ხვიჩა კვარაცხელიას „ნაპოლი“ საკუთარ სტადიონზე „ფროზინონეს“ დაუპირისპირდა და 0:4 განადგურდა! ამ მარცხის შემდეგ ნეაპოლური კლუბი იტალიის თასს გამოემშვიდობა.
თამაშის წინ, ვალტერ მაძარიმ შემადგენლობაში როტაციას მიმართა ფეხბურთელების დასვენების მიზნით – ხვიჩა კვარაცხელია, ჯოვანი დი ლორენცო, ვიქტორ ოსიმენი და სტანისლავ ლობოტკა არ იყვნენ ძირითად შემადგენლობაში.
ამ სვლამ არ გაამართლა, 37-ე წუთზე ჯოვანი სიმეონეს გაუქმებულ გოლს თუ არ ჩავთვლით. 64-ე წუთზე მაძარიმ კვარაცხელია და ოსიმენი ერთად შეუშვა მოედანზე, მაგრამ… ამის შემდეგ სტუმრებმა ნეაპოლელთა რბევა დაიწყეს.
65-ე წუთზე ანგარიში ენცო ბარენეჩეამ გახსნა, ხუთ წუთში ჯუზეპე კაზომ სხვაობა გაზარდა, ხოლო მსაჯის მიერ კომპენსირებულ დროში ვალიდ ჩედირამ და აბდუ ჰარუიმ ანგარიში საერთოდაც გამანადგურებელი გახადეს – 0:4.
საინტერესოა, რომ „ფროზინონეში“ პირველი ტაიმი მარჯვენა ფლანგზე ითამაშა გიორგი კვერნაძემ, რომელიც შესვენებაზე შეცვალეს. მან ყვითელი ბარათი მიიღო და შეცვლის მიზეზიც ალბათ ეს იყო. მის აქტივში იტალიის თასზე სამი მატჩია და სამივე ძირითადში, ხოლო „სერია A“-ში სამჯერ ითამაშა და სამჯერვე შეცვლაზე.
„ნაპოლის“ მთავარმა მწვრთნელმა ვალტერ მაძარიმ იტალიის თასის მერვედფინალში „ფროზინონესთან“ მატჩის შემდეგ ისაუბრა.
„პირველ რიგში, მინდა გულშემატკივრებს ბოდიში მოვუხადო, ისინი არ იმსახურებდნენ ამას და დღესაც ბოლომდე გვამხნევებდნენ. ხვალ გუნდში ყველამ ერთმანეთს უნდა შევხედოთ და ვიფიქროთ ამ ცუდ თამაშზე. აშკარა შეცდომები დავუშვით. ფეხბურთში წაგება შეიძლება, მაგრამ არა ასე. საკუთარ თავს შეკითხვები უნდა დავუსვათ და სასწრაფოდ შევცვალოთ დამოკიდებულება. შეიძლება გოლი კუთხურიდან გაუშვა, როგორც გავუშვით, ან შეცდომით, რაც მოხდა მეორე გოლზე, მაგრამ რაც ბოლო წუთებში ხდებოდა, დაუშვებელია, არ უნდა ხდებოდეს. ეს მარცხი მომავლისთვის გაკვეთილი უნდა იყოს.
სიმართლე გითხრათ, სანამ შეცვლებს არ გავაკეთებდი, გუნდი კარგად თამაშობდა იმ ფეხბურთელებით, რომლებსაც ამ სეზონში მცირე სათამაშო დრო აქვთ. მერე ვიფიქრე, რომ ახალი ძალები გვჭირდებოდა მოსაგებად, მაგრამ თამაში გავაუარესეთ. სამწუხაროდ, ამის ანალიზი არ მაქვს, ალბათ, ისინი არ არიან შეჩვეული შეცვლაზე თამაშს, ან როდესაც ლიდერები გამოვიდნენ, ვიფიქრეთ, რომ ადვილად მოვიგებდით“, – განაცხადა მაძარიმ.
„ნაპოლი“ მომდევნო მატჩს 23 დეკემბერს, სტუმრად „რომასთან“ ჩაატარებს.
„ნაპოლის“ ნახევარმცველი ელიფ ელმასი კი კარიერას სავარაუდოდ გერმანულ „ლაიფციგში“ გააგრძელებს.
მაკედონიელი ფეხბურთელი თანაგუნდელებს უკვე დაემშვიდობა და მისი წასვლა გადაწყვეტილია. დასახელდა ტრანსფერის ფასიც – 25 მილიონი ევრო.
ელმასი „ნაპოლიმ“ 2019 წელს „ფენერბაჰჩედან“ დაიმატა და მას შემდეგ 185 მატჩში 19 გოლის გატანა მოახერხა.
ელმასის თემას გამოეხმაურა „ნაპოლის“ მთავარი მწვრთნელი ვალტერ მაძარი და იანვრის სატრანსფერო პერიოდში შემადგენლობაში ცვლილებები არ გამორიცხა.
„ტრანსფერები? შეფასებებს ხელმძღვანელობასთან ერთად გავაკეთებ. ნახევარდაცვაში ანგისას ვკარგავთ (აფრიკის თასზე სათამაშოდ მიდის) და სხვა ტრანსფერის შანსი თუ იქნება, კლუბი ჩაერევა.
გუნდიდან წამსვლელები? სიმართლეს ვიტყვი: თუ ვინმეს სკუდეტოს მოგების შემდეგ მოწყენილი სახე აქვს და წასვლა უნდა, გავუშვებთ. მე მინდა ახალი ძალების და მეტი მოტივაციის მქონე მოთამაშეები მყავდეს. ბოლოს ცხადია, ყველაფერი კლუბის გადასაწყვეტია“, – განაცხადა ვალტერ მაძარიმ.
„ვალენსიამ“ ესპანეთის „ლა ლიგის“ მე-18 ტურში სტუმრად „რაიო ვალეკანო“ დაამარცხა – 1:0.
გამარჯვებაში თავისი წვლილი ტრადიციულად გიორგი მამარდაშვილმაც შეიტანა, რომელმაც მშრალად შეინახა კარი.
თამაშის შემდეგ ქართველი კარის დარაჯი „ვალენსიას“ მთავარმა მწვრთნელმა რუბენ ბარახამ შეაქო.
„მამარდაშვილი ახალგაზრდა მეკარეა, რომელსაც უკვე დიდი გამოცდილება აქვს. მნიშვნელოვანია, რომ მეკარეები კარგ ფორმაში იყვნენ, რადგან თამაშის მოსაგებად ისინი საჭირო არიან. დღეს მან ძალიან კარგად წაიკითხა სათამაშო სიტუაციები, ის რთულ მატჩებში ძალიან გვეხმარება. არ უნდა დაგვავიწყდეს, რომ ძალიან ახალგაზრდაა და ჯერ ბევრი აქვს სასწავლი, მაგრამ ის არ წყვეტს პროგრესს. მისი დამოკიდებულება შესანიშნავია, წელს ძალიან სტაბილურია და გუნდს მაგრად ეხმარება“.
გიორგი მამარდაშვილმა „ლა ლიგის“ მიმდინარე სეზონში ყველა მატჩში შეუცვლელად ითამაშა (18-ჯერ) და კარის მშრალად შენახვა 6-ჯერ შეძლო, ხოლო 22 გოლი გაუშვა.
ავტორი
