მას შემდეგ, რაც ფეხბურთის საერთაშორისო ასოციაციამ რუსეთში მოასპარეზე ლეგიონერებს ამ ქვეყნის დატოვების უფლება მისცა, საქართველოში ყაზანის „რუბინის“ მოთამაშე ხვიჩა კვარაცხელიას გადაწყვეტილებას მოუთმენლად ელიან. სამწუხაროდ ქართველი შემტევი ჯერჯერობით თორნიკე შენგელია ვერ აღმოჩნდა და კარიერას კვლავ ყაზანურ გუნდში აგრძელებს.
ბოლო ორი კვირაა ქართულ სოციალურ ქსელებში ახალგაზრდა ფეხბურთელის მიმართ უარყოფითი აჟიოტაჟია ატეხილი, რომელიც განსაკუთრებით ორი დღის წინ გაძლიერდა. 20 მარტს „რუბინი“ მოსკოვში „ცსკა“-ს დაუპირისპირდა და ხვიჩა კვარაცხელია მინდორზე ყაზანური კლუბის კაპიტნის სამკლავურით წარსდგა. შეხვედრა დასრულებული არც კი იყო და საქართველოში არაერთი მოწოდება უკვე გაისმა – „შენგელიამ საკალათბურთო „ცსკა“ მიატოვა. ეს ვინ არის, უკრაინაში სისხლი იღვრება და „რუბინს“ მაინც ვერ სცილდება. ჩაირაზოს კვარაცხელიასათვის საქართველოს ნაკრების კარი!“. „გამოხმაურება“ ისეთი აქტიური და „მაღალი“ გახლდათ რომ „რუბინის“ პრესსამსახურს მოგვიანებით სპეციალური განცხადების გავრცელება მოუწია.
ხვიჩა კვარაცხელია ამჟამად საქართველოს ნაკრების შეკრებაზე იმყოფება. ამხელა „აჟიოტაჟის“ ატეხვას ალბათ რამდენიმე დღე მოცდა სჯობდა, როდესაც ფეხბურთელი თავის სამომავლო გეგმების შესახებ ალბათ თავად ისაუბრებს. ჯერჯერობით ცნობილია რომ ამ ეტაპზე ქართველი შემტევით იტალიური „ნაპოლია“ დაინტერესებული.
მაგრამ დავუბრუნდეთ „ცსკა“ – „რუბინის“ შეხვედრას…
მატჩის პირდაპირი რეპორტაჟის მიმდინარეობისას „Match TV“-ის კომენტატორებმა შემდეგი განცხადება გააკეთეს:
„ხვიჩას გუნდს ბოსნიას წინააღმდეგ ამხნაგური შეხვედრა აქვს ჩანიშნული. ფეხბურთელი საქართველოს ეროვნულ ნაკრებშია გამოძახებულია, ეს კი სანაკრებო პაუზამდე ბოლო მატჩია. არ არის გამორიცხული, რომ ამ შეკრების შემდეგ ხვიჩა ყაზანში აღარ დაბრუნდეს. შესაძლოა, კაპიტნის დღევანდელი სამკლავური სიმბოლურია.“
„ცსკა“-სთან მატჩის დასრულების შემდეგ, ხვიჩას ჟურნალისტებმა მომავალზე დაუსვეს კითხვა, რომელზეც მან უპასუხა:
„დავრჩები თუ არა „რუბინში“? ჯერ არ ვიცი“.
მოგვიანებით, „Матч ТВ“ ავრცელებს ინფორმაციას, რომ „რუბინის“ ქართველი ფეხბურთელი ხვიჩა კვარაცხელია, სანაკრებო პაუზის შემდეგ, ყაზანში აღარ დაბრუნდება. ამავე ტელეარხის მტკიცებით, კვარაცხელიას ოჯახი მუქარებს იღებს და ზეწოლის ქვეშაა იმის გამო, რომ ხვიჩა რუსულ კლუბში ასპარეზობს.
ამასთან დაკავშირებით გუშინ „რუბინის“ პრესსამსახურმა სპეციალური განცხადება გაავრცელა: „ხვიჩა საქართველოს ნაკრების შეკრებაზე გაემგზავრა, დაბრუნდება თუ არა კლუბში ვნახავთ მას შემდეგ, რაც სანაკრებო პაუზა დასრულდება. რაც შეეხება მის მიმართ განხორცილებულ მუქარას, ჩვენ ამის შესახებ არაფრის თქმა არ შეგვიძლია“.
გუშინვე, ცნობილმა იტალიელმა ჟურნალისტმა, ალფრედო პედულამ ექსკლუზიური ინფორმაცია გაავრცელა და „რუბინის“ ქართველ ფეხბურთელზე, ხვიჩა კვარაცხელიაზე დაწერა. პედულამ საკუთარ ვებგვერდზე სტატია გამოაქვეყნა და ქართველის მიმართ „ნაპოლის“ ინტერესი დაადასტურა.
„ნაპოლი“ მომავალზე ფიქრობს და ლორენცო ინსინიეს შემცვლელი უნდა იპოვოს. „რუბინის“ შემტევი ხვიჩა კვარაცხელია, რომელიც 2001 წელსაა დაბადებული, იტალიელს ძალიან, ძალიან ჰგავს. მათი შედარება ბევრჯერ მოხდა და ნეაპოლურ გუნდში საქმის ბოლომდე მიყვანა სურთ. ამ ეტაპზე, კლუბის მხრიდან, მხოლოდ დიდ ინტერესს აქვს ადგილი, მაგრამ სამომავლოდ, შესაძლოა, ყველაფერი შეიცვალოს.
კვარაცხელიას „რუბინთან“ კონტრაქტი 2024 წლამდე აკავშირებს და მისი სატრანსფერო ღირებულება დაახლოებით 15 მილიონი ევროა. 3 წლის წინ, იგი 50 ყველაზე პერსპექტიულ ფეხბურთელს შორის მოხვდა. ხვიჩას შესანიშნავი ტექნიკა, დრიბლინგი და სისწრაფე აქვს. იგი იმ ასაკში იმყოფება, რომ პროგრესის მიღწევა კვლავინდებურად შეუძლია და პარალელურად, დიდ კლუბში გადასასვლელად მზადაა. ევროპის მასშტაბით, მის მიმართ სერიოზული ინტერესია, მაგრამ „ნაპოლიმ“ ნაბიჯი უკვე გადადგა და მომავალში იმავეს აუცილებლად გააკეთებს.“ – დაწერა ალფრედო პედულამ.
რამდენიმე დღის წინ გამოცემამ „Tuttomercatoweb“ გაავრცელა ცნობა რომ „ნაპოლის“ შემადგენლობის გაძლიერება სურს და ხვიჩას ერთ-ერთ ვარიანტად განიხილავს.
