როგორც ტენდერების გვერდიდან tenders.procurement.gov.ge, ირკვევა, ამ დროისთვის ტენდერი შეფასება-შერჩევის ეტაპზეა.

9 თებერვლის მდგომარეობით, შპს „არტი“ აღნიშნული სამუშაოების შესრულებას მერიას 5300 ლარად სთავაზობს.

კომპანიის დირექტორი ნიკა ტრაპაიძეა, ხოლო 100%-იანი მფლობელი თამაზ ტრაპაიძე.

აღნიშნულ კომპანიას ჩოხატაურში არა ერთი ტენდერი აქვს მოგებული _ მაგალითად, მან 2024 წელს განახორციელა სოფელ ხევში გიორგი მამალაძის ეზოსთან საყრდენი კედლის მოწყობა; სოფელ დაბლაციხეში ელიოტ ხაბეიშვილის უბანში საავტომობილო გზის რეაბილიტაცია; დაბა ჩოხატაურში, ლევან გოგოლაძის ეზოსთან ბეტონის საყრდენი კედლის მოწყობა.

გარდა ამისა, კომპანიამ მოამზადა სოფელ ხევში გიორგი მამალაძის ეზოსთან საყრდენი კედლის მოწყობის საპროექტო სახარჯთაღრიცხვო დოკუმენტაცია _ კონტრაქტის ღირებულებამ  3 740 ლარი შეადგინა და და 2024 წლის მარტში დაბასა და ადმინისტრაციულ ერთეულებში სტიქიის (ძლიერი ქარი) შედეგად დაზიანებული 20 ერთეული საცხოვრებელი სახლის სახურავების აღდგენისათვის საპროექტო-სახარჯთაღრიცხვის დოკუმენტაცია,  ღირებულებით 2 000 ლარი.

მანვე 2024 წლის იანვარში განახორციელა  შემდეგი სამუშაოები:

1.ერკეთის ადმინისტრაციულ ერთეულში, ზემო ერკეთში ჩანტლაძეების უბანში (ლ. კოტრიკაძის ეზოდან ნ. ჩანტლაძის ეზომდე) სავალი ნაწილის რეაბილიტაცია;

2. ერკეთის ადმინისტრაციულ ერთეულში, ქვემო ერკეთში ლ. თედორაძის უბანში არსებული ხიდის რეკონსტრუქცია;
3. ერკეთის ადმინისტრაციულ ერთეულში, ქვემო ერკეთში პარკის მოწყობა;
4. ერკეთის ადმინისტრაციულ ერთეულში, ქვემო ერკეთში ყოფილ სკოლასთან არსებული მილხიდის დემონტაჟი და ახალი მილხიდების მონტაჟი;
5. ბუკისციხის ადმინისტრაციულ ერთეულში, სოფ. იანეულში, მაედანას უბანში მინი სტადიონის მოწყობა;
6. დაბლაციხის ადმინისტრაციულ ერთეულში (ცენტრალური გზიდან ს. პაიჭაძის ეზომდე) გზის რეაბილიტაცია;
7. ბუკისციხის ადმინისტრაციულ ერთეულში, სოფ. იანეულში (ცენტრალური გზიდან გ. მახარაძის ეზოს მიმართულებით) გზის რეაბილიტაცია;
8. ზოტის ადმინისტრაციულ ერთეულში, ცენტრალური გზის (თ. ჭაღალიძის ეზოდან ასფალტის შეერთება) სავალი ნაწილის რეაბილიტაცია;
9. ჯვარცხმა-ვაზიანის შიდა გზის რეაბილიტაცია, ს. ბოლქვაძის ეზოდან ვაზიანის სასაფლაომდე;
10. გორაბაერეჟოულში, მეფარიშვილების შესახვევიდან როლანდი დოლიძის ეზომდე გზის რეაბილიტაცია;
11. დაბა მუხების უბანში სკვერის მოწყობა;
12. საჭამიასერში, სოფელ ქვემოხეთში, ტაძრის მიმართულებით გზის რეაბილიტაცია;
13. სამების ცენტრში სკვერის მოწყობა;
14. სამების ცენტრალურ გზასთან 201 მეტრიანი გზის მოწყობის საპროექტო სახარჯთაღრიცხვო დოკუმენტაციის მომზადება. კონტრაქტის ღირებულება 32 300 ლარი შეადგენს.

იმის დასაზუსტებლად, თუ კონკრეტულად რომელი სტიქიის დროს დაზიანდა აღნიშნული მონაკვეთები, მერიის პრესსამსახურს დავუკავშირდით, თუმცა, სტატიის მზადების პროცესში მათგან კონკრეტული პასუხი ვერ მივიღეთ და მიღების შემთხვევაში მას აუცილებლად შემოგთავაზებთ.

მერიის პრესსამსახურს კითხვით 8 თებერვალს მივმართეთ, 9 თებერვლის დილას გვითხრეს, რომ პასუხებს ცოტა ხანში მოგვაწვდიდნენ, თუმცა, მოგვიანებით  აგვიხსნეს, რომ  მათ, ვინც ჩვენს კითხვებს უნდა უპასუხონ,  „სოფლის მხარდამჭერი პროგრამის“ ფარგლებში მოსახლეობას ხვდებოდნენ და ამის გამო პასუხს დღის ბოლომდე მოგვაწვდიდნენ, თუმცა, წერილის მომზადების დამთავრებისას პასუხი მიღებული არ გვქონდა.

„გურია ნიუსი“  მასალას პასუხის მიღების შემთხვევაში გაანახლებს.

მაქამდე კი ვიდრე ტენდერის გამარჯვებული საბოლოოდ გამოვლინდება  და კონკრეტული ვადები განისაზღვრება აღნიშნული სამუშაოების განსახორციელებლად, დიდთოვლობის დროს დაზარალებული მოსახლეობა ისევ დახმარებას ელოდება.