„ფიორენტინასთან“ მარცხის შემდეგ, „ნაპოლის“ პრეზიდენტი აურელიო დე ლაურენტისი თავისი გუნდის თამაშით და შედეგებით შეშფოთებულია.
გამოცემა „Il Mattino“-ს მტკიცებით, დე ლაურენტისი მატჩის შემდეგ შეშფოთებული, იმედგაცრუებული და გაბრაზებული იყო, ის გუნდის გასახდელშიც ჩავიდა, თუმცა, ჯერჯერობით, რუდი გარსიასთან პირადად არ უსაუბრია.
გამოცემის ინფორმაციით, ფრანგი სპეციალისტის პოზიცია კლუბში არ არის მყარი და დაკვირვების ქვეშაა. თუ უახლოეს პერიოდში სიტუაცია არ შეიცვლება, შეიძლება გარსია მალე დაითხოვონ. ყველაფერი მომდევნო მატჩებზე იქნება დამოკიდებული. გარსიას სავარაუდო შემცვლელთა შორის ანტონიო კონტესა და იგორ ტუდორს ასახელებენ.
„ნაპოლის“ წაგებამ ნეაპოლელი გულშემატკივრების უკმაყოფილება გამოიწვია და ფრანგი სპეციალისტი სტვენით გააცილეს.
“ნაპოლის” ქომაგებმა ჟურნალისტებთან საუბრისას განაცხადეს, რომ გარსიამ გუნდი რაც შეიძლება მალე უნდა დატოვოს, კლუბის პრეზიდენტმა აურელიო დე ლაურენტისმა კი მის ნაცვლად ანტონიო კონტე მოიწვიოს, რომელიც ამჟამად უმუშევარია.
“რუდი გარსია რაც შეიძლება სწრაფად უნდა წავიდეს, კიდევ გვაქვს დრო, რომ სეზონი გადავარჩინოთ. სასწრაფოდ ახალი მწვრთნელი გვჭირდება. პირადად მე ანტონიო კონტეს დაუფიქრებლად ავიყვანდი.
ანტონიო კონტემ განაცხადა, რომ ის მზადაა ნეაპოლში ფეხით ჩამოვიდეს. სასურველი მწვრთნელები ანტონიო კონტე ან ფაბიო კანავარო არიან. ისინი ფეხბურთელებს ენთუზიაზმს დაუბრუნებენ.
გარსიამ აქ მუშაობა ვეღარ უნდა გააგრძელოს, დე ლაურენტისმა ახალი მწვრთნელის მოძებნა უნდა დაიწყოს”, – აცხადებენ “ნაპოლის” ქომაგები.
„ნაპოლის“ მთავარმა მწვრთნელმა რუდი გარსიამ კი თამაშის შემდეგ განაცხადა რომ იმედგაცრუებულია, რადგან ასეთ თამაშს მისი გუნდისგან არ ელოდა.
„იმედგაცრუებული და დამწუხრებული ვარ, რადგან ჩვენგან ასეთ თამაშს არ ველოდი. ცუდი შედეგია. პირველი გოლი არ უნდა გაგვეშვა, გათანაბრების შემდეგ კი უნდა გვქონოდა ბიძგი, რათა შეგვეცვალა მატჩის ინერცია. სამწუხაროდ, დაცვაში შეცდომები დავუშვით, მაგრამ ასევე შეტევაში. გვქონდა საგოლე მომენტები, რაც შეცვლიდა მატჩის მსვლელობას. იყო აგრესიის ნაკლებობა.
პასუხისმგებლობას ვიღებ წაგებაზე, მაგრამ არ ვფიქრობ, რომ შეცვლები არასწორად გავაკეთე. ვცდილობდი, რასპადორით შეტევაში სიახლე შემეტანა, შემდეგ სიმეონე შევიყვანე და ორი ფორვარდით ვერ ვითამაშებდით, რადგან ნახევარდაცვა გვჭირდებოდა. ახლა უნდა შევინარჩუნოთ სიმშვიდე. ახლა ჩემპიონთა ლიგის ზონაში არ ვართ და პირველი მიზანია ოთხეულში დაბრუნება, ვეცდებით, რამდენიმე მატჩი ზედიზედ მოვიგოთ. თუ კარგად ვიმუშავებთ, სიმართლეს დრო გამოაჩენს.
