გუშინ, ყაზანის „რუბინმა“ ხვიჩა კვარაცხელიას შემცვლელად ახალი ფეხბურთელი შეიძინა, რაც იმის მომასწავებელია რომ დიდი ალბათობით, უახლოეს დღეებში ქართველი კარიერას ახალ კლუბში გააგრძელებს.
გამოცემა „Ekstra Bladet“-ის ინფორმაციით დანიის სუპერლიგის ლიდერ „მიდტიულანდის“ 23 წლის გარემარბი ანდერს დრაიერი „რუბინში“ გადადის. „მიდტიულანდი“ მას ყაზანურ კლუბს 52.5 მილიონ კრონად (დაახლოებით 7 მილიონ ევროდ) მიჰყიდის. ფეხბურთელი მედშემოწმებას გერმანიაში გაივლის. დრაიერმა 2021 წელს ევროპის ახალგაზრდულ ჩემპიონატზე მიიღო მონაწილეობა და ჯგუფურ ეტაპზე რუსეთის ნაკრებს გაუტანა გოლი. „Transfermarkt“-ის მიხედვით, მისი ფასი 6 მილიონია.
დიდი ალბათობით, დრაიერს ხვიჩა კვარაცხელიას შემცვლელად ყიდულობენ, რომლის შესახებ ბოლო ხანს ინფორმაცია მკაცრად გასაიდუმლოებულია. ქართველს „ტოტენჰემს“ უკავშირებენ და ამ მოსაზრებას ქართული და რუსული ფეხბურთის კულისებში ღრმად ჩახედული არაერთი ადამიანი ადასტურებს. ისღა დაგვრჩენია მოვლენების შემდგომ განვითარებას დაველოდოთ.
საქართველოს ეროვნული გუნდისა და ბათუმის „დინამოს“ მარცხენა მცველი ირაკლი აზაროვი თურქულ „ტრაბზონსპორს“ მიუახლოვდა.
გამოცემა „Sabah“-ის ინფორმაციით, თურქულმა გუნდმა აზაროვის სანაცვლოდ ბათუმის „დინამოს“ 450 ათასი ევრო შესთავაზა, თუმცა ბათუმელებმა 1 მილიონ ევროზე მეტი მოითხოვა. მოლაპარაკებები გრძელდება და ქართველი მოთამაშე ალბათ კარიერას ჩვენს მეზობელ ქვეყანაში გააგრძელებს.
მიმდინარე ევროთასებზე გამოსვლის შემდეგ ბათუმის „დინამოს“ ხელმძღვანელობამ განაცხადა, რომ ამჟამად არსებული შემადგენლობის შენარჩუნებას სეზონის დასრულებამდე შეეცდება. უფრო მეტიც. ბათუმური გუნდის უმთავრესი ამოცანა საქართველოს ჩემპიონობაა, მომავალი წლის ევროპულ ტურნირებზე კი – წლევანდელ გამოსვლაზე უკეთესი შედეგის ჩვენება.
რასაკვირველია აჭარული გუნდის ხელმძღვანელობას რაიმე ქმედებისაკენ ვერ მოვუწოდებ, მაგრამ კეთილი რჩევის სახით ვეტყოდი, რომ მინიმუმ ერთი წელი ეს შემადგენლობა შეენარჩუნებინა.
აგერ, „უეფამ“ თავისი წევრი ქვეყნების შიდა ჩემპიონატების რეიტინგი განაახლა. „უეფას“ მიმდინარე კლასიფიკაციაში საქართველო 46-ე ადგილზეა (სეზონის დაწყებამდე 43-ე იყო). ქვეყანამ ამ სეზონში 1.250 ქულა მიიღო, რაც 2020/21 წლების სეზონის შედეგს ჩამორჩება – 1.750. მესამე სეზონია, რაც საქართველოს ჩემპიონატს რეგრესი აქვს, რადგან 2019/20 წლების სეზონში ქართულმა კლუბებმა „უეფა“-ს კოეფიციენტთა ცხრილში 2.250 ქულა დააგროვეს.
მიმდინარე რეიტინგში საქართველოს 7.000 ქულა აქვს, ისევე, როგორც მალტას (45-ე) და ჩრდილოეთ მაკედონიას (47-ე). თუ ქვეყანა 50-ეულიდან გავარდება, ევროთასებზე 4-ის ნაცვლად 3 კლუბის გამოყვანის უფლებას მიიღებს. უახლოეს სეზონებში საქართველოს ეს არ ემუქრება, თუმცა თუ რეგრესი გაგრძელდა, საფრთხე სერიოზულია.
ამ დროს ჩემპიონთა ლიგის მიმდინარე ჯგუფურ ეტაპზე გუნდი გაიყვანა მოლდოვამ – „შერიფი“, კონფერენს ლიგის ასევე ჯგუფურ ეტაპზე კი სომხეთმა – „ალაშკერტი“. ქართული კლუბების ხელმძღვანელობას მოთამაშეების გაყიდვის ნაცვლად მათი თუნდაც ერთი-ორი წლით შენარჩუნება უფრო ესაჭიროება. „შერიფსა“ და „ალაშკერტს“ სულ რამდენიმე წლის წინ „საბურთალომ“ და თბილისის „დინამომ“ მოუგეს. კომენტარი თავად გააკეთეთ. სად არიან დღეს ქართველების მიერ დამარცხებული გუნდები და სად ვართ ჩვენ.
გუშინ ევროპული სპორტული მასმედიის მთავარი სალაპარაკო თემა პორტუგალიელი კრიშტიანო რონალდოს „მანჩესტერ სიტიში“ გადასვლა გახლდათ. „სხვა გმირებმა“, კილიან მბაპემ და მადრიდის „რეალმა“ კი მოკლევადიანი ტაიმ-აუტი აიღეს. გავრცელებული ინფორმაციით ესპანური მხარე „პსჟ“-ს მოთხოვნილ თანხაზე (200 მილიონი ევრო) ჯერ კიდევ ფიქრობს და პასუხს ამ დღეებში გვამცნობს
რაც შეეხება რონალდოს. მისი აგენტი ტურინში ჩავიდა. ჟორჟე მენდეში ცდილობს სატრანსფერო ფანჯრის დახურვამდე 36 წლის ფეხბურთელს ახალი გუნდი მოუძებნოს. მენდეში აეროპორტიდან პირდაპირ რონალდოს სახლში მივიდა, სადაც პორტუგალიელ სუპერვარსკვლავს ესაუბრა. იტალიური მედიის ცნობით, რონალდოს აგენტი ტურინული გრანდის ხელმძღვანელობასაც შეხვდა.
იტალიელმა ჟურნალისტმა ნიკოლო სკირამ საკუთარ „ტვიტერზე“ დაწერა, რომ „მანჩესტერ სიტიმ“ კრიშტიანო რონალდოს 2-წლიანი კონტრაქტი შესთავაზა. „იუვენტუსი“ კი, თავის მხრივ, პორტუგალიელ მეგავარსკვლავში 30 მილიონ ევროს ითხოვს და იმისთვის, რომ გარიგება შედგეს, რომელიმე ფეხბურთელსაც დათმობს. სატრანსფერო ფანჯრის დახურვამდე 4 დღე დარჩა, რაც ცოტა დროა და ყველაფერი მალე უნდა გაირკვეს.
[sexy_author_bio]
