ლანჩხუთელ პოეტს თემურ ფირცხალაიშვილს 20 ივლისს 60 წელი შეუსრულდებოდა, მისი სახელობის შემოქმედთა მუზეუმი კი ამ დღეს 10–ის გახდა. სწორედ შემოქმედთა მუზეუმში აღინიშნა ეს ორი საიუბილეო თარიღი მუზეუმის ხელმძღვანელის დარეჯან ბიწაძისა და მისთანამშრომელთა ძალისხმევით.
„20 ივლისი… დღე, რომელსაც სამეგობრო ყოველთვის სიხარულით აღვნიშნავდით… იყო მოლხენა, იუმორი, ლექსთა გადაძახილ-გადმოძახილი, სითბო და სიყვარული… ამ დღეს ჩემი მეგობარი თემურ ფირცხალაიშვილი დაიბადა… ამით ჩვენ მას სიხარულს ვჩუქნიდით, როგორც პატარას, ისე უხაროდა “დღეობა”, ის კი ჩვენ პოეზიის ზეიმს გვაზიარებდა…
ასეთი იყო ჩვენი თემო (გალა) მუდამ მხიარული, იუმორით, ენამოსწრებული… ეს გარეგნულად.. თორემ გული კი დარდიანი, ფიქრიანი ჰქონდა… “მარტოობა გულის ძარღვებს წყვეტს”… “ჩემს დარდს არავინ იყოფს”… “გულში ხშირად მწუხარება”…
20 ივლისი… დღეს 60 წლის გახდა ჩვენი თემო, სამწუხაროდ, ადრე დაგვტოვა, მაგრამ დაგვიტოვა მისი შემოქმედება, დაგვიტოვა მოყვასის სიყვარული… “გულიც რომ მატკინოთ დარდიანი: მიყვარდით! მიყვარხართ! მეყვარებით!“…
დაბადების დღეს გილოცავ მეგობარო!“-ამ სიტყვებით გამოეხმაურა თემურ ფირცხალაიშვილის 60 წლის იუბილეს პოეტის ახლო მეგობარი ეთო ჭყონია.
ავტორი: სოფო წილოსანი
