დემოკრატიის კვლევის ცენტრის ინფორმაციით, ცხინვალში ბოლო დროს მომხდარი ინციდენტები, რომელშიც ფიზიკური ძალა გამოიყენეს ოპოზიციური აქტივისტებისა და ჟურნალისტების მიმართ, აჩვენებს დე ფაქტო ხელისუფლების რეპრესიულ მიდგომას კრიტიკისა და გამოხატვის თავისუფლების მიმართ.
“ამ ინციდენტებს შორის ერთ-ერთი უკანასკნელი შემთხვევა ეხება ალექსანდრე ქელეხსაევის, გაზეთ „სამხრეთ ოსეთის” ყოფილი მთავარი რედაქტორის და ოპოზიციური პარტია „ერთიანი ოსეთის” წევრის წინააღმდეგ განხორციელებულ ძალადობას. 14 იანვარს ალექსანდრე ქელეხსაევმა ფეისბუქზე დაწერა, რომ შეხვდა დე ფაქტო პრეზიდენტ ასლან გაგლოევს და მიიღო გარანტიები, რომ დამნაშავეები დაისჯებიან. თუმცა, ის ასევე აღნიშნავს, რომ არ სურს მათი დასჯა კანონის სრული სიმკაცრით და გამოაქვს განცხადება პროკურატურიდან.
კიდევ ერთი ძალადობის ფაქტი მოხდა კონსტანტინე პლიევის მიმართ, რომელიც დე ფაქტო პარლამენტში ე.წ დამოუკიდებელი დეპუტატია. გავრცელებული ინფორმაციით, პლიევს, რომელიც კონფლიქტის დროს ხალხს აშველებდა, ფიზიკურად გაუსწორდნენ ე.წ. მმართველი პარტიის „ნიხასის” წარმომადგენლები. როგორც საუბრობენ სოციალურ ქსელებში, მას ფიზიკურად გაუსწორდნენ სახელმწიფო უსაფრთხოების თანამშრომლები.
სოციალურ ქსელებში მრავალი ადამიანი შეშფოთებულია იმ ფაქტით, რომ მსგავსმა ინციდენტებმა შესაძლოა შექმნას კიდევ უფრო რთული პოლიტიკური ვითარება. მოსახლეობა კრიტიკულად ეკიდება ალან გაგლოევის ნაბიჯებს და უკიდურესად შეშფოთებულნი არიან, რომ ის შესაძლოა „კადიროვის” გზას მიჰყვეს. მომხდარი ფაქტები და მათ უკან არსებული პოლიტიკური დინამიკა აშკარად მიუთითებს, რომ სამხრეთ ოსეთში პოლიტიკური ტონი მკვეთრად იზრდება, და რეპრესიები შესაძლოა უფრო ფართო მასშტაბებით გაგრძელდეს”,_ ნათქვამია დემოკრატიის კვლევის ცენტრის განცხადებაში.