ფანების სტვენა? ისინი მართლები არიან, რადგან სახლში წაგებით ბედნიერი ვერ იქნებიან. ყველანი გაბრაზებულები ვართ, უკეთესს შედეგს ველოდით. ვერონაში უნდა გავიმარჯვოთ. სანამ ზედიზედ 3 თამაშს არ მოვიგებთ, ოთხეულში ვერ შევალთ“, – თქვა გარსიამ.
„ნაპოლიმ“ მიმდინარე სეზონში მესამე მარცხი განიცადა და ყველა საკუთარ მოედანზე – „ლაციოსთან“, „რეალსა“ და „ფიორენტინასთან“. ნეაპოლური კლუბი რვა ტურის შემდეგ სერია A-ში 14 ქულით მეხუთე ადგილზეა და 21 ოქტომბერს, სტუმრად „ვერონას“ შეხვდება.
„ნაპოლის“ კაპიტანმა ჯოვანი დი ლორენცომ კი „ფიორენტინასთან“ მატჩის შემდეგ მატეო პოლიტანოს რეაქციაზე ისაუბრა.
ხვიჩა კვარაცხელიას და ვიქტორ ოსიმენის შემდეგ, ამჯერად პოლიტანომ გამოხატა ღიად უკმაყოფილება რუდი გარსიას მიმართ, როდესაც ის მოედნიდან გაიყვანა.
„აუცილებლად უნდა ავირიდოთ გარკვეული ტიპის დამოკიდებულებები. ახლა ხმაური მეტია, რადგან შედეგები არ გვაქვს, მაგრამ ეს არის ის, რაც ნამდვილად არ უნდა გავაკეთოთ. პატივი უნდა ვცეთ მათ, ვინც შეცვლაზე შემოდის და გარსიას არჩევანს, თუმცა ეს არის საკითხი, რაც გასახდელში გვარდება. ცხელ გულზე შეიძლება იყოს რეაქცია, მაგრამ ამ მომენტში ეს ძალიან ხშირად ხდება და ეს კარგი არ არის“, – თქვა დი ლორენცომ.
როგორ ითამაშა ხვიჩა კვარაცხელიამ. იტალიურმა მედიამ ქართველის თამაში საშუალო ქულებით შეაფასა.
Calcionapoli1926 – 5.5 ქულა: “ბევრი დრიბლინგი, განსაკუთრებით პირველ ტაიმში, მაგრამ თამაშზე გავლენის გარეშე. შეგვიძლია მას დავუფასოთ, რომ ხშირად ცდილობდა რაღაცის შექმნას”.
Tuttonapoli – 5.5 ქულა: “კარგი სტარტი ჰქონდა, მერე კაიოდემ მის წინააღმდეგ ზომები მიიღო და ბოლოს კვარას ნერვიულობაც დაეტყო. მატჩის ქაოტურ დასასრულში ის რაღაცის გამოგონებას ცდილობდა, მაგრამ თანაგუნდელები ვერ უგებდნენ”.
Tuttomercatoweb – 6 ქულა: “რთულ მომენტებში ცდილობს თანაგუნდელები მხრებით ატაროს და ეძებს სივრცეს, რომ თავისი თამაშით გავლენა მოახდინოს. უკეთესი იყო, როდესაც მარჯვენა ფლანგზე გადავიდა”.
Calciomercato – 5.5 ქულა: “გამონათებები, განსაკუთრებით მაშინ, როდესაც მას თავისუფალი სივრცეები აქვს. თუმცა, მთლიანობაში კაიოდემ აჯობა. როდესაც მარჯვნივ გადავიდა, უფრო სახიფათო გახდა”.
ავტორი
