ლატვიის სურსათისა და ვეტერინარული სამსახურის (PVD) ინფორმაციით, ქვეყანაში ფრინველის გრიპის შემთხვევები დაფიქსირდა. ამის შესახებ ინფორმაციას Delfi ავრცელებს.
გამოცემის ინფორმაციით, ლაბორატორიული გამოკვლევების მიხედვით, იურმალაში ძინტარის პლიაჟზე ფრინველის გრიპით დაინფიცირებული ორი მკვდარი გედი იპოვეს. ეს ლატვიის ისტორიაში ფრინველის გრიპის პირველი შემთხვევაა.
როგორც Delfi წერს, სურსათისა და ვეტერინარული სამსახური მოუწოდებს მოქალაქეებს, შინაური ფრინველები შემოღობილი კონსტრუქციების მიღმა არ გაუშვან და გარეულ ფრინველებთან მათი ყველანაირი კონტაქტი აღკვეთონ.
ბოლო 4 თვის განმავლობაში ფრინველის გრიპის შემთხვევები ნიდერლანდებში, დიდ ბრიტანეთში, დანიაში, შვედეთში, ხორვატიაში, პოლონეთში, ბელგიაში, ირლანდიაში, უნგრეთში, ლიეტუვაში, სლოვენიაში, ესპანეთში, ნორვეგიაში და უკრაინაში დაფიქსირდა. ხოლო რუმინეთში და სლოვკეთში გარეული ფრინველების გრიპი დაფიქსირდა.
ფრინველის გრიპი ინფექციური ვირუსული დაავადებაა, რომელიც გავრცელებულია ფრინველთა შორის. თუმცა, იშვიათ შემთხვევებში, იგი ადამიანზეც ახდენს გავლენას. ფრინველის გრიპის მრავალი ტიპი არსებობს, რომელიც ზემოქმედებს ადამიანთა უმრავლესობაზე. უკანასკნელ წლებში, ორი სახის გრიპმა გამოიწვია დიდი შეშფოთება: H5N1 (1997 წლიდან) და H7N9 (2013 წლიდან).
მიუხედავად იმისა, რომ ვირუსი ადვილად არ აინფიცირებს ადამიანებს და როგორც წესი, არ არის გადამდები ადამიანიდან ადამიანზე, მსოფლიოში რამდენიმე უკვე დაავადდა და ზოგ შემთხვევაში, ეს გარდაცვალებითაც დასრულდა.
