გუშინ გამოცემამ „Inside the Games“ სენსაციური ინფორმაცია გაავრცელა. პეკინის ოლიმპიურ თამაშებზე, ფიგურულ სრიალში გუნდურ შეჯიბრში დაფიქსირებული შედეგები შესაძლოა გადაიხედოს და ამის მიზეზი დოპინგ-ტესტია, რომელიც რუსეთის სპორტსმენს აუღეს. რუსმა სპორტსმენმა ტესტირება ოლიმპიადის დაწყებამდე ჩაიტარა.
ზამთრის ოლიმპიურ თამაშებზე ფიგურულ სრიალში გუნდური შეჯიბრი 7 თებერვალს დასრულდა. გამარჯვება რუსეთის ნაკრებმა მოიპოვა, მეორეზე აშშ-ის გუნდი გავიდა, მესამეზე კი – იაპონია. საქართველოს მოციგურავეთა ნაკრებმა, რომელმაც ოლიმპიადაზე ისტორიაში პირველად იასპარეზა, გამოსვლა 22 ქულით მე-6 ადგილზე დაასრულა.
ფიგურულ სრიალში გუნდური ტურნირის გამარჯვებულთა დაჯილდოება 8 თებერვალს უნდა ჩატარებულიყო, მაგრამ მისი გადატანის გადაწყვეტილება მიიღეს. როგორც საერთაშორისო ოლიმპიური კომიტეტის წარმომადგენელმა მარკ ადამსმა განაცხადა, ცერემონიის გადატანის აუცილებლობა საერთაშორისო ფედერაციასთან იურიდიული კონსულტაციის გავლის საჭიროებამ წარმოშვა.
თუკი რუსეთის ნაკრების გამო საპრიზო ადგილებში ცვლილება შევიდა, შესაძლოა, საქართველოს ფიგურული სრიალის ნაკრებმა საუკეთესო ხუთეულში შესვლა შეძლოს.
გუშინ ქართველმა სამთო-მოთხილამურემ, ნინო წიკლაურმა, პეკინის ზამთრის ოლიმპიურ თამაშებზე სლალომში იასპარეზა. ქართველმა მოთხილამურემ პირველი დაშვებისას ტრასა 1.00,11 წუთში გაიარა და 47-ე შედეგი ჰქონდა. წიკლაურმა მეორე ცდას ცოტა მეტი – 1.00,37 მოანდომა, მაგრამ უკეთესი – 42-ე ადგილი დაიკავა. მას 42-ე საფეხური ერგო ორი დაშვების ჯამშიც (2.00,48).
გიგანტურ სლალომში ქართველმა სპორტსმენმა კარიერაში საუკეთესო შედეგს მიაღწია და 34-ე ადგილი დაიკავა.
ყაზანის „რუბინის“ სპორტულმა დირექტორმა ოლეგ იაროვინსკიმ კი ხვიჩა კვარაცხელიას შესახებ ახალი კომენტარი გააკეთა. სპორტული მაღალჩინოსნის განცხადებით მისი გუნდი ქართველი ფეხბურთელის სანაცვლოდ კონკრეტულ თანხას – 20 მილიონ ევროს ითხოვს. მანვე იმ კლუბებზეც ისაუბრა, რომლებიც ხვიჩას გადაბირებით იყვნენ დაინტერესებულნი, თუმცა, კონკრეტულ შეთავაზებებამდე საქმე არ მისულა.
„ვინ იყო დაინტერესებული კვარაცხელიათი? ერთი ძლიერი კლუბი გერმანული ბუნდესლიგიდან და ორიც ინგლისის პრემიერლიგიდან. მათგან რომელიმე ხვიჩას თაობაზე ფინალური წინადადებით რომ მოსულიყო, მას აუცილებლად გავყიდიდით, თუმცა, არავინ გამოჩენილა.
ძლიერი ევროპული კლუბისთვის რუსეთის პრემიერლიგიდან ქართველის ყიდვა სერიოზული ნაბიჯია, რომელზე წასვლაც იოლი არაა. სამწუხაროდ, მოთმინებით არავინ გამოვირჩევით. მისი გაყიდვა უკვე მაისში დაიწყეს, როდესაც არავითარი კონკრეტიკა არა არსებობდა.
ხვიჩას ვუთხარი: „თუკი შემოთავაზება იქნა, გაგიშვებთ“. სხვა საქმეა, რომ მხოლოდ საუბრებით საქმეს ვერ უშველი, თუნდაც, ყოველდღე ახალი ჭორი ჩნდებოდეს. კვარაცხელია მხოლოდ მას შემდეგ დამშვიდდა, რაც სატრანსფერო ფანჯარა ოფიციალურად დაიხურა. რამდენი გვინდა მის სანაცვლოდ? ფასი არ შეცვლილა – 20 მილიონი ევრო, თუმცა, ჩვენ მოლაპარაკებას ყველასთან და ყოველთვის ვახერხებთ”.
კატალონიურ „ბარსელონაში“ უახლოეს მომავალში დიდი ცვლილებები იგეგმება. კლუბს მალე ახალი სპონსორი ეყოლება და „კამპ ნოუს“ სტადიონსაც სახელი ოფიციალურად შეეცვლება.
გადაწყვეტილია, რომ კატალონიური გუნდის ახალი სპონსორი „Spotify“ იქნება, რომელთანაც 3-წლიანი შეთანხმება მიღწეულია და ის ძალაში 2022 წლის ზაფხულიდან შევა. „ბარსას“ ამჟამინდელი სპონსორი „Rakuten“-ია, რომელთანაც კონტრაქტი სეზონის ბოლოს იწურება.
გარდა ამისა, კლუბის საშინაო არენას სახელი შეეცვლება და მომდევნო 3 წლის განმავლობაში „Spotify კამპ ნოუ“ დაერქმევა. გარიგების თანახმად, ლეო მესის ყოფილი გუნდი მუსიკალური პლატფორმის კომპანიისგან 237 მილიონ გირვანქა სტერლინგს გამოიმუშავებს.
საინტერესოა რომ გუშინ „ბარსელონა“ აღმასრულებელმა დირექტორმა ფერან რევერტერმა ოფიციალურად დატოვა, რასაც ესპანური პრესა სწორედ „Spotify“-სთან მოსალოდნელ თანამშრომლობას უკავშირებს. აღმოჩნდა რომ რევერტერი კლუბისა და „Spotify“-ის თანამშრომლობის წინააღმდეგი იყო.
[sexy_author_bio]
