წინა კვირას გავრცელდა ინფორმაცია რომ ფრანგული „მეცისა“ და საქართველოს ეროვნული გუნდის თავდამსხმელი გიორგი მიქაუტაძის შეძენა „მილანს“ სურდა. გუშინ ამ თემას გამოცემა „calcioline“ დაუბრუნდა:
„გიორგი მიქაუტაძე „მილანს“ ახლახან დაუკავშირეს. კლუბის მენეჯმენტი აკვირდება ფეხბურთელს, რადგან შეტევაში შემადგენლობას განახლება სჭირდება. ტექნიკური დირექტორი პაოლო მალდინი ცდილობს მოძებნოს ხარისხიანი და შედეგიანი თავდამსხმელები ხელმისაწვდომ ფასად.
22 წლის ქართველმა ფეხბურთელმა ფრანგული „ლიგა 2“-ის 35 მატჩში 23 გოლი გაიტანა. გარდა ამისა, მისი ფასი დაბალია და „მილანი“ 10 მილიონი ევროს შეთავაზებით იმედოვნებს, რომ ტრანსფერის წარმატებით დახურვას მოახერხებს“.
გიორგი მიქაუტაძეს „მეცთან“ ხელშეკრულება 2026 წლის ზაფხულამდე აკავშირებს. ქართველ ფეხბურთელს აგრეთვე „ბარნლის“, „უდინეზესა“ და „ჯენოასაც“ უკავშირებდნენ.
გუშინ, დღის მეორე ნახევარში გიორგი მიქაუტაძეს ახალი მსურველი გამოუჩნდა. გამოცემა „Le10sport“-ის მტკიცებით, ქართველის შეძენა კლუბ „ლიონს“ სურს.
„ლიონი“ მიქაუტაძეს უკვე რამდენიმე თვეა აკვირდება, თუმცა, „მეცისთვის“ კონკრეტული შეთავაზებით ჯერ არ მიუმართავს. ლიონელებს ის თანხა აშინებთ, რომელსაც ქართველი ფორვარდის ამჟამინდელი კლუბი ითხოვს. ბოლო მონაცემებით, „მეცი“ მიქაუტაძის ფასს ზრდის და 15 მილიონ ევროზე ნაკლებად არ დათმობს. არადა, „ლიონში“ ქართველი ფეხბურთელის წარსულს ძალიან აფასებენ. ის სწორედ ლიონშია დაბადებული, ამ კლუბის აღზრდილია და ახალგაზრდულ დონეზე მათ ღირსებასაც იცავდა.
ლიონელთა მთავარი კონკურენტები ინგლისური კლუბები – „ბარნლი“ და „ვულვერჰემპტონი“ იქნებიან, რომლებიც საჭიროების შემთხვევაში, აღნიშნული თანხის გადახდაზე უკან არ დაიხევენ. ამ კლუბების მთავარი მიზანი ის იქნება, რომ მომავალ სეზონში პრემიერლიგაში ადგილები შეინარჩუნონ. „ვულვზის“ შემთხვევაში, ისიც სათქმელია, რომ კლუბს რაულ ხიმენესი ტოვებს და ხულიან ლოპეტეგიმ მის შემცვლელზე უნდა იზრუნოს“. – დაწერა გამოცემამ.
ჯერ კიდევ გადაუწყვეტელია „ნაპოლის“ მომავალი მთავარი მწვრთნელის საკითხი. წესითა და რიგით ნეაპოლური გუნდი ესპანელ ლუის ენრიკეს უნდა ჩაებარებინა, მაგრამ ბოლო მომენტში ამ თანამდებობის დაკავება იუარა.
ლუჩანო სპალეტის სავარაუდო შემცვლელების შესახებ ინფორმაციები ყოველდღე ვრცელდება.
გამოცემა „Sky Sport“-ის ცნობით, „ნაპოლის“ მომდევნო სეზონიდან ახალი მწვრთნელი ეყოლება – სერჟიო კონსეისაო. პორტუგალიელ სპეციალისტს ნეაპოლელები წელიწადში 6 მილიონ ევროს სთავაზობენ და „პორტუს“ ამჟამინდელი თავკაციც მზადაა მოლაპარაკებების მაგიდასთან დაჯდეს.
აურელიო დე ლაურენტისის სიაში კონსეისაო ერთადერთი არაა. „ნაპოლის“ ასევე უკავშირებენ ვინჩენცო იტალიანოსა და ტიაგო მოტას, რომლებიც შესაბამისად, „ფიორენტინასა“ და „ბოლონიას“ ავარჯიშებენ.
ვეტერანმა იტალიელმა ფეხბურთელმა ანტონიო კასანომ „Bobo TV“-ის ეთერში „ნაპოლის“ შესახებ ისაუბრა.
„დე ლაურენტისს მწვრთნელებთან პრობლემები ყოველთვის ჰქონდა, მაგალითად მაურიციო სარისთან, კარლო ანჩელოტისთან, ახლა კი უთანხმოებას ადგილი ლუჩანო სპალეტისთანაც ჰქონდა. შეგიძლიათ დამისახელოთ სპეციალისტი, რომელიც კლუბის პრეზიდენტისგან ამგვარ დამოკიდებულებას აიტანს? პირადად მე, ასეთი მწვრთნელი მხოლოდ ერთი ვიცი და ეს მასიმილიანო ალეგრია.
დარწმუნებული ვარ, მას სეზონის ბოლოს „იუვენტუსი“ გაათავისუფლებს და დე ლაურენტისი გუნდს მას ჩააბარებს, ჩემი აზრით, ალეგრის „ნაპოლიში“ დანიშვნა მხოლოდ დროის ამბავია“. – განაცხადა ანტონიო კასანომ.
გამოცემა „Il Mattino“-ს მტკიცებით, თავად ლუჩანო სპალეტი თავის მემკვიდრედ ფაბიო კანავაროს მიიჩნევს.
„ლუჩანო სპალეტის არ შეუძლია და ამავდროულად, არ სურს ვინმესკენ ხელის გაშვერა, თუ ვინ უნდა დაინიშნოს მთავარ მწვრთნელად, თუმცა დროთა განმავლობაში სახელი მაინც გაჟღერდება.
თუ ლუჩანოს შეეძლება, რომ ერთი მწვრთნელი აირჩიოს, ეს ფაბიო კანავარო იქნება. აწ უკვე „სერია A“-ს გამარჯვებული სპეციალისტი დარწმუნებულია, რომ ფაბიოს შეუძლია სიტუაცია კიდევ უფრო მეტად განავითაროს“, – დაწერა გამოცემამ.
ავტორი
