დიდი ჯახი ბელეკში: ხვიჩა კვარაცხელია ქართველების წინააღმდეგ

გუშინ თურქულ შეკრებაზე მყოფი ბათუმის „დინამო“ ამხანაგურად ყაზანის „რუბინს“ დაუპირისპირდა. აჭარული კლუბის რიგებში პირველად ითამაშა ჯანო ანანიძემ, ხოლო ყაზანელებს ორთვიანი შესვენების შემდეგ ხვიჩა კვარაცხელია დაუბრუნდა. მატჩი ბელეკში გაიმართა, საინტერესო აღმოჩნდა და ფრედ – 2:2 დასრულდა.

ხვიჩა კვარაცხელია გასული წლის ბოლოს მიღებული ტრავმის შემდეგ, „რუბინთან“ ერთად შეკრებებზე ინდივიდუალურად ემზადებოდა და საკონტროლო მატჩებში არ მონაწილეობდა. გუშინ ხვიჩა ამჟამინდელი გუნდის სასტარტო შემადგენლობაში გამოჩნდა და პირველი ტაიმი ჩაატარა. კვარაცხელიას ჰქონდა რამდენიმე მომენტი მაგრამ ვერ გამოიყენა.

ოთხივე გოლი შესვენების შემდეგ გავიდა. ბათუმელებმა ანგარიში 11-მეტრიანით გახსნეს. 58-ე წუთზე ჯაბა ჯიღაურს პირველი დარტყმა „რუბინის“ მეკარემ აუღო, თუმცა არბიტრმა ამ უკანასკნელზე წესების დარღვევა დააფიქსირა და ჯიღაურს მეორედ დაარტყმევინა. ჯაბა ამჯერად ზუსტი აღმოჩნდა – 1:0.

5 წუთში პენალტი უკვე ქართული გუნდის კარშიც დაინიშნა, რომელიც „რუბინის“ ფეხბურთელმა ონუგხამ ზუსტად შეასრულა და ანგარიში გაათანაბრა. მალევე კუპატაძის კარში კიდევ ერთი გოლი კლიმოვმა შეაგდო – 2:1.

საბოლოო ანგარიში ბოლო წუთზე ისევ ჯიღაურმა დააფიქსირა, რომელიც მეკარესთან პირისპირ გავიდა, ბურთი თავზე გადაუგდო და დუბლი გაიფორმა – 2:2.

საქართველოს ჩემპიონების რიგებში შეცვლაზე ითამაშა ჯანო ანანიძემ, რომელიც კარიერის გაგრძელებას ბათუმურ კლუბში აპირებს.

გუშინ პეკინში მიმდინარე ზამთრის 24-ე ოლიმპიურ თამაშებზე ფიგურულ სრიალში მორის ყვითელაშვილმა იასპარეზა. 26 წლის ყვითელაშვილი ბოლო ექვსეულში გამოჩნდა და მიზნის მიღწევა არ გასჭირვებია.

ქართველი მოკლე პროგრამით წარსდგა, 97.98 ქულა დააგროვა და 30 სპორტსმენს შორის მეხუთე ადგილი დაიკავა! აღსანიშნავია, რომ მორისმა ევროპელ მონაწილეებს შორის ყველას აჯობა და ცხადია, ფინალურ, თავისუფალ პროგრამაში მონაწილეობის უფლება მოიპოვა.

ფინალური, თავისუფალი პროგრამა 10 თებერვალს გაიმართება და მედლები გათამაშდება.

გუშინ პეკინში ერთი სერიოზული სკანდალი დაფიქსირდა.ზამთრის ოლიმპიური თამაშების ქალთა ყინულის ჰოკეის მატჩი კანადის ნაკრებსა და როკ-ის გუნდს შორის დაახლოებით ერთსაათიანი დაგვიანების შემდეგ დაიწყო. მიზეზი: კანადელი ჰოკეისტები ყინულზე გასვლაზე და რუსებთან თამაშზე უარს აცხადებდნენ, რადგან როკ-ის გუნდის წევრებმა კორონავირუსის ტესტების ნეგატიური პასუხები ვერ წარმოადგინეს.

კანადელი სპორტსმენები გასახდელიდანაც კი არ გამოვიდნენ მას შემდეგ, რაც შეიტყვეს, რომ რუსებს ტესტების პასუხები არ ჰქონდათ. როკ-ის გუნდის წევრები კი ყინულზე გავიდნენ, 40 წუთი ისრიალეს და მერე ისევ გასახდელში დაბრუნდნენ.

გუნდებს შორის ხანგრძლივი მოლაპარაკებების შემდეგ გადაწყდა, რომ მატჩი მაინც შედგებოდა – ოღონდ, დამცავი ნიღბებით. საბოლოოდ, შეხვედრა სწორედ პირბადეებით გაიმართა და კანადის ნაკრებმა როკ-ის გუნდი ძალიან ადვილად, 6:1 დაამარცხა…

სერიოზული ინციდენტი დაფიქსირდა ინგლისშიც.

ინგლისის თასის 1/16-ფინალში „ნოტინგემ ფორესტმა“ „ლესტერ სიტი“ 4:1 დაამარცხა და მომდევნო ეტაპზე გავიდა. შედეგი ერთგვარად მოულოდნელი აღმოჩნდა მაგრამ თამაში ყურადღების ცენტრში მაინც სხვა რამის გამო მოექცა.

„ნოტინგემ ფორესტის“ ფეხბურთელები „ლესტერის“ კარში მორიგ გოლს ზეიმობდნენ, როდესაც მოედანზე სტუმართა ერთ-ერთი ფანი შევარდა და მასპინძელ ფეხბურთელებს თავს დაესხა. გულშემატკივარი უმალვე სტადიონის დაცვამ სიტუაციას განარიდა.

„ლესტერ სიტი“ მომხდარ ინციდენტს ოფიციალური განცხადებით გამოეხმაურა და ქომაგის ქმედება დაგმო:

„კლუბი შეძრწუნებულია ამ საქციელით და ბოდიშს უხდის „ნოტინგემ ფორესტსა“ და მის ფეხბურთელებს. გვინდა, სტადიონის სტიუარდები სწრაფი რეაგირებისთვის შევაქოთ. მათ შეაჩერეს აგრესორი, რომელსაც მთელი სიცოცხლე შეეზღუდება ჩვენი გუნდის საშინაო და საგარეო მატჩებზე დასწრება“.

[sexy_author_bio]