დღეს, ჩემპიონთა ლიგის ჯგუფური ეტაპის მეორე ტურში, ხვიჩა კვარაცხელიას „ნაპოლი“ მადრიდის „რეალს“ უმასპინძლებს.
იტალიელი ჟურნალისტი ლუკა მარჩეჯანის აზრით, ნეაპოლურმა კლუბმა ტრავმირებული ტიბო კურტუას არყოფნით უნდა ისარგებლოს და კეპა არისაბალაგას კარს აქტიურად შეუტიოს.
„ჯუდ ბელინგემს შეუძლია იმოქმედოს როგორც მარცხენა ცენტრალურ ნახევარმცველად, ასევე ათიანის პოზიციაზეც. ხოსელუც ძალიან ძლიერი ფეხბურთელია, ვინისიუსი ტრავმიდან დაბრუნდა. “რეალს” უძლიერესი ნახევარმცველები ჰყავს. რაც ყველაზე მეტად მაკვირვებს, ეს უკვე 10 წელია გრძელდება, მუდამ ახერხებენ, რომ ხარისხიანი ნახევარმცველები ამავე დონის მოთამაშეებით ჩაანაცვლონ.
მიუხედავად ამისა, კარლო ანჩელოტის გუნდს ტრავმების გამო გარკვეული პრობლემები აქვს. კეპა არისაბალაგა არადამაჯერებელია. „რეალს“ მილიტაო და ალაბაც აკლია. თუ “ნაპოლი” ამ უპირატესობით ისარგებლებს, მაშინ მადრიდელთა დამარცხების შანსები ექნებათ”, – განაცხადა ლუკა მარჩეჯანიმ.
გუშინ, მატჩის წინ ნეაპოლელთა მთავარმა მწვრთნელმა რუდი გარსიამ პრესკონფერენცია გამართა.
“ჩემპიონთა ლიგა მწვრთნელისთვის და ფეხბურთელისთვის ყველაზე ლამაზი საკლუბო ტურნირია, ყოველთვის განსაკუთრებული. როცა ჰიმნს ვუსმენთ, ძლიერ ენერგიას ვგრძნობთ და ეს გარწმუნებს, რომ ჩემპიონთა ლიგაზე ხარ. „ნაპოლი“ არის კლუბი, რომელმაც ამ ტურნირზე ყოველ სეზონში უნდა ითამაშოს. მსოფლიოს ერთ-ერთ უდიდეს გუნდს ვეთამაშებით, რომელმაც ბოლო 10 სეზონში ჩემპიონთა ლიგა 5-ჯერ მოიგო, მათ შორის ორი წლის წინ მწვრთნელთან ერთად, რომელსაც თქვენ ძალიან კარგად იცნობთ. რთული მატჩი იქნება, მაგრამ გვაქვს ამბიცია, რომ მოსაგებად ვითამაშოთ.
შეიძლება ცოტა ადრეა ამაზე საუბარი. მნიშვნელოვანი იყო პირველი მატჩის მოგება, რადგან ჩემპიონთა ლიგაში სტუმრად გამარჯვება ადვილი არასდროსაა. ხვალ ვეცდებით მოგებას, ვიცით, მეტოქის ძალა, მაგრამ დადებითი შედეგისთვის ყველაფერს გავაკეთებთ“.
რუდი გარსიამ პრესკონფერენციის გარდა, „Sky Sport“-თანაც გააკეთა კომენტარი, სადაც კვარაცხელიაზეც ისაუბრა: „ჩვენთვის არაფერი იყო კატასტროფული, ფეხბურთელები დაბრუნდნენ თავის დონეზე, მაგალითად, კვარა, რომელმაც მოახერხა გოლის გატანა და ახლა შესანიშნავად თამაშობს, რადგან თავდაჯერება აღიდგინა“.
პრესკონფერენციაზე გარსიასთან ერთად გუნდის კაპიტანი ჯოვანი დი ლორენცოც იყო:
„ჩემპიონთა ლიგა „რეალის“ სახლია, მაგრამ მზად ვართ, ჩვენს მოედანზე ვთამაშობთ, სტადიონი სავსე იქნება, შესაბამისად, ყველაფერს გავაკეთებთ, რომ მათ სირთულეები შევუქმნათ. ვიცით, რომ დიდ გუნდს ვეთამაშებით, მაგრამ მზად ვართ. ვინისიუსი დიდი ჩემპიონია, მიუხედავად ახალგაზრდული ასაკისა. მის წინააღმდეგ ფრთხილად უნდა ვითამაშოთ, მაგრამ როგორც მწვრთნელმა თქვა, არა მხოლოდ ერთ მოთამაშეს უნდა მივაქციოთ ყურადღება, არამედ ყველა მათგანს. ოსიმენთან დაკავშირებით ჩვენთვის არაფერი შეცვლილა, გუნდთან ურთიერთობა უცვლელია, ის ყოველთვის მონდომებულია, ყოველთვის ეხმარება თანაგუნდელებს, ჩვეულებრივი ოსიმენია, რომელიც დიდი ფეხბურთელია და ყველაფერს გააკეთებს რეალთან, როგორც ყველა დანარჩენი ფეხბურთელი“, – განაცხადა ჯოვანი დი ლორენცომ.
გუშინ, „მილანისა“ და იტალიის ნაკრების ყოფილმა ფეხბურთელმა მასიმო ამბროზინიმ ხვიჩა კვარაცხელიას შესახებ ისაუბრა.
„კვარაცხელია ფენომენია. მახსოვს, ჩემპიონთა ლიგაში მილანთან მატჩის შემდეგ გააკრიტიკეს, მაგრამ რეალურად ერთადერთი იყო, ვინც იმ შეხვედრაში რაღაცის შექმნას ცდილობდა. ასეთი ფეხბურთელის შესაძლებლობების ეჭვქვეშ დაყენება არ შეიძლება“, – თქვა ამბროზინიმ.
გერმანიის ნაკრებისა და მიუნხენის „ბაიერნის“ ყოფილმა ვარსკვლავმა, ლოთარ მათეუსმა, კი ექს-ნეაპოლელი მცველი, კიმ მინ-ჯეს გააკრიტიკა..
„კიმი ჯერ არ არის მზად. ის არის „ბაიერნის“ გაურკვევლობის ფაქტორი. უპირველესად მას ბუნდესლიგასთან შეგუება სჭირდება. არაფერი მაქვს ფეხბურთელის საწინააღმდეგო, მაგრამ მან ჯერ ვერ გაამართლა ის მოლოდინი, რაც მას იტალიაში მიღებული ქების გამო ჰქონდა“, – განაცხადა ლოთარ მათეუსმა.
გერმანიის მიმდინარე ჩემპიონატში სამხრეთ კორეელმა ფეხბურთელმა ექვს მატჩში მიიღო მონაწილეობა, რომლებშიც ეფექტური ქმედება არ შეუსრულებია. გასულ სეზონში, „ნაპოლიში“ თამაშისას, კიმმა სერია A-ში 35 მატჩი ჩაატარა, ორი ბურთი გაიტანა და ამდენივე საგოლე გადაცემა შეასრულა.
ავტორი
